ಬೆಂಗಳೂರು ಹೊಸ ತಿಂಗಳು ಅಕ್ಟೋಬರ್ 1, 2026 ರಿಂದ ದೇಶಾದ್ಯಂತ ಸಾರ್ವಜನಿಕರ ದೈನಂದಿನ ಜೀವನ ಹಾಗೂ ಜೇಬಿನ ಮೇಲೆ ನೇರ ಪರಿಣಾಮ ಬೀರುವ ಹಲವು ಪ್ರಮುಖ ಹಣಕಾಸು ಮತ್ತು ಬ್ಯಾಂಕಿಂಗ್ ನಿಯಮಗಳು ಜಾರಿಗೆ ಬಂದಿವೆ. ಎಲ್‌ಪಿಜಿ ಸಬ್ಸಿಡಿಯಿಂದ ಹಿಡಿದು ಎಸ್‌ಬಿಐ ಎಟಿಎಂ ವಹಿವಾಟು, ಯುಪಿಐ ಪಾವತಿಗಳು ಹಾಗೂ ಆಸ್ತಿ ಖರೀದಿವರೆಗಿನ ಹೊಸ ಬದಲಾವಣೆಗಳ ಸಮಗ್ರ ವಿವರ ಇಲ್ಲಿದೆ.
LPG ಸಬ್ಸಿಡಿಗೆ ಬಯೋಮೆಟ್ರಿಕ್ ಕಡ್ಡಾಯ:
ಇಂದಿನಿಂದ ಅಡುಗೆ ಅನಿಲ (LPG) ಸಬ್ಸಿಡಿ ಸೌಲಭ್ಯವನ್ನು ಮುಂದುವರಿಸಲು ಗ್ರಾಹಕರು ಆಧಾರ್ ಬಯೋಮೆಟ್ರಿಕ್ (e-KYC) ಪರಿಶೀಲನೆ ಮಾಡಿಸುವುದು ಕಡ್ಡಾಯವಾಗಿದೆ. ಬಯೋಮೆಟ್ರಿಕ್ ಪೂರ್ಣಗೊಳಿಸದ ಗ್ರಾಹಕರ ಸಬ್ಸಿಡಿ ಹಣ ನೇರ ನಗದು ವರ್ಗಾವಣೆ (DBT) ಮೂಲಕ ಖಾತೆಗೆ ಜಮೆಯಾಗುವುದು ಸ್ಥಗಿತಗೊಳ್ಳಲಿದೆ.
SBI ATM & ಉಚಿತ ವಹಿವಾಟು ಮಿತಿ ಬದಲಾವಣೆ:
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ತನ್ನ ಎಟಿಎಂ ಬಳಕೆಯ ಉಚಿತ ವಹಿವಾಟುಗಳ ಮಿತಿಯಲ್ಲಿ ಹೊಸ ಮಾರ್ಗಸೂಚಿಗಳನ್ನು ಜಾರಿಗೆ ತಂದಿದೆ. ಇತರ ಬ್ಯಾಂಕ್‌ಗಳ ಎಟಿಎಂಗಳನ್ನು ಉಚಿತವಾಗಿ ಬಳಸುವ ಮಾಸಿಕ ಮಿತಿಯಲ್ಲಿ ಬದಲಾವಣೆಗಳನ್ನು ಮಾಡಲಾಗಿದ್ದು, ನಿಗದಿತ ಮಿತಿ ಮೀರಿದರೆ ಹೆಚ್ಚುವರಿ ಶುಲ್ಕ ಅನ್ವಯವಾಗಲಿದೆ.
UPI ವಹಿವಾಟುಗಳಿಗೆ MDR ಅನ್ವಯ (ಅಕ್ಟೋಬರ್ 15 ರಿಂದ):
ಡಿಜಿಟಲ್ ಪಾವತಿಯಲ್ಲಿ ಪಾರದರ್ಶಕತೆ ತರಲು ಆಯ್ದ ವ್ಯಾಪಾರಿ (Merchant) ಆಧಾರಿತ UPI ವಹಿವಾಟುಗಳಿಗೆ ಅಕ್ಟೋಬರ್ 15 ರಿಂದ MERCHANT DISCOUNT RATE (MDR) ಅನ್ವಯವಾಗಲಿದೆ.
ಬಲ್ಕ್ FD & NPS ಖಾತೆ ತೆರೆಯುವ ಶುಲ್ಕ:
ಬಲ್ಕ್ ಎಫ್‌ಡಿ (Bulk FD): ₹3 ಕೋಟಿಗೂ ಹೆಚ್ಚಿನ ಬಲ್ಕ್ ಡೆಪಾಸಿಟ್‌ಗಳಿಗೆ ಬಡ್ಡಿದರ ಪ್ರಕಟಿಸುವ ಪ್ರಕ್ರಿಯೆಯಲ್ಲಿ ಆರ್‌ಬಿಐ ಹೊಸ ನಿಯಮಗಳನ್ನು ಜಾರಿಗೆ ತಂದಿದೆ.
ಎನ್‌ಪಿಎಸ್ (NPS): ರಾಷ್ಟ್ರೀಯ ಪಿಂಚಣಿ ಯೋಜನೆಯ (NPS) ಹೊಸ ಖಾತೆ ತೆರೆಯುವ ಶುಲ್ಕ ಹಾಗೂ ಸಬ್‌ಸ್ಕ್ರಿಪ್ಷನ್ ನಿಯಮಗಳಲ್ಲಿ ಮಾರ್ಪಾಡು ಮಾಡಲಾಗಿದೆ.
NRI ಆಸ್ತಿ ಖರೀದಿ, TDS ಮತ್ತು TAN ನಿಯಮಗಳು:
ಅನಿವಾಸಿ ಭಾರತೀಯರು (NRI) ಭಾರತದಲ್ಲಿ ಆಸ್ತಿ ಖರೀದಿ ಮಾಡುವಾಗ ವಿಧಿಸಲಾಗುವ ಟಿಡಿಎಸ್ (TDS) ಮತ್ತು ಟ್ಯಾನ್ (TAN) ನಿಯಮಗಳನ್ನು ಮತ್ತಷ್ಟು ಬಿಗಿಗೊಳಿಸಲಾಗಿದೆ. ತೆರಿಗೆ ವಂಚನೆ ತಡೆಯಲು ಕಟ್ಟುನಿಟ್ಟಿನ ಚೌಕಟ್ಟು ರೂಪಿಸಲಾಗಿದೆ.
ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿದರ ಯಥಾಸ್ಥಿತಿ:
ಪಿಪಿಎಫ್ (PPF), ಎನ್‌ಎಸ್‌ಸಿ (NSC), ಸುಕನ್ಯಾ ಸಮೃದ್ಧಿ ಯೋಜನೆ (SSY) ಸೇರಿದಂತೆ ಕೇಂದ್ರ ಸರ್ಕಾರದ ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿದರಗಳಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ. ಪ್ರಸಕ್ತ ತ್ರೈಮಾಸಿಕದಲ್ಲೂ ಬಡ್ಡಿದರಗಳು ಯಥಾಸ್ಥಿತಿಯಲ್ಲಿ ಮುಂದುವರಿಯಲಿವೆ.
ಇದನ್ನೂ ಓದಿ: ಬೀದಿ ನಾಯಿಗಳ ಉಪಟಳಕ್ಕೆ ವಿಚಿತ್ರ ಪ್ರತಿಭಟನೆ: ಅಧಿಕಾರಿಯ ಮೇಜಿನ ಮೇಲೆಯೇ ನಾಯಿಗಳನ್ನು ತಂದಿಟ್ಟ ವ್ಯಕ್ತಿ
ಮೊಬೈಲ್ ರೀಚಾರ್ಜ್ ಗ್ರಾಹಕರಿಗೆ ಹೆಚ್ಚಿನ ಆಯ್ಕೆ:
ಟೆಲಿಕಾಂ ವಲಯದಲ್ಲೂ ಹೊಸ ನಿಯಮ ಬಂದಿದ್ದು, ಇನ್ಮುಂದೆ ಮೊಬೈಲ್ ರೀಚಾರ್ಜ್ ಮಾಡಿಸಿಕೊಳ್ಳುವಾಗ ಗ್ರಾಹಕರಿಗೆ ತಮ್ಮ ಅಗತ್ಯಕ್ಕೆ ತಕ್ಕಂತೆ ಪ್ಲಾನ್‌ಗಳನ್ನು ಆಯ್ಕೆ ಮಾಡಿಕೊಳ್ಳಲು ಹೆಚ್ಚಿನ ಆಪ್ಷನ್‌ಗಳು ಹಾಗೂ ನಮ್ಯತೆ ದೊರೆಯಲಿದೆ.