ಶ್ರಾವಣ ಮಾಸದ ಕೃಷ್ಣ ಪಕ್ಷದ ಅಷ್ಟಮಿ ತಿಥಿಯಂದು ಜಗದ್ಗುರು ಶ್ರೀಕೃಷ್ಣನ ಜನ್ಮದಿನವನ್ನು “ಕೃಷ್ಣ ಜನ್ಮಾಷ್ಟಮಿ” (Krishna Janmashtami) ಅಥವಾ ಶ್ರೀಕೃಷ್ಣ ಜಯಂತಿ ಎಂದು ನಾಡಿನಾದ್ಯಂತ ಅತ್ಯಂತ ವಿಜೃಂಭಣೆಯಿಂದ ಆಚರಿಸಲಾಗುತ್ತದೆ. ಈ ಬಾರಿ ಜನ್ಮಾಷ್ಟಮಿ ಆಚರಣೆಯ ದಿನಾಂಕ ಮತ್ತು ಪೂಜೆ ಸಲ್ಲಿಸುವ ಧಾರ್ಮಿಕ ಕ್ರಮಗಳ ಕುರಿತ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಕೃಷ್ಣ ಜನ್ಮಾಷ್ಟಮಿ ಯಾವಾಗ?
ಹಿಂದೂ ಪಂಚಾಂಗದ ಪ್ರಕಾರ, 2026 ರ ಶ್ರಾವಣ ಮಾಸದ ಕೃಷ್ಣ ಪಕ್ಷದ ಅಷ್ಟಮಿ ತಿಥಿಯು ಸೆಪ್ಟೆಂಬರ್ 3ರ ಗುರುವಾರದಂದು ಆರಂಭವಾಗಲಿದ್ದು, ಸೆಪ್ಟೆಂಬರ್ 4ರ ಶುಕ್ರವಾರದಂದು ಕೃಷ್ಣ ಜನ್ಮಾಷ್ಟಮಿಯನ್ನು ಶ್ರದ್ಧಾಭಕ್ತಿಗಳಿಂದ ಆಚರಿಸಲಾಗುತ್ತದೆ.
ಅಷ್ಟಮಿ ತಿಥಿ ಆರಂಭ: ಸೆಪ್ಟೆಂಬರ್ 3, 2026 (ಗುರುವಾರ)
ಅಷ್ಟಮಿ ತಿಥಿ ಮುಕ್ತಾಯ: ಸೆಪ್ಟೆಂಬರ್ 4, 2026 (ಶುಕ್ರವಾರ)
ನಿಶಿತಾ ಕಾಲ ಪೂಜೆ (ರಾತ್ರಿ ಪೂಜೆ): ಭಗವಾನ್ ಶ್ರೀಕೃಷ್ಣನು ಮಧ್ಯರಾತ್ರಿ ಜನಿಸಿದ ಹಿನ್ನೆಲೆಯಲ್ಲಿ ಸೆಪ್ಟೆಂಬರ್ 3 ರ ರಾತ್ರಿ 12;00 ರಿಂದ 12;45 ರವರೆಗಿನ ಸಮಯವನ್ನು ಪೂಜೆಗೆ ಅತ್ಯಂತ ಶುಭವೆಂದು ಪರಿಗಣಿಸಲಾಗಿದೆ.
ಇದನ್ನೂ ಓದಿ: ಜನ್ಮಾಷ್ಟಮಿ 2026: ಕೃಷ್ಣನ ಕೃಪೆಯ ನವಿಲುಗರಿ ವಿನ್ಯಾಸದ ಸೀರೆಗಳ ಟ್ರೆಂಡಿ ಕಲೆಕ್ಷನ್ಸ್
ಮನೆಯಲ್ಲಿ ಮಾಡಬೇಕಾದ ಪೂಜಾ ಕ್ರಮ:
ಶುದ್ಧತೆ ಮತ್ತು ಸಂಕಲ್ಪ: ಜನ್ಮಾಷ್ಟಮಿಯ ದಿನ ಬೆಳಗಿನ ಜಾವವೇ ಎದ್ದು ಅಭ್ಯಂಜನ ಸ್ನಾನ ಮಾಡಿ, ಮನೆ ಹಾಗೂ ಪೂಜಾ ಗೃಹವನ್ನು ಹೂವು, ಮಾವಿನ ಎಲೆಗಳಿಂದ ಅಲಂಕರಿಸಿ. ದಿನವಿಡೀ ಉಪವಾಸ ವ್ರತ ಮಾಡುವ ಸಂಕಲ್ಪ ಕೈಗೊಳ್ಳಿ.
ಬಾಲಕೃಷ್ಣನ ಪ್ರತಿಷ್ಠಾಪನೆ: ಪೂಜಾ ಪೀಠದ ಮೇಲೆ ಹೊಸ ವಸ್ತ್ರವನ್ನು ಹಾಸಿ, ಶ್ರೀಕೃಷ್ಣನ ವಿಗ್ರಹ ಅಥವಾ ಛಾಯಾಚಿತ್ರವನ್ನು ಸ್ಥಾಪಿಸಿ. ಪೀಠದ ಮುಂದೆ ಮಗುವಿನ ರೂಪದ ಬಾಲಕೃಷ್ಣನ ಪುಟ್ಟ ಹೆಜ್ಜೆಗಳನ್ನು ಹೊಸ್ತಿಲಿಂದ ಪೂಜಾ ಕೋಣೆಯವರೆಗೆ ಬಿಡಿಸುವುದು ವಿಶೇಷ.
ಅಭಿಷೇಕ: ಬಾಲಕೃಷ್ಣನ ಮೂರ್ತಿಗೆ ಹಾಲು, ಮೊಸರು, ತುಪ್ಪ, ಜೇನುತುಪ್ಪ ಹಾಗೂ ಪಂಚಾಮೃತದಿಂದ ಅಭಿಷೇಕ ಮಾಡಿ, ಶುದ್ಧ ನೀರಿನಿಂದ ಪ್ರೋಕ್ಷಿಸಿ ಹೊಸ ವಸ್ತ್ರ ಹಾಗೂ ಆಭರಣಗಳಿಂದ ಅಲಂಕರಿಸಿ.
ಇಷ್ಟದ ನೈವೇದ್ಯ ಅರ್ಪಣೆ: ಶ್ರೀಕೃಷ್ಣನಿಗೆ ಅತ್ಯಂತ ಪ್ರಿಯವಾದ ಬೆಣ್ಣೆ, ಸಕ್ಕರೆ ಅಚ್ಚು, ಅವಲಕ್ಕಿ, ಹಾಲಿನ ಪಾಯಸ, ಚಕ್ಕುಲಿ, ಕೋಡುಬಳೆ ಹಾಗೂ ರಂಗೋಲಿ ತಿನಿಸುಗಳನ್ನು ನೈವೇದ್ಯವಾಗಿ ಅರ್ಪಿಸಬೇಕು.
ತುಳಸಿ ಅರ್ಚನೆ ಹಾಗೂ ಆರತಿ: ಕೃಷ್ಣನಿಗೆ ಪ್ರಿಯವಾದ ತುಳಸಿ ದಳಗಳಿಂದ ‘ಓಂ ನಮೋ ಭಗವತೇ ವಾಸುದೇವಾಯ’ ಮಂತ್ರ ಪಠಿಸುತ್ತಾ ಅರ್ಚನೆ ಮಾಡಿ, ಧೂಪ-ದೀಪ ತೋರಿಸಿ ಮಹಾಮಂಗಳಾರತಿ ಬೆಳಗಬೇಕು.
ಜಾಗರಣೆ ಹಾಗೂ ಪಾರಣೆ: ರಾತ್ರಿ ಕೃಷ್ಣ ಜನನದ ಸಮಯದವರೆಗೆ ಭಜನೆ, ವಿಷ್ಣು ಸಹಸ್ರನಾಮ ಅಥವಾ ಭಾಗವತ ಪಾರಾಯಣ ಮಾಡುತ್ತಾ ಜಾಗರಣೆ ಮಾಡಿ, ಮಧ್ಯರಾತ್ರಿ ಪೂಜೆಯ ನಂತರ ಪ್ರಸಾದ ಸ್ವೀಕರಿಸಿ ವ್ರತ ಸಂಪೂರ್ಣಗೊಳಿಸಬೇಕು.