ಹೈದರಾಬಾದ್: ಐಪಿಎಲ್ 2026ರಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ (SRH) ತಂಡ ತನ್ನ ಮೊದಲ ಹೋಂ ಪಂದ್ಯದಲ್ಲೇ ಭಾರೀ ನಿರಾಶೆ ಅನುಭವಿಸಿದ್ದು, ಲಖ್ನೋ ಸೂಪರ್ ಜೈಂಟ್ಸ್ (LSG) ವಿರುದ್ಧ ಪವರ್‌ಪ್ಲೇನಲ್ಲಿ 22/3ಕ್ಕೆ ಕುಸಿದಿದೆ. ಈ ಪತನಕ್ಕೆ ಪ್ರಮುಖ ಕಾರಣವಾಗಿದ್ದು ಮೊಹಮ್ಮದ್ ಶಮಿ ಅವರ ಸಿಡಿಲಿನ ಬೌಲಿಂಗ್.
2023ರಿಂದ ಐಪಿಎಲ್‌ನಲ್ಲಿ ಪವರ್‌ಪ್ಲೇ ವೇಳೆ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್‌ಗಳ ಪಟ್ಟಿಯಲ್ಲಿ ಮೊಹಮ್ಮದ್ ಶಮಿ ಇದೀಗ ಎರಡನೇ ಸ್ಥಾನಕ್ಕೇರಿದ್ದಾರೆ. 25 ವಿಕೆಟ್‌ಗಳೊಂದಿಗೆ ಟ್ರೆಂಟ್ ಬೌಲ್ಟ್ (32 ವಿಕೆಟ್) ನಂತರ ಶಮಿ ಮಿಂಚುತ್ತಿದ್ದಾರೆ. ಭುವನೇಶ್ವರ್ ಕುಮಾರ್ ಕೂಡ 25 ವಿಕೆಟ್ ಪಡೆದು ಸಮಬಲದಲ್ಲಿದ್ದಾರೆ.
ಶಮಿ ಆರಂಭದಲ್ಲೇ ಡಬಲ್ ಶಾಕ್
ಪಂದ್ಯದ ಮೊದಲ ಓವರ್‌ನಲ್ಲೇ ಅಭಿಷೇಕ್ ಶರ್ಮಾ ಅವರನ್ನು ಡಕ್‌ಗೆ ಔಟ್ ಮಾಡಿದ ಶಮಿ, ಮುಂದಿನ ಬಾಲ್‌ನಲ್ಲಿ ಟ್ರಾವಿಸ್ ಹೆಡ್ ವಿಕೆಟ್ ಪಡೆದು ಎಸ್ಆರ್ಎಚ್ ತಂಡಕ್ಕೆ ಭಾರೀ ಆಘಾತ ನೀಡಿದರು. ಅವರ ಮೂರು ಓವರ್‌ಗಳಲ್ಲಿ ಕೇವಲ 7 ರನ್ ನೀಡಿ 2 ವಿಕೆಟ್ ಪಡೆದ ಪ್ರದರ್ಶನ ಪಂದ್ಯಕ್ಕೆ ತಿರುವು ತಂದಿತು.
ಇದನ್ನೂ ಓದಿ: ಸಿಎಸ್‌ಕೆ ವಿರುದ್ಧ ದಾಖಲೆ ಬರೆದ ಆರ್‌ಸಿಬಿ; ದಾಖಲೆ ಮೇಲೆ ದಾಖಲೆ ಬರೆದ ಆರ್‌ಸಿಬಿ ಬಾಯ್ಸ್
ಎಸ್ಆರ್ಎಚ್ ಬ್ಯಾಟಿಂಗ್ ಕುಸಿತ
ಶಮಿಯ ದಾಳಿಗೆ ಸಾಥ್ ನೀಡಿದ ಪ್ರಿನ್ಸ್ ಯಾದವ್, ಇಶಾನ್ ಕಿಶನ್ ಅವರನ್ನು ಔಟ್ ಮಾಡುವ ಮೂಲಕ ಎಸ್ಆರ್ಎಚ್ ಸಂಕಷ್ಟವನ್ನು ಮತ್ತಷ್ಟು ಗಂಭೀರಗೊಳಿಸಿದರು. ಪವರ್‌ಪ್ಲೇ ಅಂತ್ಯದ ವೇಳೆಗೆ ತಂಡ 22/3ಕ್ಕೆ ಕುಸಿದಿದ್ದು, ಇದು ಐಪಿಎಲ್ ಇತಿಹಾಸದಲ್ಲಿ ನಾಲ್ಕನೇ ಕನಿಷ್ಠ ಪವರ್‌ಪ್ಲೇ ಮೊತ್ತವಾಗಿದೆ.
ಕಡಿಮೆ ಪವರ್‌ಪ್ಲೇ ಸ್ಕೋರ್‌ಗಳ ಪಟ್ಟಿ
ಎಸ್ಆರ್ಎಚ್ ಇತಿಹಾಸದಲ್ಲೇ ಕನಿಷ್ಠ ಪವರ್‌ಪ್ಲೇ ಸ್ಕೋರ್ 14/3 (RR ವಿರುದ್ಧ, 2022). ನಂತರ 20/3 (PBKS, 2021), 21/3 (RR, 2013) ಮತ್ತು ಈಗ 22/3 (LSG, 2026).
ಆರಂಭಿಕ ಪತನದಿಂದ ಮಧ್ಯ ಕ್ರಮದ ಮೇಲೆ ಭಾರೀ ಒತ್ತಡ ಬಿದ್ದಿದ್ದು, ತಂಡ ಮತ್ತೆ ಹಿನ್ನಡೆಯಿಂದ ಹೊರಬರಬೇಕಾದ ಪರಿಸ್ಥಿತಿ ಎದುರಿಸಿದೆ. ಲಿಯಾಮ್ ಲಿವಿಂಗ್‌ಸ್ಟೋನ್ ಸಿಕ್ಸರ್ ಮೂಲಕ ಸ್ವಲ್ಪ ಪ್ರತಿರೋಧ ನೀಡಿದರೂ, ಆರಂಭದ ಆಘಾತ ತಂಡದ ಮೇಲೆ ಪರಿಣಾಮ ಬೀರಿದೆ.
ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್‌ ಮಾಡಿ