ಸ್ಮಿರ್ನಾ (ಡೆಲವೇರ್): ಶಾಲೆಯ ಪ್ರವಾಸದ ಹಣದ (Field Trip Money) ವಿಚಾರವಾಗಿ ಸುಳ್ಳು ಹೇಳಿದ್ದಾಳೆ ಎಂಬ ಕ್ಷುಲ್ಲಕ ಕಾರಣಕ್ಕೆ, ಹೆತ್ತ ತಂದೆಯೇ ತನ್ನ 10 ವರ್ಷದ ಮಗಳನ್ನು ಬೆಲ್ಟ್ನಿಂದ ಹೊಡೆದು ಭೀಕರವಾಗಿ ಕೊಂದಿರುವ ಹೃದಯವಿದ್ರಾವಕ ಕೃತ್ಯ ಅಮೆರಿಕದ ಡೆಲವೇರ್ ರಾಜ್ಯದ ಸ್ಮಿರ್ನಾದಲ್ಲಿ ಬೆಳಕಿಗೆ ಬಂದಿದೆ. ಮೃತ ಬಾಲಕಿಯನ್ನು ಫಾತಿಮಾ ಕೋನ್ ಎಂದು ಗುರುತಿಸಲಾಗಿದ್ದು, ಈ ಹತ್ಯೆಗೆ ಸಂಬಂಧಿಸಿದಂತೆ ಆಕೆಯ ತಂದೆ, 49 ವರ್ಷದ ಬಡಾರಾ ಕೋನ್ (Badara Kone) ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ. ಹಂತಕ ತಂದೆಯು ತನ್ನ ಉಳಿದಿಬ್ಬರು ಮಕ್ಕಳ ಮೇಲೂ ನಿರಂತರವಾಗಿ ದೈಹಿಕ ದೌರ್ಜನ್ಯ ಎಸಗುತ್ತಿದ್ದ ಎಂಬ ಆಘಾತಕಾರಿ ಸತ್ಯ ತನಿಖೆಯಿಂದ ಬಯಲಾಗಿದೆ.
ಡೆಲವೇರ್ ಸ್ಟೇಟ್ ಪೊಲೀಸರು ನೀಡಿದ ಮಾಹಿತಿ ಪ್ರಕಾರ, ಮೇ 28 ರಂದು ಬಾಲಕಿ ಫಾತಿಮಾ ಕೋನ್ ಶವ ಆಕೆಯ ರೂಮಿನಲ್ಲಿ ಪತ್ತೆಯಾಗಿತ್ತು. ಮೇ 27 ರ ರಾತ್ರಿ ಶಾಲೆಯ ಪ್ರವಾಸದ ಹಣದ ವಿಚಾರವಾಗಿ ಫಾತಿಮಾ ಸುಳ್ಳು ಹೇಳಿದ್ದಾಳೆ ಎಂದು ಕೋಪಗೊಂಡ ತಂದೆ ಬಡಾರಾ ಕೋನ್, ಆಕೆಗೆ ಶಿಕ್ಷೆ ನೀಡುವ ನೆಪದಲ್ಲಿ ಚರ್ಮದ ಬೆಲ್ಟ್ನಿಂದ ಅತಿ ಅಮಾನುಷವಾಗಿ ಥಳಿಸಿದ್ದಾನೆ. ಈ ವೇಳೆ ತೀವ್ರ ಹಲ್ಲೆಯಿಂದಾಗಿ ಬಾಲಕಿ ಕೆಳಗೆ ಬಿದ್ದು ತಲೆಗೆ ಬಲವಾದ ಪೆಟ್ಟು ಬಿದ್ದಿದೆ. ತದನಂತರ ಆಕೆಯ ಸಹೋದರರು ಆಕೆಯನ್ನು ಎಬ್ಬಿಸಿ ಹಾಸಿಗೆಯ ಮೇಲೆ ಮಲಗಿಸಿದ್ದರು.
ಬಾಲಕಿಯ ಸಹೋದರರು ಪೊಲೀಸರಿಗೆ ನೀಡಿರುವ ಹೇಳಿಕೆಯ ಪ್ರಕಾರ, ತಂದೆಯ ಭೀಕರ ಹಲ್ಲೆಯ ನಂತರ ಫಾತಿಮಾಳ ಬಾಯಿಯಿಂದ ರಕ್ತ ಬರುತ್ತಿತ್ತು ಮತ್ತು ಆಕೆ ಅರೆಪ್ರಜ್ಞಾವಸ್ಥೆಯಲ್ಲಿದ್ದಳು. ಈ ಕ್ರೂರ ಘಟನೆ ನಡೆಯುವಾಗ ಬಡಾರಾ ಕೋನ್ ಪತ್ನಿ ಹಾಗೂ ಇಲಾಖೆಯ ಇತರ ಮಕ್ಕಳು ಸಹ ಅಲ್ಲೇ ಇದ್ದರು ಎನ್ನಲಾಗಿದೆ. ಮಾರನೇ ದಿನ ಬೆಳಗ್ಗೆ ಫಾತಿಮಾ ಹಾಸಿಗೆಯಲ್ಲೇ ಮೃತಪಟ್ಟ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾಳೆ. ಆದರೆ ಆಕೆ ಮೃತಪಟ್ಟಿದ್ದರೂ ಕುಟುಂಬದವರಾಗಲಿ ಅಥವಾ ತಂದೆಯಾಗಲಿ ತಕ್ಷಣವೇ ತುರ್ತು ಸಹಾಯವಾಣಿ 911 ಗೆ ಕರೆ ಮಾಡಿ ಪೊಲೀಸರಿಗೆ ಮಾಹಿತಿ ನೀಡಿರಲಿಲ್ಲ. ಸಾಕಷ್ಟು ಸಮಯದ ಬಳಿಕ ಪೊಲೀಸರಿಗೆ ವಿಷಯ ತಲುಪಿದೆ.
ಬಾಲಕಿಯ ಮರಣೋತ್ತರ ಪರೀಕ್ಷೆಯ ವರದಿಯಲ್ಲಿ, ತೀವ್ರ ದೈಹಿಕ ದೌರ್ಜನ್ಯ ಹಾಗೂ ತಲೆಗೆ ಬಿದ್ದ ಬಲವಾದ ಆಘಾತದಿಂದಲೇ ಬಾಲಕಿ ಸಾವನ್ನಪ್ಪಿರುವುದು ದೃಢಪಟ್ಟಿದೆ. ಹೀಗಾಗಿ ಇದನ್ನು ಹತ್ಯೆ ಎಂದು ಪರಿಗಣಿಸಿ, ಜೂನ್ 1 ರಂದು ಆರೋಪಿ ತಂದೆಯ ಮೇಲೆ ‘ಸೆಕೆಂಡ್ ಡಿಗ್ರಿ ಮರ್ಡರ್’ ಕೇಸ್ ದಾಖಲಿಸಲಾಗಿದೆ.
ಇದನ್ನೂ ಓದಿ: ಸೂಟ್ಕೇಸ್ನಲ್ಲಿ ಪತ್ತೆಯಾಯಿತು ಪ್ರೇಯಸಿಯ ಬೆತ್ತಲೆ ಹೆಣ!: ಅಮೆರಿಕದಲ್ಲಿ ನಡುಕ ಹುಟ್ಟಿಸಿದ ಲವ್ ಸ್ಟೋರಿ
ಮೃತ ಬಾಲಕಿಯ 11 ಮತ್ತು 15 ವರ್ಷದ ಇಬ್ಬರು ಗಂಡು ಮಕ್ಕಳನ್ನು ಪೊಲೀಸರು ತಪಾಸಣೆ ನಡೆಸಿದಾಗ, ಅವರಿಗೂ ತಂದೆ ನಿರಂತರವಾಗಿ ಬೆಲ್ಟ್ನಿಂದ ಹೊಡೆಯುತ್ತಿದ್ದ ಗಾಯದ ಗುರುತುಗಳು ಪತ್ತೆಯಾಗಿವೆ. ಕಳೆದ ಒಂದು ವರ್ಷದಿಂದ ಶಿಸ್ತಿನ ಹೆಸರಿನಲ್ಲಿ ಈ ಪಾಪಿ ತಂದೆ ಮಕ್ಕಳಿಗೆ ಚಿತ್ರಹಿಂಸೆ ನೀಡುತ್ತಿದ್ದನು. ಸದ್ಯ ಆರೋಪಿ ಬಡಾರಾ ಕೋನ್ನನ್ನು ಬಂಧಿಸಲಾಗಿದ್ದು, ನ್ಯಾಯಾಲಯವು ಆತನಿಗೆ 1,80,000 ಡಾಲರ್ (ಸುಮಾರು 1.5 ಕೋಟಿ ರೂಪಾಯಿ) ನಗದು ಬಾಂಡ್ ವಿಧಿಸಿ ಜೈಲಿಗಟ್ಟಿದೆ.
ದೇಶದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
