ಭಾರತದಲ್ಲಿ ಮಧುಮೇಹ ರೋಗಿಗಳಿಗೆ ನೆರವಾಗುವ ನಿಟ್ಟಿನಲ್ಲಿ ಡೆನ್ಮಾರ್ಕ್ ಮೂಲದ ಪ್ರಖ್ಯಾತ ಔಷಧ ತಯಾರಿಕಾ ಸಂಸ್ಥೆ ‘ನೊವೊ ನೊರ್ಡಿಸ್ಕ್’ (Novo Nordisk), ‘ಅವಿಕ್ಲಿ’ (Awiqli – insulin icodec) ಹೆಸರಿನ ಜಗತ್ತಿನ ಮೊದಲ ವಾರಕ್ಕೊಮ್ಮೆ ತೆಗೆದುಕೊಳ್ಳುವ ‘ಬಾಸಲ್ ಇನ್ಸುಲಿನ್’ ಅನ್ನು ಭಾರತೀಯ ಮಾರುಕಟ್ಟೆಗೆ ಅಧಿಕೃತವಾಗಿ ಬಿಡುಗಡೆ ಮಾಡಿದೆ. ಈ ಕ್ರಾಂತಿಕಾರಿ ಆವಿಷ್ಕಾರದಿಂದಾಗಿ ರೋಗಿಗಳು ವರ್ಷಕ್ಕೆ 365 ಬಾರಿ ಇಂಜೆಕ್ಷನ್ ತೆಗೆದುಕೊಳ್ಳುವ ಬದಲಿಗೆ, ಕೇವಲ 52 ಬಾರಿ ಚುಚ್ಚಿಸಿಕೊಂಡರೆ ಸಾಕಾಗುತ್ತದೆ!
ಭಾರತವು ಈ ಅತ್ಯಾಧುನಿಕ ಚಿಕಿತ್ಸೆಯನ್ನು ಪಡೆದ ವಿಶ್ವದ 6ನೇ ದೇಶ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ದಿನಾಲೂ ಇಂಜೆಕ್ಷನ್ ತೆಗೆದುಕೊಳ್ಳಬೇಕೆಂಬ ಪ್ರಾಣಭಯದಿಂದಲೇ ಶೇ. 25ಕ್ಕೂ ಹೆಚ್ಚು ರೋಗಿಗಳು ಇನ್ಸುಲಿನ್ ಚಿಕಿತ್ಸೆಯನ್ನು ಮುಂದೂಡುತ್ತಿದ್ದರು. ಈಗ ಈ ಸಮಸ್ಯೆಗೆ ‘ಅವಿಕ್ಲಿ’ ಶಾಶ್ವತ ಪರಿಹಾರ ನೀಡಲಿದೆ.
ಬೆಲೆ ಎಷ್ಟು? ಮಧ್ಯಮ ವರ್ಗಕ್ಕೂ ಕೈಗೆಟುಕುವ ದರ:
ಭಾರತದಲ್ಲಿ ಮಧುಮೇಹಿಗಳ ಸಂಖ್ಯೆ ಹೆಚ್ಚಿರುವುದರಿಂದ ಕಂಪನಿಯು ಇದನ್ನು ಭಾರಿ ಪ್ರಮಾಣದಲ್ಲಿ ಮಾರಾಟ ಮಾಡುವ (Volume Play) ಉದ್ದೇಶದೊಂದಿಗೆ ಅತ್ಯಂತ ಕಡಿಮೆ ಬೆಲೆಯನ್ನು ನಿಗದಿಪಡಿಸಿದೆ.
1 ಮಿಲಿ ಪೆನ್ (700 ಯೂನಿಟ್ ಇನ್ಸುಲಿನ್): 2,611 ರೂಪಾಯಿ.
3 ಮಿಲಿ ಪೆನ್ (2,100 ಯೂನಿಟ್ ಇನ್ಸುಲಿನ್): 7,833 ರೂಪಾಯಿ.
ವಾರದ ಲೆಕ್ಕಾಚಾರ: ಒಬ್ಬ ರೋಗಿಗೆ ವಾರಕ್ಕೆ ಸರಾಸರಿ 70 ಯೂನಿಟ್ ಇನ್ಸುಲಿನ್ ಅಗತ್ಯವಿದ್ದರೆ, ಅದರ ವೆಚ್ಚ ವಾರಕ್ಕೆ ಕೇವಲ 261 ರಿಂದ 263 ರೂಪಾಯಿ ಆಗುತ್ತದೆ. ಇದು ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ದೈನಂದಿನ ಇನ್ಸುಲಿನ್ಗಳಿಗಿಂತಲೂ ಅಗ್ಗವಾಗಿದೆ ಎಂದು ಕಂಪನಿ ತಿಳಿಸಿದೆ.
ಇದರ ಹಿಂದಿರುವ ವೈಜ್ಞಾನಿಕ ಕಾರಣವೇನು?
ದೆಹಲಿಯ ಇಂದ್ರಪ್ರಸ್ಥ ಅಪೊಲೊ ಆಸ್ಪತ್ರೆಯ ಖ್ಯಾತ ಅಂತಃಸ್ರಾವಶಾಸ್ತ್ರಜ್ಞ (Endocrinologist) ಡಾ. ಎಸ್.ಕೆ. ವಾಂಗ್ನೂ ಅವರ ಪ್ರಕಾರ, ಈ ಹೊಸ ಇನ್ಸುಲಿನ್ ಮೂರು ಪ್ರಮುಖ ಲಾಭಗಳನ್ನು ಹೊಂದಿದೆ: ಸೌಕರ್ಯ, ದಕ್ಷತೆ ಮತ್ತು ಸುರಕ್ಷತೆ.
ಹೈಲಿ ಕಾನ್ಸಂಟ್ರೇಟೆಡ್ (Highly Concentrated): ಈ ‘ಅವಿಕ್ಲಿ’ ಇನ್ಸುಲಿನ್ ತೀವ್ರ ಸಾಂದ್ರತೆಯನ್ನು ಹೊಂದಿದೆ (ಪ್ರತಿ ಮಿಲಿಗೆ 700 ಯೂನಿಟ್ಗಳು). ರೋಗಿಯು ವಾರಕ್ಕೆ ಬೇಕಾಗುವ ಒಟ್ಟು ಡೋಸ್ ಅನ್ನು ಒಂದೇ ಬಾರಿಗೆ ಇಂಜೆಕ್ಟ್ ಮಾಡಿಕೊಂಡಾಗ, ದೇಹವು ಅದನ್ನು ಅತ್ಯಂತ ನಿಧಾನವಾಗಿ ಹಾಗೂ ಸ್ಥಿರವಾಗಿ 7 ದಿನಗಳ ಕಾಲ ಹೀರಿಕೊಳ್ಳುತ್ತದೆ.
ಹೈಪೋಗ್ಲೈಸೀಮಿಯಾ ಅಪಾಯವಿಲ್ಲ: ದಿನನಿತ್ಯ ಇನ್ಸುಲಿನ್ ತೆಗೆದುಕೊಳ್ಳುವಾಗ ದಿಢೀರನೆ ರಕ್ತದಲ್ಲಿ ಸಕ್ಕರೆ ಅಂಶ ಕುಸಿಯುವ (Hypoglycaemia) ಅಪಾಯವಿರುತ್ತದೆ. ಆದರೆ ‘ಅವಿಕ್ಲಿ’ ಇನ್ಸುಲಿನ್ ಇಡೀ ವಾರ ಸಮಾನವಾಗಿ ಕೆಲಸ ಮಾಡುವುದರಿಂದ ರಕ್ತದಲ್ಲಿನ ಶುಗರ್ ಮಟ್ಟ ಇದ್ದಕ್ಕಿದ್ದಂತೆ ಕುಸಿಯುವುದಿಲ್ಲ. ಇದು ಅತ್ಯಂತ ಸುರಕ್ಷಿತವಾಗಿದೆ.
ವೈದ್ಯರಿಗೂ ಸುಲಭ: ದಿನಾಲೂ ಶುಗರ್ ಪರಿಶೀಲಿಸಿ ಮೂರು ದಿನಕ್ಕೊಮ್ಮೆ ಡೋಸ್ ಬದಲಿಸುವ ಬದಲು, ವೈದ್ಯರು ವಾರಕ್ಕೊಮ್ಮೆ ಅಥವಾ 15 ದಿನಕ್ಕೊಮ್ಮೆ ರೋಗಿಯ ಆರೋಗ್ಯ ಪರಿಶೀಲಿಸಿ ಡೋಸ್ ನಿರ್ಧರಿಸಬಹುದು. ‘ONWARDS’ ಕ್ಲಿನಿಕಲ್ ಪ್ರಯೋಗಗಳಲ್ಲಿ ಇದು ಸಕ್ಕರೆ ಪ್ರಮಾಣವನ್ನು (HbA1c) ಅತ್ಯುತ್ತಮವಾಗಿ ನಿಯಂತ್ರಣದಲ್ಲಿಟ್ಟಿರುವುದು ಸಾಬೀತಾಗಿದೆ.
ಇದನ್ನೂ ಓದಿ: ಬೆಳಿಗ್ಗಿನ ಚಹಾಕ್ಕೆ ಸಕ್ಕರೆ ಬದಲು ಒಂದು ತುಂಡು ಬೆಲ್ಲ ಹಾಕಿ ನೋಡಿ; ನಿಮ್ಮ ಆರೋಗ್ಯಕ್ಕಿದೆ ಹತ್ತಾರು ಲಾಭ
ಭಾರತದಲ್ಲಿ ಮಧುಮೇಹದ ಭೀಕರತೆ
ಐಸಿಎಂಆರ್ (ICMR) ವರದಿಯ ಪ್ರಕಾರ ಭಾರತದಲ್ಲಿ ಸದ್ಯ 10.1 ಕೋಟಿಗೂ ಹೆಚ್ಚು ಮಧುಮೇಹ ರೋಗಿಗಳಿದ್ದಾರೆ ಹಾಗೂ 13.6 ಕೋಟಿ ಜನ ಪ್ರಿ-ಡಯಾಬಿಟಿಸ್ (ಮಧುಮೇಹದ ಮುನ್ನ ಲಕ್ಷಣ) ಹಂತದಲ್ಲಿದ್ದಾರೆ. ಆದಾಗ್ಯೂ, ಇಂಜೆಕ್ಷನ್ ಭೀತಿಯಿಂದಾಗಿ ದೇಶದಲ್ಲಿ ಕೇವಲ 60 ರಿಂದ 70 ಲಕ್ಷ ಜನ ಮಾತ್ರ ಇನ್ಸುಲಿನ್ ತೆಗೆದುಕೊಳ್ಳುತ್ತಿದ್ದಾರೆ. ರೋಗಿಗಳು ಇನ್ಸುಲಿನ್ ಆರಂಭಿಸುವುದನ್ನು ಸರಾಸರಿ 7 ರಿಂದ 9 ವರ್ಷಗಳ ಕಾಲ ಮುಂದೂಡುತ್ತಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಹದಗೆಡಿಸುತ್ತಿದೆ. ಈ ಎಲ್ಲಾ ಆತಂಕಗಳಿಗೆ ಬ್ರೇಕ್ ಹಾಕಲಿರುವ ನೊವೊ ನೊರ್ಡಿಸ್ಕ್ ಸಂಸ್ಥೆಯ ಈ ‘ಒಂದು ವಾರದ ಇನ್ಸುಲಿನ್ ಪೆನ್’, ಭಾರತದ ವೈದ್ಯಕೀಯ ಇತಿಹಾಸದಲ್ಲೇ ಅತ್ಯಂತ ಮಹತ್ವದ ಮೈಲಿಗಲ್ಲಾಗಲಿದೆ.
ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ