ದೆಹಲಿ : ರಾಷ್ಟ್ರೀಯ ಸ್ವಯಂಸೇವಕ ಸಂಘದ (RSS) ಸರಸಂಘಚಾಲಕ ಮೋಹನ್ ಭಾಗವತ್ ಅವರು ಅಮೆರಿಕ ಪ್ರವಾಸ ಕೈಗೊಳ್ಳಲು ದಿನಗಣನೆ ಆರಂಭವಾಗಿರುವ ಬೆನ್ನಲ್ಲೇ, ಅಮೆರಿಕದ ಅಂತಾರಾಷ್ಟ್ರೀಯ ಧಾರ್ಮಿಕ ಸ್ವಾತಂತ್ರ್ಯ ಆಯೋಗ (USCIRF) ಪ್ರಮುಖ ರಾಜತಾಂತ್ರಿಕ ಹೇಳಿಕೆಯೊಂದನ್ನು ನೀಡಿದೆ. ಆರೆಸ್ಸೆಸ್ ಮುಖಂಡರಿಗೆ ಯಾವುದೇ ರಾಜತಾಂತ್ರಿಕ ಮರ್ಯಾದೆ ಅಥವಾ ಉನ್ನತ ಮಟ್ಟದ ಭೇಟಿಗಳಿಗೆ ಅವಕಾಶ ನೀಡಬಾರದು ಹಾಗೂ ಧಾರ್ಮಿಕ ಸ್ವಾತಂತ್ರ್ಯ ಉಲ್ಲಂಘನೆ ಆರೋಪದಡಿಯಲ್ಲಿ ಆರೆಸ್ಸೆಸ್ ಸದಸ್ಯರ ಮೇಲೆ ನಿರ್ಬಂಧ (Sanctions) ಹೇರಲು ವಾಷಿಂಗ್ಟನ್ಗೆ ಕರೆ ನೀಡಿದೆ.
ಆಗಸ್ಟ್ 29 ರಂದು ನ್ಯೂಯಾರ್ಕ್ನಲ್ಲಿ ‘ಅಮೆರಿಕನ್ ಹಿಂದೂಸ್ ಫಾರ್ ಎಂಗೇಜ್ಮೆಂಟ್ ಅಂಡ್ ಡೈಲಾಗ್’ (AHEAD) ಆಯೋಜಿಸಿರುವ ‘ಯುನಿವರ್ಸಲ್ ಒನ್ನೆಸ್ ಸೆಲೆಬ್ರೇಷನ್ಸ್’ (Universal Oneness Celebrations) ಕಾರ್ಯಕ್ರಮದಲ್ಲಿ ಭಾಗವಹಿಸಲು ಮೋಹನ್ ಭಾಗವತ್ ಅವರು ಅಮೆರಿಕಕ್ಕೆ ಪ್ರಯಾಣಿಸಲಿದ್ದಾರೆ.
USCIRF ಅಧ್ಯಕ್ಷ ಆಸಿಫ್ ಮಹಮೂದ್ ಸೋಶಿಯಲ್ ಮೀಡಿಯಾ ‘X’ ನಲ್ಲಿ ಪೋಸ್ಟ್ ಮಾಡಿದ್ದು, ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಆರೆಸ್ಸೆಸ್ ಸದಸ್ಯರಾಗಿದ್ದಾರೆ ಎಂದು ಉಲ್ಲೇಖಿಸಿದ್ದಾರೆ. ಅಲ್ಲದೆ, ಆರೆಸ್ಸೆಸ್ ಸಂಸ್ಥೆಯು ಧಾರ್ಮಿಕ ಅಲ್ಪಸಂಖ್ಯಾತರಾದ ಕ್ರಿಶ್ಚಿಯನ್ ಮತ್ತು ಮುಸ್ಲಿಮರ ಮೇಲೆ ದಾಳಿ ನಡೆಸುವ ಅಂಗಸಂಸ್ಥೆಗಳನ್ನು ಹೊಂದಿರುವ ಮಾತೃಸಂಸ್ಥೆಯಾಗಿದೆ ಎಂದು ಆರೋಪಿಸಿದ್ದಾರೆ.
ಇದನ್ನೂ ಓದಿ: ಖಾಂಡ್ವಾದಲ್ಲಿ ವಿನೂತನ ಪ್ರತಿಭಟನೆ: ಶ್ವಾನದ ವೇಷದಲ್ಲೇ ಜಿಲ್ಲಾಧಿಕಾರಿ ಕಚೇರಿಗೆ ಬಂದ ವ್ಯಕ್ತಿ
ಉನ್ನತ ಸಭೆ ಹಾಗೂ ರಾಜತಾಂತ್ರಿಕ ಮರ್ಯಾದೆಗೆ ವಿರೋಧ:
ಆಯೋಗದ ಕಮಿಷನರ್ ಜೀನ್ ಮಿಲ್ಸ್ ಮಾತನಾಡಿ, “ಅಮೆರಿಕ ಸರ್ಕಾರವು ಆರೆಸ್ಸೆಸ್ ನಾಯಕರಿಗೆ ಉನ್ನತ ಮಟ್ಟದ ಭೇಟಿಗಳು ಅಥವಾ ರಾಜತಾಂತ್ರಿಕ ಸೌಲಭ್ಯಗಳನ್ನು ನೀಡಬಾರದು. ಬದಲಿಗೆ, ಧಾರ್ಮಿಕ ಸ್ವಾತಂತ್ರ್ಯ ಉಲ್ಲಂಘನೆಗೆ ಕಾರಣರಾದ ಆರೆಸ್ಸೆಸ್ ಸದಸ್ಯರ ಮೇಲೆ ನಿರ್ಬಂಧಗಳನ್ನು ವಿಧಿಸುವತ್ತ ಗಮನಹರಿಸಬೇಕು” ಎಂದು ಆಗ್ರಹಿಸಿದ್ದಾರೆ.
ಸಲಹಾ ಮಂಡಳಿಯ ಸ್ವರೂಪ ಹಾಗೂ ಭಾರತದ ನಿಲುವು:
USCIRF ಒಂದು ಸ್ವತಂತ್ರ ಅಮೆರಿಕನ್ ಫೆಡರಲ್ ಸಲಹಾ ಮಂಡಳಿಯಾಗಿದ್ದು, ಧಾರ್ಮಿಕ ಸ್ವಾತಂತ್ರ್ಯದ ಕುರಿತು ಸರ್ಕಾರಕ್ಕೆ ನೀತಿ ನಿರ್ಧಾರಗಳ ಶಿಫಾರಸುಗಳನ್ನು ಮಾತ್ರ ಮಾಡುತ್ತದೆ. ಇದರ ಶಿಫಾರಸುಗಳು ನೇರವಾಗಿ ಅಮೆರಿಕ ಸರ್ಕಾರದ ಅಧಿಕೃತ ನಿರ್ಬಂಧಗಳಾಗುವುದಿಲ್ಲ.
ಭಾರತ ಸರ್ಕಾರವು ಈ ಆಯೋಗದ ವರದಿಗಳನ್ನು ಈ ಹಿಂದೆಯೇ ತೀವ್ರವಾಗಿ ಖಂಡಿಸಿದ್ದು, ಪೂರ್ವಗ್ರಹ ಪೀಡಿತ ಹಾಗೂ ಏಕಪಕ್ಷೀಯ ಮಾಹಿತಿಗಳ ಆಧಾರದ ಮೇಲೆ ಭಾರತದ ಧಾರ್ಮಿಕ ವಾತಾವರಣವನ್ನು ತಪ್ಪಾಗಿ ಬಿಂಬಿಸಲಾಗುತ್ತಿದೆ ಎಂದು ಪ್ರತ್ಯುತ್ತರ ನೀಡಿದೆ.