ಮುಖೇಶ್ ಅಂಬಾನಿ ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒಗೆ ಅಂತಿಮ ಒಪ್ಪಿಗೆ: ಶೀಘ್ರದಲ್ಲೇ ಮಾರುಕಟ್ಟೆಗೆ ಧುಮುಕಲಿವೆ ಷೇರುಗಳು

ದೆಹಲಿ: ಮುಖೇಶ್ ಅಂಬಾನಿ ನೇತೃತ್ವದ ರಿಲಯನ್ಸ್ ಗ್ರೂಪ್‌ನ ಡಿಜಿಟಲ್ ಹಾಗೂ ಟೆಲಿಕಾಂ ಅಂಗಸಂಸ್ಥೆಯಾದ ಜಿಯೋ ಪ್ಲಾಟ್‌ಫಾರ್ಮ್ಸ್ (Jio Platforms), ತನ್ನ ಬಹುನಿರೀಕ್ಷಿತ ಆರಂಭಿಕ ಸಾರ್ವಜನಿಕ ಕೊಡುಗೆಗೆ (IPO) ಭಾರತೀಯ ಸೆಕ್ಯುರಿಟೀಸ್ ಮತ್ತು ಎಕ್ಸ್ಚೇಂಜ್ ಮಂಡಳಿಯಿಂದ (SEBI) ಅಧಿಕೃತ ಅನುಮೋದನೆ ಪಡೆದುಕೊಂಡಿದೆ.

ಆಗಸ್ಟ್ 28 ರಂದು ಸೆಬಿ ತನ್ನ ಅಂತಿಮ ವೀಕ್ಷಣಾ ವರದಿಯನ್ನು ನೀಡುವ ಮೂಲಕ ಈ ಬೃಹತ್ ಐಪಿಒಗೆ ಹಸಿರು ನಿಶಾನೆ ತೋರಿದೆ. ಜೂನ್ ತಿಂಗಳಿನಲ್ಲಿ ಕಂಪನಿಯು ಕರಡು ಪತ್ರವನ್ನು (DRHP) ಸಲ್ಲಿಸಿತ್ತು. ಜಿಯೋ ಪ್ಲಾಟ್‌ಫಾರ್ಮ್ಸ್ ಈ ಐಪಿಒ ಮೂಲಕ ಸುಮಾರು $3.8 ಬಿಲಿಯನ್‌ನಿಂದ $4 ಬಿಲಿಯನ್ (ಅಂದಾಜು ₹36,000 ಕೋಟಿಯಿಂದ ₹37,700 ಕೋಟಿ) ಹಣವನ್ನು ಮಾರುಕಟ್ಟೆಯಿಂದ ಸಂಗ್ರಹಿಸುವ ನಿರೀಕ್ಷೆಯಿದೆ.

ಐಪಿಒ ಹಂತದಲ್ಲಿ ಕಂಪನಿಯ ಒಟ್ಟು ಮೌಲ್ಯ ಅಂದಾಜು $137 ಬಿಲಿಯನ್ (ಸುಮಾರು ₹12.5 ರಿಂದ ₹13 ಲಕ್ಷ ಕೋಟಿ) ಎಂದು ಅಂದಾಜಿಸಲಾಗಿದೆ. ಕಂಪನಿಯು 27 ಕೋಟಿ ಹೊಸ ಈಕ್ವಿಟಿ ಷೇರುಗಳನ್ನು (Fresh Issue) ಮಾರುಕಟ್ಟೆಗೆ ಬಿಡುಗಡೆ ಮಾಡಲಿದೆ. ಇದು ಐಪಿಒ ನಂತರದ ಒಟ್ಟು ಷೇರು ಬಂಡವಾಳದ ಶೇ. 2.9 ರಷ್ಟಿರಲಿದೆ.

ಈ ಐಪಿಒ ಪೂರ್ಣ ಪ್ರಮಾಣದಲ್ಲಿ ಹೊಸ ಷೇರುಗಳ ಮಾರಾಟದ (Fresh Issue) ಮಾದರಿಯಲ್ಲಿದ್ದು, ಸಂಗ್ರಹವಾಗುವ ಸಂಪೂರ್ಣ ಹಣವು ನೇರವಾಗಿ ಕಂಪನಿಯ ಖಾತೆಗೆ ತಲುಪಲಿದೆ (ಪ್ರವರ್ತಕರು ಅಥವಾ ಹೂಡಿಕೆದಾರರು ಷೇರು ಮಾರಾಟ ಮಾಡಿ ಹಣ ಪಡೆಯುವ ಓಎಫ್‌ಎಸ್ ಮಾದರಿ ಇದಲ್ಲ).

ಇದನ್ನೂ ಓದಿ: ಭಾರತದಲ್ಲಿ ಯುಪಿಐ ಡಿಜಿಟಲ್ ಪಾವತಿ ಕ್ರಾಂತಿ ಕಂಡು ಬೆರಗಾದ ಫ್ರೆಂಚ್ ಮಹಿಳೆ: ಸೋಶಿಯಲ್ ಮೀಡಿಯಾದಲ್ಲಿ ವಿಡಿಯೋ ವೈರಲ್

ಸಂಗ್ರಹಿಸಿದ ಹಣವನ್ನು ಜಿಯೋ ಎಲ್ಲಿ ಬಳಸಲಿದೆ?

ಐಪಿಒ ಮೂಲಕ ಬರುವ ಬೃಹತ್ ಮೊತ್ತದಲ್ಲಿ ಸುಮಾರು ₹27,500 ಕೋಟಿಯನ್ನು ($3.3 ಬಿಲಿಯನ್) ಜಿಯೋದ ಟೆಲಿಕಾಂ ವಿಭಾಗವಾದ ‘ರಿಲಯನ್ಸ್ ಜಿಯೋ ಇನ್ಫೋಕಾಮ್’ ಹೊಂದಿರುವ ಸಾಲವನ್ನು ತೀರಿಸಲು ಬಳಸಲಾಗುವುದು. ಉಳಿದ ಮೊತ್ತವನ್ನು ಕಂಪನಿಯ ದೈನಂದಿನ ಹಾಗೂ ಭವಿಷ್ಯದ ಬಿಸಿನೆಸ್ ವಿಸ್ತರಣೆಯ ಇತರ ಉದ್ದೇಶಗಳಿಗಾಗಿ ಬಳಸಿಕೊಳ್ಳಲಾಗುತ್ತದೆ.

ಇದು ಭಾರತದ ಅತ್ಯಂತ ದೊಡ್ಡ ಐಪಿಒ ಆಗಲಿದೆಯೇ?

ಹೌದು! ₹37,700 ಕೋಟಿ ಮೊತ್ತದ ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಪ್ರಕಟಗೊಂಡರೆ, ಇದು ಭಾರತೀಯ ಶೇರು ಮಾರುಕಟ್ಟೆ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಐಪಿಒ (Largest IPO in India’s History) ಎಂಬ ಸಾರ್ವಕಾಲಿಕ ದಾಖಲೆ ಬರೆಯಲಿದೆ. ಪ್ರಸ್ತುತ ಹುಂಡೈ ಮೋಟಾರ್ ಇಂಡಿಯಾ (₹27,859 ಕೋಟಿ) ಭಾರತದ ಅತಿ ದೊಡ್ಡ ಐಪಿಒ ಎಂಬ ದಾಖಲೆ ಹೊಂದಿದ್ದು, ಎಲ್‌ಐಸಿ, ಪೇಟಿಎಮ್ ಮತ್ತು ಟಾಟಾ ಕ್ಯಾಪಿಟಲ್ ನಂತರದ ಸ್ಥಾನಗಳಲ್ಲಿವೆ. ಶೀಘ್ರದಲ್ಲೇ ಬರಲಿರುವ ರಾಷ್ಟ್ರೀಯ ಶೇರು ವಿನಿಮಯ ಕೇಂದ್ರದ (NSE) ಐಪಿಒ ಮೊತ್ತ ₹30,000 ಕೋಟಿ ಎಂದು ಅಂದಾಜಿಸಲಾಗಿದ್ದು, ಅದಕ್ಕಿಂತಲೂ ಜಿಯೋ ಐಪಿಒ ದೊಡ್ಡದಾಗಿರಲಿದೆ.

ಜಿಯೋ ಪ್ಲಾಟ್‌ಫಾರ್ಮ್ಸ್ ಮೌಲ್ಯ ಮತ್ತು ಹಿನ್ನೆಲೆ

ರಿಲಯನ್ಸ್ ಗ್ರೂಪ್‌ನ ಡಿಜಿಟಲ್, ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI), ಕ್ಲೌಡ್ ಸೇವೆಗಳು ಹಾಗೂ ಟೆಲಿಕಾಂ ವ್ಯವಹಾರಗಳು ಜಿಯೋ ಪ್ಲಾಟ್‌ಫಾರ್ಮ್ಸ್ ಅಡಿಯಲ್ಲೇ ಕಾರ್ಯಾಚರಿಸುತ್ತವೆ. ಜಿಯೋ ಟೆಲಿಕಾಂ ಪ್ರಸ್ತುತ 53.3 ಕೋಟಿಗೂ ಹೆಚ್ಚು ಚಂದಾದಾರರನ್ನು ಹೊಂದಿದ್ದು, ಪ್ರಪಂಚದ ಎರಡನೇ ಅತಿದೊಡ್ಡ ಟೆಲಿಕಾಂ ಕಂಪನಿಯಾಗಿ ಹೊರಹೊಮ್ಮಿದೆ.

ಈ ಕಂಪನಿಯಲ್ಲಿ ಗೂಗಲ್ (7.73% ಶೇರು), ಮೆಟಾ (9.99% ಶೇರು) ಹಾಗೂ ಕೆಕೆಆರ್, ಪ್ರೈವೇಟ್ ಇಕ್ವಿಟಿ ಫಂಡ್‌ಗಳಂತಹ ಜಾಗತಿಕ ದೈತ್ಯ ಸಂಸ್ಥೆಗಳು ಕೋಟ್ಯಂತರ ರೂಪಾಯಿ ಹೂಡಿಕೆ ಮಾಡಿವೆ. ರಿಲಯನ್ಸ್ ಇಂಡಸ್ಟ್ರೀಸ್ ಶೇ. 66.4 ರಷ್ಟು ಪ್ರಮುಖ ಪಾಲು ಹೊಂದಿದೆ.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ