ಪುಣೆ: ಭಾರತದ ಆಟೋಮೊಬೈಲ್ ಮಾರುಕಟ್ಟೆಯಲ್ಲಿ ಜನಪ್ರಿಯ ೭-ಸೀಟರ್ ಎಂಪಿವಿ (MPV) ಆಗಿರುವ ರೆನಾಲ್ಟ್ ಟ್ರೈಬರ್ (Renault Triber) ಸದ್ಯದಲ್ಲೇ ಬಹುನಿರೀಕ್ಷಿತ ಅಪ್ಗ್ರೇಡ್ ಪಡೆಯಲಿದೆ. ಪುಣೆಯಲ್ಲಿ ಇತ್ತೀಚೆಗೆ ಪರೀಕ್ಷಾರ್ಥ ಚಾಲನೆ (Test Drive) ವೇಳೆ ‘ಟರ್ಬೋ-ಸಿಎನ್ಜಿ’ (Turbo-CNG) ಚಾಲಿತ ಟ್ರೈಬರ್ ಕಾರು ಪ್ರತ್ಯಕ್ಷವಾಗಿದೆ.
ಈ ಬೆಳವಣಿಗೆಯಿಂದಾಗಿ, ಕಾರಿನಲ್ಲಿ ಪೂರ್ಣ ಪ್ರಮಾಣದ ಪ್ರಯಾಣಿಕರು ಕುಳಿತಾಗ ಎದುರಾಗುತ್ತಿದ್ದ ಕಡಿಮೆ ಪವರ್ (Underpowered) ಸಮಸ್ಯೆಗೆ ಶೀಘ್ರದಲ್ಲೇ ಪರಿಹಾರ ಸಿಗಲಿದ್ದು, ಸೆಪ್ಟೆಂಬರ್ ೨೦೨೬ ರ ವೇಳೆಗೆ ಭಾರತೀಯ ಮಾರುಕಟ್ಟೆಗೆ ಬಿಡುಗಡೆಯಾಗುವ ನಿರೀಕ್ಷೆಯಿದೆ.
ಪ್ರಸ್ತುತ ಟ್ರೈಬರ್ ಕಾರಿನಲ್ಲಿ 1.0-ಲೀಟರ್ ಸಾಮರ್ಥ್ಯದ (೭೨ hp ಪವರ್ & ೯೬ Nm ಟಾರ್ಕ್) ಎಂಜಿನ್ ಇತ್ತು. ಆದರೆ ನೂತನ ಮಾದರಿಯಲ್ಲಿ ರೆನಾಲ್ಟ್ ಕಿಗರ್ ಹಾಗೂ ನಿಸ್ಸಾನ್ ಮ್ಯಾಗ್ನೈಟ್ನಲ್ಲಿ ಬಳಸಲಾಗುವ ೧.೦-ಲೀಟರ್ ಟರ್ಬೋ-ಪೆಟ್ರೋಲ್ ಎಂಜಿನ್ ಇರಲಿದ್ದು, ಇದು ಬರೋಬ್ಬರಿ ೧೦೦ hp ಪವರ್ ಹಾಗೂ ೧೬೦ Nm ಟಾರ್ಕ್ ಉತ್ಪಾದಿಸಲಿದೆ. ಹಳೆಯ CMF-A ಪ್ಲಾಟ್ಫಾರ್ಮ್ ಬದಲಿಗೆ ಹೊಸ ‘Renault Group Entry Platform’ ಆಧಾರದಲ್ಲಿ ಈ ಕಾರನ್ನು ವಿನ್ಯಾಸಗೊಳಿಸಲಾಗಿದೆ. ಇದು ಟರ್ಬೋ ಎಂಜಿನ್ ಹಾಗೂ ಸಿಎನ್ಜಿ ಕಿಟ್ ಎರಡನ್ನೂ ಅಳವಡಿಸಲು ನೆರವಾಗಲಿದೆ.
ಕಾರಿನ ಬೂಟ್ ಸ್ಪೇಸ್ (Luggage Space) ಹಾಳಾಗದಂತೆ ತಡೆಯಲು, ಬೂಟ್ ಫ್ಲೋರ್ನ ಕೆಳಭಾಗದಲ್ಲಿ ಫ್ಯಾಕ್ಟರಿ ಫಿಟೆಡ್ ಡ್ಯುಯಲ್-ಸಿಲಿಂಡರ್ (Dual Cylinder) ಸಿಎನ್ಜಿ ಲೇಔಟ್ ನೀಡುವ ಸಾಧ್ಯತೆಯಿದೆ.
ಉಳಿದಂತೆ ಕಾರಿನ ಒಳಾಂಗಣ ಹಾಗೂ ಹೊರಭಾಗದ ವಿನ್ಯಾಸದಲ್ಲಿ ಹೆಚ್ಚಿನ ಬದಲಾವಣೆ ಇರುವುದಿಲ್ಲ. ೮-ಇಂಚಿನ ಟಚ್ಸ್ಕ್ರೀನ್, ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್, ೬ ಏರ್ಬ್ಯಾಗ್ಗಳು, ESC ಮತ್ತು ರೇನ್-ಸೆನ್ಸಿಂಗ್ ವೈಪರ್ಗಳಂತಹ ವೈಶಿಷ್ಟ್ಯಗಳು ಮುಂದುವರಿಯಲಿವೆ. ೫-ಸ್ಪೀಡ್ ಮ್ಯಾನುಯಲ್ ಜೊತೆಗೆ CVT ಆಟೋಮ್ಯಾಟಿಕ್ ಆಯ್ಕೆಯೂ ಸಿಗುವ ನಿರೀಕ್ಷೆಯಿದೆ.
ಇದನ್ನೂ ಓದಿ: ಡ್ರೈವಿಂಗ್ ಪ್ರಿಯರಿಗೆ ಶುಭಸುದ್ದಿ: ಮ್ಯಾನುಯಲ್ ಕಾರುಗಳ ತಯಾರಿಕೆ ಮುಂದುವರಿಸಲು ಪೋರ್ಷೆ ನಿರ್ಧಾರ
ಆರ್ಥಿಕ ಹಾಗೂ ಶಕ್ತಿಶಾಲಿ ೭-ಸೀಟರ್ ಕಾರನ್ನು ಎದುರು ನೋಡುತ್ತಿರುವ ಕುಟುಂಬಗಳಿಗೆ ಮತ್ತು ಕ್ಯಾಬ್ ಆಪರೇಟರ್ಗಳಿಗೆ ನೂತನ ಟ್ರೈಬರ್ ಅತ್ಯುತ್ತಮ ಆಯ್ಕೆಯಾಗಲಿದೆ.
ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ