ಭೋಪಾಲ್ : ದಾಟಿಯಾ ಜಿಲ್ಲೆಯಲ್ಲಿ ಅಕ್ರಮ ಮದ್ಯ ತಯಾರಿಕೆ ವಿರುದ್ಧ ನಡೆದ ಪೊಲೀಸ್ ಇಲಾಖೆಯ ಸಂಯುಕ್ತ ದಾಳಿ ಭಾನುವಾರ ಭಾವನಾತ್ಮಕ ತಿರುವು ಪಡೆದುಕೊಂಡಿದೆ. ಬಂಧನದ ಭಯದಿಂದ ಕುಟುಂಬದ ಎಲ್ಲಾ ವಯಸ್ಕರು ಪರಾರಿಯಾಗಿದ್ದು, ಮನೆಯ ಮೇಲ್ಚಾವಣಿಯಲ್ಲಿ ಮೂರು ತಿಂಗಳ ಶಿಶುವೊಂದು ಹಸಿವು ಮತ್ತು ಚಳಿಯಿಂದ ಅಳುತ್ತಿದ್ದುದು ಪೊಲೀಸರ ಗಮನಕ್ಕೆ ಬಂದಿರುವುದು ವರದಿಯಾಗಿದೆ.
ಫುಲ್ರಾ ಕಾಂಜರ್ ಡೇರಾ ಪ್ರದೇಶದಲ್ಲಿ ಅಕ್ರಮ ಮದ್ಯ ತಯಾರಿಕೆಯ ಮಾಹಿತಿ ಮೇರೆಗೆ ಪೊಲೀಸರು ದಾಳಿ ನಡೆಸಿದಾಗ, ನಿವಾಸಿಗಳು ಮನೆಗಳಿಂದ ಓಡಿ ಹೋಗಿದ್ದಾರೆ. ಒಂದು ಮನೆಯಲ್ಲಿ ನಾಲ್ಕು–ಐದು ವರ್ಷದ ಇಬ್ಬರು ಮಕ್ಕಳು, 10 ವರ್ಷದ ಬಾಲಕಿ ಹಾಗೂ ಸರಿಯಾಗಿ ಬಟ್ಟೆಯೂ ಇಲ್ಲದ ಶಿಶು ಒಂಟಿಯಾಗಿ ಉಳಿದಿರುವುದು ಪತ್ತೆಯಾಯಿತು. ಶಿಶು ನಿರಂತರವಾಗಿ ಅಳುತ್ತಿದ್ದುದನ್ನು ನೋಡಿ ಪೊಲೀಸರು ತಕ್ಷಣ ಸ್ಪಂದಿಸಿದರು.
ಇದನ್ನೂ ಓದಿ : Students : ಭದ್ರಾವತಿಯಲ್ಲಿ ಸರ್ಕಾರಿ ಶಾಲೆಯ 59 ವಿದ್ಯಾರ್ಥಿಗಳು ಅಸ್ವಸ್ಥ
ಉಪವಿಭಾಗೀಯ ಪೊಲೀಸ್ ಅಧಿಕಾರಿ ಅಂಕಷಾ ಜೈನ್ ಮಾತನಾಡಿ, ಮನೆಯಿಂದ ಸುಮಾರು ರೂ.30 ಲಕ್ಷ ಮೌಲ್ಯದ ಅಕ್ರಮ ಮದ್ಯ ಹಾಗೂ ಕಚ್ಚಾ ವಸ್ತುಗಳನ್ನು ವಶಪಡಿಸಿ ನಾಶಪಡಿಸಲಾಗಿದೆ ಎಂದು ತಿಳಿಸಿದರು. ಪೊಲೀಸರು ಬರುತ್ತಿದ್ದಂತೆ ಮನೆಯ ವಯಸ್ಕರು ಪರಾರಿಯಾಗಿದ್ದಾರೆ ಎಂದು ಅವರು ಹೇಳಿದರು. 10 ವರ್ಷದ ಬಾಲಕಿ ಶಿಶುವನ್ನು ಸಮಾಧಾನಪಡಿಸಲು ಯತ್ನಿಸಿದರೂ, ಹಸಿವು ಮತ್ತು ಚಳಿಯಿಂದ ಅದು ಶಾಂತವಾಗಲಿಲ್ಲ. ಶಿಶುವಿನ ತಾಯಿಯ ಬಗ್ಗೆ ಕೇಳಿದಾಗ, ‘ಅವರು ಹೋಗಿದ್ದಾರೆ’ ಎಂಬುದಷ್ಟೇ ಬಾಲಕಿ ಹೇಳಿದಳು. ಮಗು ಹಸಿದಿದೆ ಎಂದು ಅರಿತ ಪೊಲೀಸರು ತಕ್ಷಣ ಹಾಲು ಮತ್ತು ಬಿಸಿ ಬಟ್ಟೆ ವ್ಯವಸ್ಥೆ ಮಾಡಿದರು. ಅಂಕಷಾ ಜೈನ್ ಸ್ವತಃ ಮಗುವಿಗೆ ಹಾಲು ಕುಡಿಸಿ, ಬಿಸಿ ಬಟ್ಟೆಯಲ್ಲಿ ಹೊದಿಸಿ ಮಡಿಲಲ್ಲಿ ಇಟ್ಟು ನಿದ್ರಿಸಿದರು. ನಂತರ ಶಿಶುವನ್ನು ಬಾಲಕಿಗೆ ಒಪ್ಪಿಸಿ, ಯಾವುದೇ ಸಮಸ್ಯೆ ಉಂಟಾದರೆ ಪೊಲೀಸರಿಗೆ ಮಾಹಿತಿ ನೀಡುವಂತೆ ಸೂಚಿಸಿದರು.
ಈ ದಾಳಿಯಲ್ಲಿ ಸುಮಾರು 5,400 ಬಲ್ಕ್ ಲೀಟರ್ ದೇಶೀ ಮದ್ಯ, 19,000 ಕೆಜಿ ಜಗ್ಗರಿ ವಾಷ್, 72 ಡ್ರಮ್ಗಳು ಹಾಗೂ ಎರಡು ಮದ್ಯ ತಯಾರಿಕಾ ಯಂತ್ರಗಳನ್ನು ನಾಶಪಡಿಸಲಾಗಿದೆ. ಒಟ್ಟು ವಶಪಡಿಸಿದ ವಸ್ತುಗಳ ಮೌಲ್ಯ ರೂ.30.81 ಲಕ್ಷ ಎಂದು ಅಂದಾಜಿಸಲಾಗಿದೆ. ಅಕ್ರಮ ಮದ್ಯ ಜಾಲವನ್ನು ಭೇದಿಸಿದ ಈ ಕಾರ್ಯಾಚರಣೆಯ ನಡುವೆ, ನಿರಾಶ್ರಿತ ಶಿಶುವನ್ನು ಮಡಿಲಲ್ಲಿ ಹಿಡಿದು ಆರೈಕೆ ಮಾಡಿದ ಹಿರಿಯ ಪೊಲೀಸ್ ಅಧಿಕಾರಿಯ ಮಾನವೀಯ ನಡೆ ಸ್ಥಳೀಯರ ಮೆಚ್ಚುಗೆಗೆ ಪಾತ್ರವಾಯಿತು.
ವೈರಲ್ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
ನಿಮ್ಮ ಆಸುಪಾಸಿನಲ್ಲಿ ನಡೆಯುವಂತಹ ಕಾರ್ಯಕ್ರಮ, ಸಭೆ ಹಾಗೂ ಸಾರ್ವಜನಿಕ ಸಮಸ್ಯೆಗಳ ಬಗ್ಗೆ ಫೋಟೋ ಸಹಿತ G1 News ಗೆ ಮಾಹಿತಿ ಕಳುಹಿಸಿ. ವಾಟ್ಸಪ್: 7353833811, ಇ-ಮೇಲ್- g1newsdpt@gmail.com