ನವದೆಹಲಿ: ವಿಮಾನ ಪ್ರಯಾಣಿಕರಿಗೆ ಮತ್ತೊಂದು ಶಾಕ್ ಎದುರಾಗಿದೆ. ಇಂಡಿಗೋ ಏರ್ಲೈನ್ಸ್ ದೀರ್ಘ ದೂರದ ವಿಮಾನ ಮಾರ್ಗಗಳಿಗೆ ಇಂಧನ ಹೆಚ್ಚುವರಿ ಶುಲ್ಕ (Fuel Surcharge)ವನ್ನು ಭಾರೀ ಪ್ರಮಾಣದಲ್ಲಿ ಏರಿಕೆ ಮಾಡಿದ್ದು, ಅಂತಾರಾಷ್ಟ್ರೀಯ ವಿಮಾನ ಪ್ರಯಾಣ ವೆಚ್ಚ ಹೆಚ್ಚಾಗಿದೆ. ಆದರೆ ಕಡಿಮೆ ದೂರದ ಮಾರ್ಗಗಳಲ್ಲಿ ಸ್ವಲ್ಪ ಮಟ್ಟಿನ ಇಳಿಕೆ ಮಾಡಲಾಗಿದೆ.
ಹಿಂದೆ ಗಲ್ಫ್ ರಾಷ್ಟ್ರಗಳಿಗೆ ₹900 ಇದ್ದ ಹೆಚ್ಚುವರಿ ಶುಲ್ಕವನ್ನು ಈಗ ₹3,000ರಿಂದ ₹5,000ರವರೆಗೆ ಹೆಚ್ಚಿಸಲಾಗಿದೆ. ವಿಶೇಷವಾಗಿ ಯುರೋಪ್ ಮತ್ತು ಬ್ರಿಟನ್ಗೆ ಹೋಗುವ ಪ್ರಯಾಣಿಕರು ಈಗ ₹10,000ವರೆಗೆ ಹೆಚ್ಚುವರಿ ಶುಲ್ಕ ಪಾವತಿಸಬೇಕಾಗಿದೆ. ಚೀನಾ ಮತ್ತು ದಕ್ಷಿಣ ಏಷ್ಯಾ ದೇಶಗಳಿಗೆ ₹3,500–₹5,000 ಹಾಗೂ ಆಫ್ರಿಕಾ ಮಾರ್ಗಗಳಿಗೆ ₹5,000 ಶುಲ್ಕ ನಿಗದಿಯಾಗಿದೆ.
ಹೊಸ ಇಂಧನ ಹೆಚ್ಚುವರಿ ಶುಲ್ಕ (Revised Charges):
ದೇಶೀಯ ಸೇವೆಗಳು:
0–500 ಕಿಮೀ: ₹275
501–1000 ಕಿಮೀ: ₹400
1001–1500 ಕಿಮೀ: ₹600
1501–2000 ಕಿಮೀ: ₹800
2000 ಕಿಮೀ ಮೇಲ್ಪಟ್ಟು: ₹950
ಇದನ್ನೂ ಓದಿ: ಮಂಗಳೂರು-ಕುವೈತ್ ನಡುವೆ ಜಜೀರಾ ವಿಶೇಷ ವಿಮಾನ ಸೇವೆ, 4 ಹೊಸ ನಗರಗಳು ಸೇರ್ಪಡೆ
ಅಂತಾರಾಷ್ಟ್ರೀಯ ಸೇವೆಗಳು:
ಭಾರತೀಯ ಉಪಖಂಡ: ₹900 – ₹2,500
ಗಲ್ಫ್/ಮಧ್ಯಪ್ರಾಚ್ಯ: ₹3,000 – ₹5,000
ದಕ್ಷಿಣ ಏಷ್ಯಾ/ಚೀನಾ: ₹3,500 – ₹5,000
ಆಫ್ರಿಕಾ: ₹5,000
ಗ್ರೀಸ್/ಟರ್ಕಿ: ₹7,500
ಬ್ರಿಟನ್/ಯುರೋಪ್: ₹10,000
ದರ ಏರಿಕೆಗೆ ಕಾರಣವೇನು?
ವಿಮಾನ ಟಿಕೆಟ್ ದರ ಏರಿಕೆಗೆ ಪ್ರಮುಖ ಕಾರಣ ಏರ್ಕ್ರಾಫ್ಟ್ ಟರ್ಬೈನ್ ಫ್ಯುಯೆಲ್ (ATF) ಬೆಲೆ ಏರಿಕೆಯಾಗಿರುವುದು. ಪಶ್ಚಿಮ ಏಷ್ಯಾದ ಯುದ್ಧ ಪರಿಸ್ಥಿತಿಯಿಂದ ಹಾರ್ಮುಜ್ ಸಮುದ್ರ ದ್ವಾರದಲ್ಲಿ ಇಂಧನ ಸರಬರಾಜು ವ್ಯತ್ಯಯಗೊಂಡಿದ್ದು, ATF ಬೆಲೆ ಏರಿಕೆಗೆ ಕಾರಣವಾಗಿದೆ.
ಒಂದು ಹಂತದಲ್ಲಿ ATF ಬೆಲೆ ₹2.07 ಲಕ್ಷ ಪ್ರತಿ ಕಿಲೋಲೀಟರ್ಗೆ ಏರಿಕೆಯಾಗಿದೆ ಎಂಬ ಸುದ್ದಿ ಹರಿದಾಡಿದರೂ, ನಂತರ ಸರ್ಕಾರದ ಹಸ್ತಕ್ಷೇಪದಿಂದ ₹1.04 ಲಕ್ಷ ಮಟ್ಟಕ್ಕೆ ಇಳಿಕೆಯಾಗಿದೆ. ದೆಹಲಿಯಲ್ಲಿ ಈಗ ₹1,04,927 ಹಾಗೂ ಮುಂಬೈನಲ್ಲಿ ₹98,247 ಪ್ರತಿ ಕಿಲೋಲೀಟರ್ ದರ ಇದೆ.
ವಿಮಾನ ಕಂಪನಿಗಳ ಒಟ್ಟು ವೆಚ್ಚದಲ್ಲಿ ಸುಮಾರು 40% ಭಾಗ ಇಂಧನದ ಮೇಲೇ ಖರ್ಚಾಗುವುದರಿಂದ, ಈ ದರ ಏರಿಕೆ ನೇರವಾಗಿ ಟಿಕೆಟ್ ದರಗಳ ಮೇಲೆ ಪರಿಣಾಮ ಬೀರುತ್ತಿದೆ. ಕೇಂದ್ರ ಸರ್ಕಾರ ಭಾಗಶಃ ದರ ಏರಿಕೆಗೆ ಮಾತ್ರ ಅನುಮತಿ ನೀಡಿದ್ದು, ಹೆಚ್ಚುವರಿ ಹೊರೆಗಳಲ್ಲಿ 25% ಮಾತ್ರ ವಸೂಲು ಮಾಡಲು ತೈಲ ಕಂಪನಿಗಳಿಗೆ ಸೂಚಿಸಿದೆ.
ಯುದ್ಧದ ಹಿನ್ನೆಲೆ ಹಲವಾರು ವಾಯುಮಾರ್ಗಗಳು ಮುಚ್ಚಲ್ಪಟ್ಟಿರುವುದರಿಂದ ವಿಮಾನಗಳು ಉದ್ದವಾದ ಮಾರ್ಗಗಳಲ್ಲಿ ಹಾರಬೇಕಾಗಿ ಬರುತ್ತಿದೆ. ಇದರಿಂದ ಇಂಧನ ಬಳಕೆ ಹೆಚ್ಚಾಗಿ, ವೆಚ್ಚವೂ ಏರಿಕೆಯಾಗಿದೆ. ಒಟ್ಟಿನಲ್ಲಿ, ಗಲ್ಫ್ ಹಾಗೂ ಯುರೋಪ್ ಮಾರ್ಗಗಳ ವಿಮಾನ ಪ್ರಯಾಣಗಳು ಮುಂದಿನ ದಿನಗಳಲ್ಲಿ ಇನ್ನಷ್ಟು ದುಬಾರಿಯಾಗುವ ಸಾಧ್ಯತೆ ಇದೆ.
ದೇಶದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ