ದೆಹಲಿ: ಭಾರತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ದಿನದಿಂದ ದಿನಕ್ಕೆ ಗಗನಕ್ಕೇರುತ್ತಿರುವ ಬೆನ್ನಲ್ಲೇ, ಸಾರ್ವಜನಿಕರ ಜೇಬಿಗೆ ಕತ್ತರಿ ಬೀಳುವುದನ್ನು ತಪ್ಪಿಸಲು ಮತ್ತು ಹಸಿರು ಇಂಧನಕ್ಕೆ ಉತ್ತೇಜನ ನೀಡಲು ಕೇಂದ್ರ ಸರ್ಕಾರ ಎಥೆನಾಲ್ ಇಂಧನ ಬಳಕೆಗೆ ಭಾರಿ ಒತ್ತು ನೀಡುತ್ತಿದೆ. ಸದ್ಯ ಆಟೋಮೊಬೈಲ್ ಮಾರುಕಟ್ಟೆಯಲ್ಲಿ 100 ಪ್ರತಿಶತ ಎಥೆನಾಲ್ ಚಾಲಿತ (E100) ವಾಹನಗಳ ಕುರಿತು ಭಾರಿ ಚರ್ಚೆ ನಡೆಯುತ್ತಿದೆ. ಈ ನಡುವೆ, ಹಳೆಯ ಪೆಟ್ರೋಲ್ ಕಾರುಗಳ ಮಾಲೀಕರಿಗೆ ಆಟೋ ತಜ್ಞರು ಸಿಹಿ ಸುದ್ದಿಯೊಂದನ್ನು ನೀಡಿದ್ದು, ಎಂಜಿನ್ ಬದಲಾವಣೆ ಮಾಡದೆಯೇ ಹಳೆಯ ಕಾರುಗಳನ್ನು E100 ಎಥೆನಾಲ್ ಇಂಧನಕ್ಕೆ ಪರಿವರ್ತಿಸುವ ವಿಶೇಷ ‘ಫ್ಲೆಕ್ಸ್-ಇಂಧನ ಪರಿವರ್ತನಾ ಕಿಟ್’ (Flex Fuel Conversion Kit) ಸದ್ಯ ಭಾರತದಲ್ಲಿ ಪರೀಕ್ಷೆಗೆ ಒಳಗಾಗುತ್ತಿದೆ.
ಸಾಮಾನ್ಯ ಪೆಟ್ರೋಲ್ ಕಾರುಗಳು ನೇರವಾಗಿ E100 ಎಥೆನಾಲ್ನಲ್ಲಿ ಓಡಲು ಸಾಧ್ಯವಿಲ್ಲ. ಏಕೆಂದರೆ ಎಥೆನಾಲ್ನ ರಾಸಾಯನಿಕ ಸಂಯೋಜನೆ ಭಿನ್ನವಾಗಿದ್ದು, ಅದು ದಹನವಾಗಲು ಹೆಚ್ಚಿನ ಇಂಧನದ ಅಗತ್ಯವಿರುತ್ತದೆ ಮತ್ತು ಅದು ತೇವಾಂಶವನ್ನು ಆಕರ್ಷಿಸುವುದರಿಂದ ಇಂಧನ ಪೈಪ್ಗಳು ಹಾಗೂ ಸೀಲುಗಳು ಜಖಂಗೊಳ್ಳುವ ಸಾಧ್ಯತೆ ಇರುತ್ತದೆ.
ಆದರೆ, ಈಗ ಪರೀಕ್ಷಿಸಲಾಗುತ್ತಿರುವ ಹೊಸ ಪರಿವರ್ತನಾ ಕಿಟ್ ಕಾರಿನ ಇಂಧನ ವ್ಯವಸ್ಥೆ ಮತ್ತು ಎಲೆಕ್ಟ್ರಾನಿಕ್ ನಿಯಂತ್ರಣ ವ್ಯವಸ್ಥೆಯಲ್ಲಿ (ECU) ಅಗತ್ಯ ಬದಲಾವಣೆಗಳನ್ನು ಮಾಡುತ್ತದೆ. ಇದರಲ್ಲಿರುವ ಅತ್ಯಾಧುನಿಕ ಸೆನ್ಸರ್ಗಳು ಇಂಧನದಲ್ಲಿರುವ ಎಥೆನಾಲ್ ಅಂಶವನ್ನು ಪತ್ತೆ ಹಚ್ಚಿ, ಅದಕ್ಕೆ ತಕ್ಕಂತೆ ಎಂಜಿನ್ಗೆ ಇಂಧನ ಪೂರೈಕೆ ಮತ್ತು ದಹನ ಪ್ರಕ್ರಿಯೆಯನ್ನು ನಿಯಂತ್ರಿಸುತ್ತವೆ. ಇದರಿಂದಾಗಿ ಕಾರು ಪೆಟ್ರೋಲ್ ಮತ್ತು ಎಥೆನಾಲ್ ಇರಡರಲ್ಲೂ ಯಾವುದೇ ತೊಂದರೆ ಇಲ್ಲದೆ ಮೃದುವಾಗಿ ಚಲಿಸುತ್ತದೆ.
ಈ ತಂತ್ರಜ್ಞಾನವು ಮಾರುಕಟ್ಟೆಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಯಶಸ್ವಿಯಾದರೆ, ಗ್ರಾಹಕರು ಲಕ್ಷಾಂತರ ರೂಪಾಯಿ ಕೊಟ್ಟು ಹೊಸ ಫ್ಲೆಕ್ಸ್-ಇಂಧನ ವಾಹನಗಳನ್ನು ಖರೀದಿಸುವ ಅಗತ್ಯವಿರುವುದಿಲ್ಲ. ಅತ್ಯಂತ ಕಡಿಮೆ ವೆಚ್ಚದಲ್ಲಿ ಅಸ್ತಿತ್ವದಲ್ಲಿರುವ ಪೆಟ್ರೋಲ್ ಕಾರುಗಳನ್ನೇ ಅಪ್ಗ್ರೇಡ್ ಮಾಡಿಕೊಳ್ಳಬಹುದು. ಎಥೆನಾಲ್ ಅನ್ನು ಕಬ್ಬು, ಜೋಳ ಹಾಗೂ ಇತರ ಕೃಷಿ ಉಪ ಉತ್ಪನ್ನಗಳಿಂದ ಉತ್ಪಾದಿಸುವುದರಿಂದ ಇದು ದೇಶದ ರೈತರಿಗೂ ಆರ್ಥಿಕವಾಗಿ ಭಾರಿ ಅನುಕೂಲ ಮಾಡಿಕೊಡಲಿದ್ದು, ಭಾರತದ ಕಚ್ಚಾ ತೈಲ ಆಮದು ವೆಚ್ಚವನ್ನು ಗಣನೀಯವಾಗಿ ತಗ್ಗಿಸಲಿದೆ.
ಇದನ್ನೂ ಓದಿ: ಬುಲೆಟ್ ಕೊಳ್ಳೋ ಆಸೆ ಇರೋ ಮಧ್ಯಮ ವರ್ಗದ ಯುವಕರಿಗೆ ಬಿಗ್ ಆಫರ್!: ಕೇವಲ 1.99 ಲಕ್ಷಕ್ಕೆ ಸಿಗಲಿದೆ ರಾಯಲ್ ಎನ್ಫೀಲ್ಡ್
ಎಂಜಿನ್ ಬದಲಾವಣೆ ಮುಕ್ತ: ಫ್ಲೆಕ್ಸ್ ಫ್ಯುಯೆಲ್ ಕನ್ವರ್ಷನ್ ಕಿಟ್ ಮೂಲಕ ಹಳೆಯ ಪೆಟ್ರೋಲ್ ಕಾರುಗಳ ಎಂಜಿನ್ ಬದಲಾಯಿಸದೆಯೇ 100% ಎಥೆನಾಲ್ನಲ್ಲಿ ಓಡುವಂತೆ ಮಾಡಬಹುದು.
ವೆಚ್ಚ ಕಡಿತ: ಹೊಸ ಕಾರು ಖರೀದಿಸುವ ದೊಡ್ಡ ಆರ್ಥಿಕ ಹೊರೆ ತಪ್ಪಲಿದ್ದು, ಪೆಟ್ರೋಲ್ಗೆ ಹೋಲಿಸಿದರೆ ಎಥೆನಾಲ್ ಇಂಧನದ ವೆಚ್ಚ ತೀರಾ ಕಡಿಮೆಯಾಗಲಿದೆ.
ಪರಿಸರ ಸ್ನೇಹಿ: ಇಂಗಾಲದ ಹೊರಸೂಸುವಿಕೆಯನ್ನು ತಗ್ಗಿಸುವ ಮೂಲಕ ಪರಿಸರ ಮಾಲಿನ್ಯ ನಿಯಂತ್ರಣಕ್ಕೆ ಇದು ಅತ್ಯುತ್ತಮ ಪರ್ಯಾಯ.
ಹೊಂದಾಣಿಕೆ ಪರಿಶೀಲನೆ ಕಡ್ಡಾಯ: ಈ ಕಿಟ್ ಅಳವಡಿಸುವ ಮುನ್ನ ವಾಹನದ ಮಾಡೆಲ್ ಹೊಂದಾಣಿಕೆ ಮತ್ತು ಸರ್ಕಾರಿ ಪ್ರಮಾಣೀಕರಣವನ್ನು ಕಡ್ಡಾಯವಾಗಿ ಪರಿಶೀಲಿಸಬೇಕು.
ಆಟೋ ಮೊಬೈಲ್ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ