ದೆಹಲಿ: ಏಷ್ಯನ್ ಗೇಮ್ಸ್ 2026ರ (Asian Games 2026) ಆರಂಭಕ್ಕೂ ಮುನ್ನ ಶ್ರೇಯಸ್ ಅಯ್ಯರ್ ನೇತೃತ್ವದ ಭಾರತ ತಂಡಕ್ಕೆ ಜಪಾನ್ ಕ್ರಿಕೆಟ್ ತಂಡ ಶಾಕ್ ನೀಡಿದೆ. ಸೆಪ್ಟೆಂಬರ್ 22 ಮಂಗಳವಾರ ನಡೆದ ಏಕೈಕ ಟಿ20 ಪಂದ್ಯದಲ್ಲಿ ಮಳೆಯಿಂದಾಗಿ ಪಂದ್ಯದ ಓವರ್ಗಳನ್ನು ಕಡಿತಗೊಳಿಸಲಾಗಿದ್ದು, ಬಲಶಾಲಿ ಭಾರತ ತಂಡವು ಜಪಾನ್ ವಿರುದ್ಧ ಜಸ್ಟ್ 2 ರನ್ಗಳ ರೋಚಕ ಹಾಗೂ ಕಷ್ಟಕರ ಜಯ ಸಾಧಿಸಿದೆ.
ಟಿ20 ವಿಶ್ವಚಾಂಪಿಯನ್ ಭಾರತ ತಂಡಕ್ಕೆ ಮೊದಲ ಬಾರಿಗೆ ಮುಖಾಮುಖಿಯಾದ ಪೂರ್ಣ ಪ್ರಮಾಣದ ಐಸಿಸಿ ಸದಸ್ಯತ್ವವಿಲ್ಲದ ಜಪಾನ್ ತಂಡ, ತನ್ನ ಅದ್ಭುತ ಬೌಲಿಂಗ್ ಹಾಗೂ ಶಿಸ್ತಿನ ಆಟದ ಮೂಲಕ ಜಗತ್ತನ್ನೇ ಬೆರಗುಗೊಳಿಸಿತು.
ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಭಾರತ ತಂಡಕ್ಕೆ ಜಪಾನ್ ಬೌಲರ್ಗಳು ತೀವ್ರ ಆಘಾತ ನೀಡಿದರು. ಆರಂಭಿಕ ಆಟಗಾರ ಅಭಿಷೇಕ್ ಶರ್ಮಾ ಮೊದಲ ಓವರ್ನಲ್ಲೇ ಶೋಮಾ ಸುಗಾಯಾ ಸ್ಲೇಟರ್ಗೆ ಕ್ಯಾಚ್ ನೀಡಿ ಗೋಲ್ಡನ್ ಡಕ್ (0) ಆದರು.
ಸಂಜು ಸ್ಯಾಮ್ಸನ್ (9 ರನ್, 7 ಎಸೆತ) ಹಾಗೂ ಇಶಾನ್ ಕಿಶನ್ (3 ರನ್, 6 ಎಸೆತ) ಶೀಘ್ರವೇ ಪೆವಿಲಿಯನ್ ಸೇರಿದರು. ನಾಯಕ ಶ್ರೇಯಸ್ ಅಯ್ಯರ್ (16 ರನ್, 12 ಎಸೆತ) ತಂಡಕ್ಕೆ ಆಸರೆಯಾಗಿದ್ದರಿಂದ ಭಾರತ 5 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 32 ರನ್ ಕಲೆಹಾಕಿತು. ಚಾರ್ಲಿ ಹಾರಾ-ಹಿಂಜೆ ಜಪಾನ್ ಪರ 2 ವಿಕೆಟ್ ಪಡೆದು ಮಿಂಚಿದರು.
ಮಳೆ ಹಾಗೂ ಒದ್ದೆಯಾದ ಮೈದಾನದಿಂದಾಗಿ ಪಂದ್ಯವನ್ನು ತಲಾ 5 ಓವರ್ಗಳಿಗೆ ಸೀಮಿತಗೊಳಿಸಿ, ಜಪಾನ್ಗೆ 33 ರನ್ಗಳ ಗೆಲುವಿನ ಗುರಿ ನೀಡಲಾಯಿತು. ಸುಲಭ ಗುರಿ ಬೆನ್ನಟ್ಟಿದ ಜಪಾನ್ ತಂಡವು ಭಾರತದ ಬೌಲರ್ಗಳನ್ನು ಕಂಗಾಲುಗೊಳಿಸಿತು. ಜಪಾನ್ ನಾಯಕ ಕೆಂಡೆಲ್ ಕಾಡೋವಾಕಿ ಫ್ಲೆಮಿಂಗ್ (12 ರನ್) ತಂಡಕ್ಕೆ ಉತ್ತಮ ಆರಂಭ ನೀಡಿದರು.
ಇದನ್ನೂ ಓದಿ: ಏಷ್ಯನ್ ಗೇಮ್ಸ್: ಶತಕದೊಂದಿಗೆ ದಾಖಲೆ ಬರೆದ ಶಫಾಲಿ ವರ್ಮಾ, ಫೈನಲ್ಗೆ ಭಾರತ
ಭಾರತದ ಪರ ಬೌಲಿಂಗ್ನಲ್ಲಿ ಆಪತ್ಬಾಂಧವನಾದ ವಾಷಿಂಗ್ಟನ್ ಸುಂದರ್ (2 ಓವರ್, 13 ರನ್, 2 ವಿಕೆಟ್) ಜಪಾನ್ ನಾಯಕ ಹಾಗೂ ಇಬ್ರಾಹಿಂ ತಕಹಾಶಿ (4) ಅವರ ಪ್ರಮುಖ ವಿಕೆಟ್ ಪಡೆದು ಭಾರತವನ್ನು ಸೋಲಿನ ದವಡೆಯಿಂದ ಪಾರು ಮಾಡಿದರು. ಅಕ್ಷರ್ ಪಟೇಲ್ 2 ಓವರ್ಗಳಲ್ಲಿ ಕೇವಲ 7 ರನ್ ನೀಡಿ ಕಟ್ಟುನಿಟ್ಟಿನ ಬೌಲಿಂಗ್ ಪ್ರದರ್ಶಿಸಿದರು. ಇಶಾನ್ ಕಿಶನ್ ಅವರ ಸಮಯಪ್ರಜ್ಞೆಯ ರನ್ಔಟ್ ಭಾರತಕ್ಕೆ ಜಯದ ದಾರಿ ಸುಗಮಗೊಳಿಸಿತು. ಅಂತಿಮವಾಗಿ ಜಪಾನ್ ತಂಡ 5 ಓವರ್ಗಳಲ್ಲಿ 30/3 ರನ್ ಗಳಿಸಲಷ್ಟೇ ಶಕ್ತವಾಗಿ, 2 ರನ್ಗಳ ಅಂತರದಲ್ಲಿ ಐತಿಹಾಸಿಕ ಜಯದಿಂದ ವಂಚಿತವಾಯಿತು.