ಮಂಗಳೂರು: ಭಾರತದ ಬಂದರು ಮೂಲಸೌಕರ್ಯವನ್ನು ಬಲಪಡಿಸುವತ್ತ ಮಹತ್ವದ ಹೆಜ್ಜೆಯಾಗಿ, ನ್ಯೂ ಮಂಗಳೂರು ಪೋರ್ಟ್ ಅಥಾರಿಟಿ (NMPA) ಸಲ್ಲಿಸಿದ್ದ ಬರ್ತ್ ನಂ. 9 ಪುನರ್ ಅಭಿವೃದ್ಧಿ ಪ್ರಸ್ತಾವನೆಯನ್ನು ಕೇಂದ್ರ ಬಂದರು, ಸಾಗಣೆ ಮತ್ತು ಜಲಮಾರ್ಗಗಳ ಸಚಿವಾಲಯ ಅನುಮೋದಿಸಿದೆ.
ಮಾರ್ಚ್ 25ರಂದು ಈ ಅನುಮೋದನೆ ಲಭಿಸಿದ್ದು, ಸಾರ್ವಜನಿಕ-ಖಾಸಗಿ ಸಹಭಾಗಿತ್ವ (PPP) ಮಾದರಿಯಲ್ಲಿ DBFOT (Design, Build, Finance, Operate, Transfer) ರೂಪರೇಷೆಯಡಿ ಯೋಜನೆ ಜಾರಿಗೊಳ್ಳಲಿದೆ. ಈ ಯೋಜನೆಯಡಿಯಲ್ಲಿ ಹಳೆಯ ಮೂಲಸೌಕರ್ಯವನ್ನು ತೆರವುಗೊಳಿಸಿ, ಕ್ರೂಡ್ ಆಯಿಲ್, ಪೆಟ್ರೋಲಿಯಂ ಉತ್ಪನ್ನಗಳು (POL) ಮತ್ತು ಎಲ್‌ಪಿಜಿ (LPG) ಸಾಗಣೆಗೆ ಅನುಕೂಲವಾಗುವಂತೆ ಬರ್ತ್ ನಂ. 9 ಅನ್ನು ಸಂಪೂರ್ಣವಾಗಿ ಆಧುನೀಕರಿಸಲಾಗುತ್ತದೆ.
ಪ್ರಸ್ತುತ 10.5 ಮೀಟರ್ ಇರುವ ಬರ್ತ್ ಆಳವನ್ನು 14 ಮೀಟರ್‌ಗೆ ಹೆಚ್ಚಿಸಲಾಗುತ್ತಿದ್ದು, ಭವಿಷ್ಯದಲ್ಲಿ 19.8 ಮೀಟರ್ ತನಕ ವಿಸ್ತರಿಸುವಂತೆ ವಿನ್ಯಾಸ ರೂಪಿಸಲಾಗಿದೆ. ಇದರಿಂದ 2 ಲಕ್ಷ ಡೆಡ್‌ವೇಟ್ ಟನ್ನೇಜ್ (DWT) ಸಾಮರ್ಥ್ಯದ ಹಡಗುಗಳು, ವಿಶೇಷವಾಗಿ ವೆರಿ ಲಾರ್ಜ್ ಗ್ಯಾಸ್ ಕ್ಯಾರಿಯರ್ಸ್ (VLGCs) ಕೂಡ ನಿಲುಗಡೆಗೊಳ್ಳಲು ಸಾಧ್ಯವಾಗಲಿದೆ.
ಈ ಯೋಜನೆಯ ಮಹತ್ವವನ್ನು ವಿವರಿಸಿದ ಕೇಂದ್ರ ಸಚಿವ ಸರ್ಬಾನಂದ ಸೋನೋವಾಲ್, “ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಭಾರತದ ಸಮುದ್ರ ಮೂಲಸೌಕರ್ಯವನ್ನು ವೇಗವಾಗಿ ಆಧುನೀಕರಿಸಲಾಗುತ್ತಿದೆ. ಈ ಯೋಜನೆ ಮೂಲಕ ಕಾರ್ಗೋ ನಿರ್ವಹಣಾ ಸಾಮರ್ಥ್ಯವನ್ನು 10.90 MTPAಗೆ ಹೆಚ್ಚಿಸಿ, ಭವಿಷ್ಯದ ಇಂಧನ ಮತ್ತು ವಾಣಿಜ್ಯ ಅಗತ್ಯಗಳನ್ನು ಪೂರೈಸಲು ನಮ್ಮ ಬಂದರುಗಳನ್ನು ಸಜ್ಜುಗೊಳಿಸಲಾಗುತ್ತಿದೆ” ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: ಉಡುಪಿಯ ಐದು ಗ್ರಾಮ ಪಂಚಾಯತ್‌ಗಳು ರಾಷ್ಟ್ರೀಯ ಪ್ರಶಸ್ತಿಗೆ ಆಯ್ಕೆ, ಬೆಂಗಳೂರಿನ 1 ಪಂಚಾಯತ್‌ ಆಯ್ಕೆ
ಸುಮಾರು 438.29 ಕೋಟಿ ವೆಚ್ಚದ ಈ ಯೋಜನೆಯನ್ನು ಸ್ಪರ್ಧಾತ್ಮಕ ಟೆಂಡರ್ ಮೂಲಕ ಖಾಸಗಿ ಕಂಪನಿಗೆ ನೀಡಲಾಗುತ್ತದೆ. ಯೋಜನೆಯಡಿ ವರ್ಷಕ್ಕೆ 10.90 ಮಿಲಿಯನ್ ಟನ್ (MTPA) ಕಾರ್ಗೋ ಹ್ಯಾಂಡ್ಲಿಂಗ್ ಸಾಮರ್ಥ್ಯ ಇರಲಿದೆ. ಐದನೇ ವರ್ಷದೊಳಗೆ ಕನಿಷ್ಠ 7.63 MTPA ಕಾರ್ಗೋ ನಿರ್ವಹಣೆ ಸಾಧಿಸಬೇಕೆಂಬ ಗುರಿಯನ್ನೂ ನಿಗದಿ ಮಾಡಲಾಗಿದೆ.
ಯೋಜನೆಯ ನಿರ್ಮಾಣ ಅವಧಿ 2 ವರ್ಷಗಳಾಗಿದ್ದು, ಒಟ್ಟು ಕಾನ್ಸೆಷನ್ ಅವಧಿ 30 ವರ್ಷಗಳವರೆಗೆ ಇರುತ್ತದೆ. ಇದರಲ್ಲಿ ನಿರ್ಮಾಣ ಹಂತವೂ ಒಳಗೊಂಡಿದೆ.
ಸುಮಾರು 50 ವರ್ಷ ಹಳೆಯ ಮೂಲಸೌಕರ್ಯವನ್ನು ಬದಲಿಸಿ, 50 ವರ್ಷಗಳ ಆಯುಷ್ಯ ಹೊಂದಿದ ಆಧುನಿಕ ವ್ಯವಸ್ಥೆಯನ್ನು ನಿರ್ಮಿಸುವ ಮೂಲಕ ದೀರ್ಘಕಾಲಿಕ ಸ್ಥಿರತೆ ಸಾಧಿಸುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಜೊತೆಗೆ ಪ್ರಾದೇಶಿಕ ಮಟ್ಟದಲ್ಲಿ ಇಂಧನ ಸಂಬಂಧಿತ ಕಾರ್ಗೋ ಬೇಡಿಕೆಯನ್ನು ಪೂರೈಸಲು ಸಹಕಾರಿಯಾಗಲಿದೆ.
ಮೆಕನೈಸೇಶನ್ ಮೂಲಕ ಕಾರ್ಯಕ್ಷಮತೆಯನ್ನು ಹೆಚ್ಚಿಸುವ ಉದ್ದೇಶದಿಂದ ಹೈ-ಕ್ಯಾಪಾಸಿಟಿ ಮೆರೈನ್ ಅನ್‌ಲೋಡಿಂಗ್ ಆರ್ಮ್ಸ್ (MULAs) ಮತ್ತು ಸ್ವಯಂಚಾಲಿತ ಮೂರೆಂಗ್ ವ್ಯವಸ್ಥೆಗಳನ್ನು ಅಳವಡಿಸಲಾಗುತ್ತದೆ. ಇದರಿಂದ ಲಾಜಿಸ್ಟಿಕ್ಸ್ ವೆಚ್ಚ ಕಡಿಮೆಯಾಗುವ ಜೊತೆಗೆ ಬಂದರಿನ ಸ್ಪರ್ಧಾತ್ಮಕತೆ ಹೆಚ್ಚಲಿದೆ.
ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್‌ ಮಾಡಿ