ಏಕಾನಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ಐಪಿಎಲ್ನ ರೋಚಕ ಪಂದ್ಯದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧ ಕೋಲ್ಕತ್ತಾ ನೈಟ್ ರೈಡರ್ಸ್ ಸೂಪರ್ ಓವರ್ನಲ್ಲಿ ಅಮೋಘ ಗೆಲುವು ಸಾಧಿಸಿತು. ಕೊನೆಯ ಎಸೆತದವರೆಗೂ ಕುತೂಹಲ ಕೆರಳಿಸಿದ ಪಂದ್ಯ ಟೈ ಆದ ಬಳಿಕ ನಡೆದ ಸೂಪರ್ ಓವರ್ನಲ್ಲಿ ಕೆಕೆಆರ್ ಗೆಲುವು ಸಾಧಿಸಿತು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಕೋಲ್ಕತ್ತಾ ನೈಟ್ ರೈಡರ್ಸ್ 20 ಓವರ್ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 155 ರನ್ ಗಳಿಸಿತು. ಆರಂಭದಲ್ಲಿ ಬ್ಯಾಟರ್ಗಳು ಹೆಚ್ಚು ಪ್ರಭಾವ ಬೀರದ ವೇಳೆ ರಿಂಕು ಸಿಂಗ್ ಏಕಾಂಗಿ ಹೋರಾಟ ನಡೆಸಿದರು. ಕೇವಲ 51 ಎಸೆತಗಳಲ್ಲಿ 7 ಬೌಂಡರಿ ಹಾಗೂ 5 ಸಿಕ್ಸರ್ಗಳ ನೆರವಿನಿಂದ ಅಜೇಯ 83 ರನ್ ಸಿಡಿಸಿ ತಂಡಕ್ಕೆ ಸ್ಪರ್ಧಾತ್ಮಕ ಮೊತ್ತ ಒದಗಿಸಿದರು. ಕ್ಯಾಮೆರಾನ್ ಗ್ರೀನ್ 34 ರನ್ಗಳಿಸಿ ಉತ್ತಮ ಬೆಂಬಲ ನೀಡಿದರು. ಅಜಿಂಕ್ಯ ರಹಾನೆ (10), ಅಂಗ್ಕ್ರಿಶ್ ರಘುವಂಶಿ (9) ನಿರೀಕ್ಷಿತ ಕೊಡುಗೆ ನೀಡಲಿಲ್ಲ.
ಲಕ್ನೋ ಪರ ಮೊಹ್ಸಿನ್ ಖಾನ್ ಅಸಾಧಾರಣ ಬೌಲಿಂಗ್ ಪ್ರದರ್ಶಿಸಿ 5 ವಿಕೆಟ್ ಕಬಳಿಸಿ ಕೆಕೆಆರ್ನ್ನು ನಿಯಂತ್ರಿಸಿದರು. ಜಾರ್ಜ್ ಲಿಂಡೆ ಒಂದು ವಿಕೆಟ್ ಪಡೆದರು. ಮೊಹ್ಸಿನ್ ದಾಳಿಯಿಂದ ಕೋಲ್ಕತ್ತಾ ದೊಡ್ಡ ಮೊತ್ತ ದಾಖಲಿಸಲು ವಿಫಲವಾಯಿತು.
156 ರನ್ಗಳ ಗುರಿ ಬೆನ್ನತ್ತಿದ ಲಕ್ನೋ ಹೋರಾಟದ ಬ್ಯಾಟಿಂಗ್ ಪ್ರದರ್ಶಿಸಿತು. ಐಡೆನ್ ಮಾರ್ಕ್ರಮ್ 31 ರನ್, ನಾಯಕ ರಿಷಭ್ ಪಂತ್ 42 ರನ್ ಹಾಗೂ ಆಯುಷ್ ಬಡೋನಿ 24 ರನ್ಗಳಿಸಿ ತಂಡವನ್ನು ಗೆಲುವಿನ ದಡಕ್ಕೆ ತಳ್ಳಿದರು. ನಿಕೋಲಸ್ ಪೂರನ್ (9) ಬೇಗ ಔಟಾದರೂ, ಹಿಮ್ಮತ್ ಸಿಂಗ್ 19 ರನ್ಗಳೊಂದಿಗೆ ಕೊನೆಯ ಹಂತದಲ್ಲಿ ಹೋರಾಟ ಮುಂದುವರಿಸಿದರು.
ಇದನ್ನೂ ಓದಿ: ಸಿಎಸ್ಕೆ ಕೋಟೆಯಲ್ಲಿ ಜಿಟಿ ದರ್ಬಾರ್: ರುತುರಾಜ್ ಗಾಯಕ್ವಾಡ್ ಹೋರಾಟ ವ್ಯರ್ಥ; ಸಾಯಿ ಸುದರ್ಶನ್ ಬ್ಯಾಟಿಂಗ್ಗೆ ಚೆನ್ನೈ ತತ್ತರ!
ಅಂತಿಮವಾಗಿ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 155 ರನ್ ಗಳಿಸಿ ಪಂದ್ಯವನ್ನು ಸಮಬಲಗೊಳಿಸಿದರು.
ಕೆಕೆಆರ್ ಪರ ವರುಣ್ ಚಕ್ರವರ್ತಿ ಹಾಗೂ ವೈಭವ್ ಅರೋರಾ ತಲಾ 2 ವಿಕೆಟ್ ಪಡೆದು ಮಹತ್ವದ ಬ್ರೇಕ್ಥ್ರೂ ಒದಗಿಸಿದರು. ಕ್ಯಾಮೆರಾನ್ ಗ್ರೀನ್, ಅನುಕೂಲ್ ರಾಯ್, ಕಾರ್ತಿಕ್ ತ್ಯಾಗಿ ಹಾಗೂ ಸುನಿಲ್ ನರೈನ್ ತಲಾ ಒಂದು ವಿಕೆಟ್ ಪಡೆದು ಲಕ್ನೋಗೆ ಒತ್ತಡ ತಂದರು.
ಸೂಪರ್ ಓವರ್ ಪಂದ್ಯದಲ್ಲಿ ಗೆದ್ದ ಕೋಲ್ಕತ್ತಾ
ಪಂದ್ಯ ಟೈ ಆದ ಹಿನ್ನೆಲೆಯಲ್ಲಿ ನಡೆದ ಸೂಪರ್ ಓವರ್ನಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಲಕ್ನೋ ಕೇವಲ 1 ರನ್ ಮಾತ್ರ ಗಳಿಸಲಷ್ಟೇ ಶಕ್ತವಾಯಿತು. ಕೆಕೆಆರ್ ಬೌಲರ್ಗಳ ನಿಯಂತ್ರಿತ ದಾಳಿಗೆ ಲಕ್ನೋ ಬ್ಯಾಟರ್ಗಳು ಮಣಿದರು. 2 ರನ್ಗಳ ಸುಲಭ ಗುರಿ ಬೆನ್ನತ್ತಿದ ಕೋಲ್ಕತ್ತಾ ಪರ ರಿಂಕು ಸಿಂಗ್ ಮೊದಲ ಎಸೆತದಲ್ಲೇ ಬೌಂಡರಿ ಸಿಡಿಸಿ ತಂಡಕ್ಕೆ ರೋಚಕ ಗೆಲುವು ತಂದುಕೊಟ್ಟರು. ರೂವ್ಮನ್ ಪೊವೆಲ್ ಮತ್ತೊಂದು ತುದಿಯಲ್ಲಿ ಜೊತೆಯಾಗಿದ್ದರು.
ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
