ವಾಷಿಂಗ್ಟನ್: ಅಮೆರಿಕದಲ್ಲಿ ಉದ್ಯೋಗ ಆಧಾರಿತ ಮೊದಲ ಆದ್ಯತೆಯ ‘EB-1’ ಗ್ರೀನ್ ಕಾರ್ಡ್ಗಳಿಗೆ (US Green Cards) ಭಾರತೀಯ ವೃತ್ತಿಪರರಿಂದ ಅಭೂತಪೂರ್ವ ಬೇಡಿಕೆ ವ್ಯಕ್ತವಾಗಿರುವ ಹಿನ್ನೆಲೆಯಲ್ಲಿ, ಪ್ರಸಕ್ತ ಆರ್ಥಿಕ ವರ್ಷಾಂತ್ಯವಾದ ಸೆಪ್ಟೆಂಬರ್ ೩೦ರ ವೇಳೆಗೆ ಈ ಕೆಟಗರಿಯ ಗ್ರೀನ್ ಕಾರ್ಡ್ ಲಭ್ಯತೆ ತಾತ್ಕಾಲಿಕವಾಗಿ ಸಂಪೂರ್ಣವಾಗಿ ಸ್ಥಗಿತಗೊಳ್ಳುವ (Unavailable) ಸಾಧ್ಯತೆಯಿದೆ ಎಂದು ಅಮೆರಿಕ ವಿದೇಶಾಂಗ ಇಲಾಖೆ ಎಚ್ಚರಿಸಿದೆ.
ಅಸಾಧಾರಣ ಪ್ರತಿಭೆ ಹೊಂದಿರುವವರು, ಅತ್ಯುತ್ತಮ ಪ್ರಾಧ್ಯಾಪಕರು, ಸಂಶೋಧಕರು ಹಾಗೂ ಬಹುರಾಷ್ಟ್ರೀಯ ಸಂಸ್ಥೆಗಳ ಉನ್ನತ ಅಧಿಕಾರಿಗಳಿಗೆ ನೀಡಲಾಗುವ ಈ ‘ಇಬಿ-೧’ ವೀಸಾ ವಿಭಾಗದಲ್ಲೂ ಈಗ ಸರತಿ ಸಾಲು ಹೆಚ್ಚಾಗಿದ್ದು, ವರ್ಷಗಳಿಂದ ಕಾಯುತ್ತಿರುವ ಭಾರತೀಯ ಅರ್ಜಿದಾರರಿಗೆ ಇದು ಮತ್ತಷ್ಟು ಆತಂಕ ತಂದೊಡ್ಡಿದೆ.
ಅಮೆರಿಕ ವಿದೇಶಾಂಗ ಇಲಾಖೆ ಬಿಡುಗಡೆ ಮಾಡಿರುವ ‘ಸೆಪ್ಟೆಂಬರ್ ವೀಸಾ ಬುಲೆಟಿನ್’ ಪ್ರಕಾರ, ಭಾರತೀಯ ಕೋಟಾದಡಿ ನಿಗದಿಪಡಿಸಲಾದ ಇಬಿ-1 ವೀಸಾಗಳ ಸಂಖ್ಯೆ ಶೀಘ್ರದಲ್ಲೇ ಭರ್ತಿಯಾಗಲಿದೆ. ಹೀಗಾದಲ್ಲಿ ಮುಂಬರುವ ವಾರಗಳಲ್ಲಿ ಈ ಕೆಟಗರಿಯಲ್ಲಿ ಹೊಸ ವೀಸಾಗಳ ಲಭ್ಯತೆಯನ್ನು ರದ್ದುಗೊಳಿಸುವುದು ಅನಿವಾರ್ಯವಾಗಲಿದೆ.
ಇದನ್ನೂ ಓದಿ: ಗೌರಿ-ಗಣೇಶ ಹಬ್ಬಕ್ಕೆ ‘ಕೆಎಸ್ಆರ್ಟಿಸಿ’ ಬಿಗ್ ಆಫರ್: ಬೆಂಗಳೂರಿನಿಂದ 2,400 ಹೆಚ್ಚುವರಿ ವಿಶೇಷ ಬಸ್ಗಳ ಸಂಚಾರ
ಸೆಪ್ಟೆಂಬರ್ ತಿಂಗಳ ಬುಲೆಟಿನ್ ಪ್ರಕಾರ, ಭಾರತೀಯರ ಇಬಿ-೧ ‘ಫೈನಲ್ ಆಕ್ಷನ್ ಡೇಟ್’ ಅಕ್ಟೋಬರ್ ೧೫, ೨೦೨೨ ಎಂದು ನಿಗದಿಪಡಿಸಲಾಗಿದೆ. ಅಂದರೆ ಈ ದಿನಾಂಕಕ್ಕಿಂತ ಮೊದಲು ಆದ್ಯತೆ ದಿನಾಂಕ (Priority Date) ಹೊಂದಿರುವವರಿಗೆ ಮಾತ್ರ ಪ್ರಸ್ತುತ ಗ್ರೀನ್ ಕಾರ್ಡ್ ಪ್ರಕ್ರಿಯೆ ಪೂರ್ಣಗೊಳ್ಳಲಿದೆ. ಅಮೆರಿಕದಲ್ಲಿ ಭಾರತೀಯರಿಗೆ ಲಭ್ಯವಾಗುವ ಬಹುತೇಕ ಉದ್ಯೋಗ ಆಧಾರಿತ ಗ್ರೀನ್ ಕಾರ್ಡ್ ಸಾಲುಗಳು ಈಗಾಗಲೇ ಅತ್ಯಂತ ಕಠಿಣ ಹಂತವನ್ನು ತಲುಪಿವೆ.