ವಿಜಯಪುರ: ಸಾಧನೆ ಮಾಡಲು ವಯಸ್ಸು ಕೇವಲ ಒಂದು ಸಂಖ್ಯೆಯಷ್ಟೇ ಹೊರತು ಅದಕ್ಕೆ ಯಾವುದೇ ವಯಸ್ಸಿನ ಹಂಗಿಲ್ಲ ಎಂಬುದನ್ನು ಜಗತ್ತಿನಾದ್ಯಂತ ಹಲವು ಸಾಧಕರು ಈಗಾಗಲೇ ನಿರೂಪಿಸಿದ್ದಾರೆ. ಇದೀಗ ಅದೇ ಸಾಲಿಗೆ ವಿಜಯಪುರ ಜಿಲ್ಲೆಯ ಹತ್ತು ತಿಂಗಳ ಪುಟ್ಟ ಕಂದಮ್ಮನೊಬ್ಬ ಸೇರಿದ್ದು, ಅಂಬೆಗಾಲಿಡುವ ವಯಸ್ಸಿನಲ್ಲೇ ಅಸಾಧಾರಣ ಸಾಧನೆ ಮಾಡುವ ಮೂಲಕ ಜಾಗತಿಕ ಮಟ್ಟದಲ್ಲಿ ಎಲ್ಲರ ಹುಬ್ಬೇರಿಸುವಂತೆ ಮಾಡಿದ್ದಾನೆ.
ವಿಜಯಪುರ ನಗರದ ನಿವಾಸಿಗಳಾದ ಸಚಿನ್ ಪಟ್ಟಣಶೆಟ್ಟಿ ಹಾಗೂ ಸಿಂಚನಾ ದಂಪತಿಯ ಮುದ್ದು ಪುತ್ರ ರಿಯಾನ್ಸ್ ಪಟ್ಟಣಶೆಟ್ಟಿ, ತನ್ನ ವಯಸ್ಸಿಗೂ ಮೀರಿದ ಅದ್ಭುತ ಚಮತ್ಕಾರದ ಮೂಲಕ ಜಗತ್ತಿನ ಪ್ರತಿಷ್ಠಿತ ‘ನೊಬೆಲ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್ (Noble Book of World Records)’ ಪುಸ್ತಕದಲ್ಲಿ ತನ್ನ ಹೆಸರನ್ನು ಅಚ್ಚೊತ್ತಿಸಿದ್ದಾನೆ.
ಸಾಮಾನ್ಯವಾಗಿ ಹತ್ತು ತಿಂಗಳ ಮಕ್ಕಳು ನೆಲದ ಮೇಲೆ ಸರಿಯಾಗಿ ಅಂಬೆಗಾಲಿಡುವುದನ್ನು ಕಲಿಯುವ ಪ್ರಾಯವಿದು. ಆದರೆ, ಬಾಲಕ ರಿಯಾನ್ಸ್ ಮಾತ್ರ ಬರೋಬ್ಬರಿ 21 ಮೆಟ್ಟಿಲುಗಳನ್ನು ಕೇವಲ 36 ಸೆಕೆಂಡುಗಳ ಅತ್ಯಂತ ಕನಿಷ್ಠ ಅವಧಿಯಲ್ಲಿ ಅತ್ಯಂತ ಸರಾಗವಾಗಿ ಹತ್ತುವ ಮೂಲಕ ಈ ಐತಿಹಾಸಿಕ ದಾಖಲೆ ಬರೆದಿದ್ದಾನೆ. ಮಗುವಿನ ಈ ಅದ್ಭುತ ವೇಗ ಮತ್ತು ಸಾಮರ್ಥ್ಯವನ್ನು ಕಂಡು ಸ್ವತಃ ಜಾಗತಿಕ ದಾಖಲೆಯ ಅಧಿಕಾರಿಗಳೇ ಬೆರಗಾಗಿದ್ದಾರೆ.
ರಿಯಾನ್ಸ್ ಆರಂಭದಲ್ಲಿ ಮನೆಯೊಳಗಿರುವ ಸಣ್ಣಪುಟ್ಟ ಮೆಟ್ಟಿಲುಗಳನ್ನು ಅತ್ಯಂತ ಸರಾಗವಾಗಿ ಮತ್ತು ವೇಗವಾಗಿ ಹತ್ತಿ ಇಳಿಯುತ್ತಿದ್ದನು. ಮಗನ ಈ ವಿಶಿಷ್ಟ ಹಾಗೂ ವಿಭಿನ್ನ ಚಟುವಟಿಕೆಯನ್ನು ಸೂಕ್ಷ್ಮವಾಗಿ ಗಮನಿಸಿದ ತಾಯಿ ಸಿಂಚನಾ ಅವರು ಮಗನಿಗೆ ಮತ್ತಷ್ಟು ಪ್ರೋತ್ಸಾಹ ನೀಡಲು ಮುಂದಾದರು. ಆತನಿಗೆ ಸುಮಾರು ಒಂದು ಅಡಿ ಎತ್ತರವಿರುವ ದೊಡ್ಡ ಮೆಟ್ಟಿಲುಗಳನ್ನು ಹತ್ತುವುದಕ್ಕೆ ಟ್ರೈನಿಂಗ್ ನೀಡಿದರು. ತಾಯಿಯ ಪ್ರೀತಿಯ ಪ್ರೋತ್ಸಾಹದ ಬೆಂಬಲದೊಂದಿಗೆ ರಿಯಾನ್ಸ್ ಯಾವುದೇ ಭಯ ಅಥವಾ ಅಡೆತಡೆಯಿಲ್ಲದೆ ಆ ಒಂದು ಅಡಿ ಎತ್ತರದ ಮೆಟ್ಟಿಲುಗಳನ್ನು ಕೂಡ ಸುಲಭವಾಗಿ ಹತ್ತಿ ತನ್ನ ಸಾಮರ್ಥ್ಯವನ್ನು ಸಾಬೀತುಪಡಿಸಿದನು.
ಮಗನ ಈ ಅಸಾಧಾರಣ ಪ್ರತಿಭೆಯನ್ನು ಇಡೀ ಜಗತ್ತಿಗೆ ಪರಿಚಯಿಸಬೇಕೆಂದು ಪೋಷಕರು ದೃಢವಾಗಿ ನಿರ್ಧರಿಸಿದರು. ರಿಯಾನ್ಸ್ ಅತ್ಯಂತ ವೇಗವಾಗಿ ಮೆಟ್ಟಿಲುಗಳನ್ನು ಹತ್ತುವ ದೃಶ್ಯಗಳನ್ನು ಯಾವುದೇ ಎಡಿಟಿಂಗ್ ಇಲ್ಲದೆ ವಿಡಿಯೋ ರೆಕಾರ್ಡ್ ಮಾಡಿಕೊಂಡ ಪೋಷಕರು, ಅಗತ್ಯವಿರುವ ಎಲ್ಲಾ ಅಧಿಕೃತ ದಾಖಲೆಗಳೊಂದಿಗೆ ‘ನೊಬೆಲ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್’ ಸಂಸ್ಥೆಯ ಜಾಗತಿಕ ಅಧಿಕಾರಿಗಳಿಗೆ ಕಳುಹಿಸಿಕೊಟ್ಟಿದ್ದರು.
ಇದನ್ನೂ ಓದಿ: ಜಮೀರ್ ಖಾನ್ ಚಾರ್ಜ್ಶೀಟ್ಗೆ ಪರ್ಮಿಷನ್ ಕೇಳಿದ ಬೆನ್ನಲ್ಲೇ ಲೋಕಾಯುಕ್ತ ಎಸ್ಪಿ ಶಿವಪ್ರಕಾಶ್ ದೇವರಾಜು ದಿಢೀರ್ ವರ್ಗಾವಣೆ
ಮಗುವಿನ ವಯಸ್ಸು, ವಿಡಿಯೋದ ನಿಖರತೆ ಹಾಗೂ ಸಮಯದ ವೇಗವನ್ನು ಕೂಲಂಕಷವಾಗಿ ಪರಿಶೀಲಿಸಿದ ವಿಶ್ವದಾಖಲೆಯ ಉನ್ನತ ಅಧಿಕಾರಿಗಳ ತಂಡವು ಬಾಲಕ ರಿಯಾನ್ಸ್ ಸಾಧನೆಯನ್ನು ಅಧಿಕೃತ ಜಾಗತಿಕ ದಾಖಲೆಯಾಗಿ ಮಾನ್ಯ ಮಾಡಿದೆ. ಅಲ್ಲದೆ ಕುಟುಂಬಕ್ಕೆ ಅಧಿಕೃತ ವಿಶ್ವದಾಖಲೆಯ ಪ್ರಮಾಣಪತ್ರವನ್ನು ನೀಡಿ ಗೌರವಿಸಿದೆ. ಸದ್ಯ ವಿಜಯಪುರದ ಈ ಪುಟ್ಟ ಬಾಲಕನ ಜಾಗತಿಕ ಸಾಧನೆಗೆ ನಾಡಿನಾದ್ಯಂತ ಭಾರಿ ಶ್ಲಾಘನೆ ಹಾಗೂ ಹರಸುವಿಕೆ ಹರಿದುಬರುತ್ತಿದೆ.
ರಾಜಕೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ