ನವದೆಹಲಿ: ನವದೆಹಲಿಯ ಐತಿಹಾಸಿಕ ರಾಮಲೀಲಾ ಮೈದಾನದಲ್ಲಿ ನವೆಂಬರ್ 1 ರಂದು ನಡೆದ ‘ಇಂಡಿಯಾ’ (INDIA) ಒಕ್ಕೂಟದ ಬೃಹತ್ ರ‍್ಯಾಲಿಗೆ ಗೈರುಹಾಜರಾದ ಹಿನ್ನೆಲೆಯಲ್ಲಿ ಭಾರತೀಯ ಯೂತ್ ಕಾಂಗ್ರೆಸ್ (IYC) ಕಟ್ಟುನಿಟ್ಟಿನ ಶಿಸ್ತುಕ್ರಮ ಕೈಗೊಂಡಿದೆ. ರಾಷ್ಟ್ರೀಯ ನಾಯಕ ರಾಹುಲ್ ಗಾಂಧಿ ಭಾಗವಹಿಸಿದ್ದ ಈ ಬೃಹತ್ ರ‍್ಯಾಲಿಗೆ ಗೈರಾದ ಆರೋಪದ ಮೇಲೆ 7 ರಾಜ್ಯಗಳ 185ಕ್ಕೂ ಹೆಚ್ಚು ಪ್ರಮುಖ ಪದಾಧಿಕಾರಿಗಳನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಹುದ್ದೆಯಿಂದ ಅಮಾನತುಗೊಳಿಸಲಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ಹಾಗೂ ಪರಿಶೀಲನೆ ಮುಂದುವರಿದಿದ್ದು, ಅಮಾನತುಗೊಳ್ಳುವ ಪದಾಧಿಕಾರಿಗಳ ಸಂಖ್ಯೆ ಶೀಘ್ರದಲ್ಲೇ 500ಕ್ಕೆ ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ತಿಳಿದುಬಂದಿದೆ.
ಯೂತ್ ಕಾಂಗ್ರೆಸ್ ಹೈಕಮಾಂಡ್ ಕೈಗೊಂಡಿರುವ ಈ ಕಠಿಣ ಕ್ರಮದಲ್ಲಿ ಯಾವುದೇ ವಿವರಣೆಗೂ ಅವಕಾಶ ನೀಡದಿರುವುದು ಭಾರಿ ಚರ್ಚೆಗೆ ಕಾರಣವಾಗಿದೆ. ಯೂತ್ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ರೋಹಿತ್ ರಜೋರಿಯಾ ಅವರನ್ನು ಯಾವುದೇ ಸ್ಪಷ್ಟನೆ ಕೇಳದೆ ತಕ್ಷಣವೇ ಹುದ್ದೆಯಿಂದ ವಜಾಗೊಳಿಸಲಾಗಿದೆ. ಸ್ವಂತ ಚಿಕ್ಕಪ್ಪ ನಿಧನರಾದ ಕಾರಣ ಅಂತ್ಯಕ್ರಿಯೆ ಕಾರ್ಯಕ್ರಮದಲ್ಲಿ ಭಾಗವಹಿಸಲು ತೆರಳಿದ್ದರಿಂದ ರ‍್ಯಾಲಿಗೆ ಹಾಜರಾಗಲು ಸಾಧ್ಯವಾಗಿರಲಿಲ್ಲ ಎಂದು ರೋಹಿತ್ ತಿಳಿಸಿದ್ದರೂ, ಹೈಕಮಾಂಡ್ ಯಾವುದೇ ವಿನಾಯಿತಿ ನೀಡದೆ ವಜಾ ಆದೇಶ ಹೊರಡಿಸಿದೆ.
ಇದನ್ನೂ ಓದಿ: ರಮೇಶ್ ಜಾರಕಿಹೊಳಿ ಭೇಟಿ ಹಾಗೂ ಸ್ಟಿಂಗ್ ಆಪರೇಷನ್ ವಿವಾದ: ರಾಜಕೀಯ ಮಹತ್ವವಿಲ್ಲ ಎಂದ ಮಾಜಿ ಸಿಎಂ ಸಿದ್ದರಾಮಯ್ಯ
7 ರಾಜ್ಯಗಳಲ್ಲಿ ಅಮಾನತು ಸರಣಿ: ಮಧ್ಯಪ್ರದೇಶದಲ್ಲಿ ಗರಿಷ್ಠ!
ಲಭ್ಯವಿರುವ ಅಧಿಕೃತ ದಾಖಲೆಗಳ ಪ್ರಕಾರ, ದೇಶದ ವಿವಿಧ 7 ರಾಜ್ಯಗಳಲ್ಲಿ ಯೂತ್ ಕಾಂಗ್ರೆಸ್ ಪದಾಧಿಕಾರಿಗಳಿಗೆ ಅಮಾನತಿನ ಬಿಸಿ ತಟ್ಟಿದೆ:
ಮಧ್ಯಪ್ರದೇಶ: 60 ಪದಾಧಿಕಾರಿಗಳು (ಗರಿಷ್ಠ)
ಗುಜರಾತ್: 49 ಪದಾಧಿಕಾರಿಗಳು
ಪಶ್ಚಿಮ ಬಂಗಾಳ: 26 ಪದಾಧಿಕಾರಿಗಳು
ತೆಲಂಗಾಣ: 14 ಪದಾಧಿಕಾರಿಗಳು
ಉತ್ತರ ಪ್ರದೇಶ: 13 ಪದಾಧಿಕಾರಿಗಳು
ಹಿಮಾಚಲ ಪ್ರದೇಶ: 13 ಪದಾಧಿಕಾರಿಗಳು
ಹರಿಯಾಣ: 10 ಪದಾಧಿಕಾರಿಗಳು
ರಾಜಕೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ