ಬೆಂಗಳೂರು: ಖ್ಯಾತ ರಿಯಾಲಿಟಿ ಶೋ ‘ಬಿಗ್ ಬಾಸ್ ಮಲಯಾಳಂ ಸೀಸನ್ 8’ರ (Bigg Boss Malayalam 8) ಆಟದಲ್ಲೀಗ ಭಾರಿ ಹೈಡ್ರಾಮಾ ಹಾಗೂ ಭಾವನಾತ್ಮಕ ತಿರುವು ಎದುರಾಗಿದೆ. ಸ್ಪರ್ಧಿ ನೇಹಾ ಫಾತಿಮಾ (Neha Fathima) ಅವರ ಪೋಷಕರು ಬಿಗ್ ಬಾಸ್ ಮನೆಗೆ ನೇರವಾಗಿ ಆಗಮಿಸಿ, ತಕ್ಷಣವೇ ರಿಯಾಲಿಟಿ ಶೋ ತೊರೆದು ಮನೆಗೆ ಹಿಂತಿರುಗುವಂತೆ ಮಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದಾರೆ.
ಸಹ ಸ್ಪರ್ಧಿ ಸಂತೋಷ್ ರಾಜ್ ಅಲಿಯಾಸ್ ತಶಿ (Tashi) ಜೊತೆ ನೇಹಾ ಹೊಂದಿದ್ದ ಅತಿಯಾದ ಆಪ್ತತೆ ಹಾಗೂ ಮದುವೆಯ ಪ್ರಸ್ತಾವನೆಗೆ ಪೋಷಕರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದು, ಈ ಕುಟುಂಬದ ಪ್ರವೇಶವು ಬಿಗ್ ಬಾಸ್ ಮನೆಯಲ್ಲಿ ಭಾರಿ ಸಂಚಲನ ಮೂಡಿಸಿದೆ.
ಪೋಷಕರ ಆಕ್ರೋಶಕ್ಕೆ ಕಾರಣವೇನು?:
ಬಿಗ್ ಬಾಸ್ ಮನೆಯೊಳಗೆ ನೇಹಾ ಅವರ ನಡವಳಿಕೆ ಹಾಗೂ ತಶಿ ಜೊತೆ ಬೆಳೆಸಿಕೊಂಡಿರುವ ಪ್ರೇಮಾಂಕುರ ಪೋಷಕರ ಅಸಮಾಧಾನಕ್ಕೆ ಕಾರಣವಾಗಿದೆ. ನೇಹಾ ಅವರನ್ನು ಆಟದಲ್ಲೂ ಹಾಗೂ ಭಾವನಾತ್ಮಕವಾಗಿಯೂ ಮ್ಯಾನಿಪುಲೇಟ್ (Manipulate) ಮಾಡಲಾಗುತ್ತಿದೆ ಎಂದು ತಾಯಿ ಕಳವಳ ವ್ಯಕ್ತಪಡಿಸಿದ್ದಾರೆ. ವಿಭಿನ್ನ ಧಾರ್ಮಿಕ ಹಿನ್ನೆಲೆಯುಳ್ಳ ತಶಿ ಜೊತೆಗಿನ ಸಂಬಂಧವನ್ನು ಹೊರಗೆ ಮುಂದುವರಿಸುವುದಾಗಿ ನೇಹಾ ಹೇಳಿದ್ದರು. ಆದರೆ, ಕುಟುಂಬದ ಸಮ್ಮತಿ ಇಲ್ಲದೆ ಈ ಸಂಬಂಧ ಒಪ್ಪಲು ಸಾಧ್ಯವಿಲ್ಲ ಎಂದು ಪೋಷಕರು ಪಟ್ಟು ಹಿಡಿದಿದ್ದು, ನೇಹಾ ಕಣ್ಣೀರಿಟ್ಟಿದ್ದಾರೆ. ಸಹ ಸ್ಪರ್ಧಿ ವೇದಾಂಗಿ ಜೊತೆ ತಶಿ ಆಪ್ತವಾಗಿ ಮಾತನಾಡಿದ್ದಕ್ಕೆ ನೇಹಾ ಹಿಂದೆ ಮುನಿಸಿಕೊಂಡಿದ್ದರು. ನಂತರ ತಶಿ ತಮ್ಮಿಬ್ಬರ ನಡುವೆ ಪ್ರೀತಿಯಿಲ್ಲ ಎಂದು ಸ್ಪಷ್ಟಪಡಿಸಿದ್ದರೂ, ಈ ಎಲ್ಲಾ ಗೊಂದಲಗಳು ಪೋಷಕರ ತೀವ್ರ ಆತಂಕಕ್ಕೆ ಕಾರಣವಾಗಿವೆ.
ಮಧ್ಯಪ್ರವೇಶಿಸಿದ ಮೋಹನ್‌ಲಾಲ್:
ಪೋಷಕರ ಭಾವನಾತ್ಮಕ ಪಟ್ಟನ್ನು ಕಂಡು ನಿರೂಪಕ ಹಾಗೂ ಸೂಪರ್‌ಸ್ಟಾರ್ ಮೋಹನ್‌ಲಾಲ್ (Mohanlal) ಮಧ್ಯಪ್ರವೇಶಿಸಿದರು. ತಂದೆಯಾಗಿ ಪೋಷಕರ ಕಾಳಜಿಯನ್ನು ತಾವು ಅರ್ಥಮಾಡಿಕೊಳ್ಳುವುದಾಗಿ ಹೇಳಿದ ಮೋಹನ್‌ಲಾಲ್, ಪರಿಸ್ಥಿತಿಯನ್ನು ತಿಳಿಗೊಳಿಸಲು ಯತ್ನಿಸಿದರು. ಆದಾಗ್ಯೂ, ಮಗಳನ್ನು ಮನೆಗೆ ಕರೆದೊಯ್ಯುವ ನಿರ್ಧಾರದಿಂದ ಪೋಷಕರು ಹಿಂದೆ ಸರಿಯಲಿಲ್ಲ.
ಬಿಗ್ ಬಾಸ್ ಆಟ ತೊರೆದರಾ ನೇಹಾ ಫಾತಿಮಾ?:
ಪೋಷಕರು ಶೋ ತೊರೆಯುವಂತೆ ಗಡುವ ನೀಡಿದ್ದರೂ, ಈ ವರದಿ ತಯಾರಾಗುವ ಸಮಯದವರೆಗೆ ನೇಹಾ ಫಾತಿಮಾ ಅವರು ಆಟದಿಂದ ಹೊರನಡೆಯುವ ಕುರಿತು ಯಾವುದೇ ಅಧಿಕೃತ ಅಂತಿಮ ನಿರ್ಧಾರ ಪ್ರಕಟಿಸಿಲ್ಲ. ಅವರು ಆಟ ಮುಂದುವರಿಸುತ್ತಾರೆಯೇ ಅಥವಾ ಪೋಷಕರ ಮಾತಿಗೆ ಓಗೊಟ್ಟು ಬಿಗ್ ಬಾಸ್ ಮನೆಗೆ ಬೈ-ಬೈ ಹೇಳುತ್ತಾರೆಯೇ ಎಂಬುದು ಮುಂಬರುವ ಸಂಚಿಕೆಗಳಲ್ಲಿ ಕುತೂಹಲ ಮೂಡಿಸಿದೆ.
ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ