ಖಾಲಿ ಹೊಟ್ಟೆಯಲ್ಲಿ ‘ಗ್ರೀನ್ ಜ್ಯೂಸ್’ ಕುಡಿಯುತ್ತಿದ್ದೀರಾ?: ತೂಕ ಇಳಿಸುವ ಆಸೆಗೆ ಬೀಳಬಹುದು ಬ್ರೇಕ್

ಇತ್ತೀಚಿನ ದಿನಗಳಲ್ಲಿ ಆರೋಗ್ಯದ ಕಡೆಗೆ ಗಮನ ಹರಿಸುವವರಲ್ಲಿ ‘ಗ್ರೀನ್ ಜ್ಯೂಸ್’ (ಹಸಿರು ತರಕಾರಿ ಮತ್ತು ಸೊಪ್ಪಿನ ರಸ) ಕುಡಿಯುವುದು ಒಂದು ದೊಡ್ಡ ಟ್ರೆಂಡ್ ಆಗಿದೆ. ದೇಹವನ್ನು ಡೀಟಾಕ್ಸ್ (ವಿಷಮುಕ್ತ) ಮಾಡಲು ಮತ್ತು ಸುಲಭವಾಗಿ ತೂಕ ಇಳಿಸಿಕೊಳ್ಳಲು (Weight Loss) ಸೆಲೆಬ್ರಿಟಿಗಳು ಹಾಗೂ ಸಾಮಾಜಿಕ ಜಾಲತಾಣಗಳು ಇದನ್ನು ವ್ಯಾಪಕವಾಗಿ ಪ್ರಚಾರ ಮಾಡುತ್ತಿವೆ. ಆದರೆ, ಬೆಳ್ಳಂಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಈ ಗ್ರೀನ್ ಜ್ಯೂಸ್ ಕುಡಿಯುವುದರಿಂದ ದೇಹಕ್ಕೆ ಒಳ್ಳೆಯದಾಗುವುದರ ಬದಲು ಜೀರ್ಣಕ್ರಿಯೆ ಸಂಪೂರ್ಣ ಏರುಪೇರಾಗಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಗ್ರೀನ್ ಜ್ಯೂಸ್‌ನಲ್ಲಿ ಏನೇನಿರುತ್ತೆ?:

ಸಾಮಾನ್ಯವಾಗಿ ಗ್ರೀನ್ ಜ್ಯೂಸ್ ತಯಾರಿಸಲು ಪಾಲಕ್, ಮೆಂತ್ಯ, ಕೊತ್ತಂಬರಿ, ಪುದೀನಾ ಹಾಗೂ ನುಗ್ಗೆಸೊಪ್ಪಿನಂತಹ ಎಲೆಕೋಸುಗಳನ್ನು ಬಳಸಲಾಗುತ್ತದೆ. ಇದರೊಂದಿಗೆ ಸೌತೆಕಾಯಿ, ಸೋರೆಕಾಯಿ, ಸೆಲರಿ, ಹಸಿರು ಕ್ಯಾಪ್ಸಿಕಂ ಮತ್ತು ಹಣ್ಣುಗಳಾದ ಹಸಿರು ಆಪಲ್, ಅನಾನಸ್, ಕಿವಿ, ನೆಲ್ಲಿಕಾಯಿ (ಆಮ್ಲಾ) ಹಾಗೂ ನಿಂಬೆ ರಸವನ್ನು ಮಿಶ್ರಣ ಮಾಡಲಾಗುತ್ತದೆ. ಈ ಎಲ್ಲಾ ಹಸಿರು ತರಕಾರಿ ಮತ್ತು ಸೊಪ್ಪುಗಳ ಅತಿಯಾದ ಮಿಶ್ರಣವೇ ಖಾಲಿ ಹೊಟ್ಟೆಗೆ ಸೇರಿದಾಗ ಆಸಿಡಿಟಿ ಮತ್ತು ಅಜೀರ್ಣಕ್ಕೆ ಕಾರಣವಾಗುತ್ತದೆ.

ಖಾಲಿ ಹೊಟ್ಟೆಯಲ್ಲಿ ಜ್ಯೂಸ್ ಕುಡಿದರೆ ಏನಾಗುತ್ತದೆ?

ಬೆಳಗ್ಗಿನ ಸಮಯದಲ್ಲಿ ನಮ್ಮ ಜಠರವು ಹೆಚ್ಚು ಆಮ್ಲೀಯವಾಗಿ (Acidic) ಇರುತ್ತದೆ. ಹಸಿ ತರಕಾರಿಗಳಲ್ಲಿರುವ ಕಠಿಣವಾದ ನಾರಿನಂಶವನ್ನು (Raw Fibre) ಜೀರ್ಣಿಸಿಕೊಳ್ಳಲು ಅಗತ್ಯವಿರುವ ಎಂಜೈಮ್‌ಗಳು ಆ ಸಮಯದಲ್ಲಿ ಸಂಪೂರ್ಣವಾಗಿ ಸಕ್ರಿಯವಾಗಿರುವುದಿಲ್ಲ. ಹೀಗಾಗಿ ಏಕಾಏಕಿ ಹೆಚ್ಚಿನ ಪ್ರಮಾಣದ ಹಸಿರು ರಸವು ಹೊಟ್ಟೆಯನ್ನು ಸೇರಿದಾಗ ಸೂಕ್ಷ್ಮವಾದ ಜಠರದ ಒಳಪದರವು (Stomach Lining) ಕಿರಿಕಿರಿಗೊಳ್ಳುತ್ತದೆ.

ಅಜೀರ್ಣಕ್ಕೆ ಪ್ರಮುಖ ಕಾರಣಗಳು:

ಹೆಚ್ಚಿನ ನಾರಿನ ಹೊರೆ (High Fibre Load): ಹಸಿ ಸೊಪ್ಪುಗಳಲ್ಲಿರುವ ಕಠಿಣ ನಾರನ್ನು ತಕ್ಷಣ ಜೀರ್ಣಿಸಿಕೊಳ್ಳಲು ಹೊಟ್ಟೆಗೆ ಸಾಧ್ಯವಾಗದೆ ಗ್ಯಾಸ್ ಮತ್ತು ಹೊಟ್ಟೆ ಉಬ್ಬರ ಉಂಟಾಗುತ್ತದೆ.

ಆಕ್ಸಲೇಟ್ ಸಂಯುಕ್ತಗಳು (Oxalates): ಪಾಲಕ್ ಮತ್ತು ಕೇಲ್‌ನಂತಹ ಸೊಪ್ಪುಗಳಲ್ಲಿ ಆಕ್ಸಲೇಟ್‌ಗಳು ಅಧಿಕವಾಗಿರುತ್ತವೆ. ಇವು ಖಾಲಿ ಹೊಟ್ಟೆಯಲ್ಲಿ ಜೀರ್ಣಾಂಗ ಗಾಯಗಳಿಗೆ ಕಾರಣವಾಗಬಹುದು.

ಪೋಷಕಾಂಶಗಳ ಹಠಾತ್ ಉಲ್ಬಣ: ಒಮ್ಮೆಗೆ ಸಾಂದ್ರೀಕೃತ ಪೋಷಕಾಂಶಗಳು (Concentrated Nutrients) ದೇಹ ಸೇರಿದಾಗ ಕರುಳು ಅದನ್ನು ನಿರ್ವಹಿಸಲು ಪರದಾಡುತ್ತದೆ.

ಕಂಡುಬರುವ ಪ್ರಮುಖ ಲಕ್ಷಣಗಳು:

ಗ್ರೀನ್ ಜ್ಯೂಸ್ ಕುಡಿದ ನಂತರ ನಿಮ್ಮ ದೇಹದಲ್ಲಿ ಈ ಕೆಳಗಿನ ಬದಲಾವಣೆಗಳು ಕಂಡುಬಂದರೆ ತಕ್ಷಣವೇ ಜ್ಯೂಸ್ ಕುಡಿಯುವುದನ್ನು ನಿಲ್ಲಿಸಿ:

ನಿರಂತರ ಹೊಟ್ಟೆ ಉಬ್ಬರ (Bloating) ಮತ್ತು ಗ್ಯಾಸ್

ಎದೆಯುರಿ ಅಥವಾ ಆಸಿಡ್ ರಿಫ್ಲಕ್ಸ್

ಹೊಟ್ಟೆ ಸೆಳೆತ ಮತ್ತು ವಾಕರಿಕೆ (Nausea)

ಬೆಳಗ್ಗಿನ ಅವಧಿಯಲ್ಲೇ ಅತಿಯಾದ ಸುಸ್ತು ಅಥವಾ ಎನರ್ಜಿ ಕ್ರ್ಯಾಶ್

ಗ್ಯಾಸ್ಟ್ರೋಎಂಟರಾಲಜಿಸ್ಟ್ ಏನಂತಾರೆ?: ಗುರುಗ್ರಾಮದ ಫೋರ್ಟಿಸ್ ಆಸ್ಪತ್ರೆಯ ಹೆಚ್ಚುವರಿ ನಿರ್ದೇಶಕರಾದ ಡಾ. ರಿಂಕೇಶ್ ಕುಮಾರ್ ಬನ್ಸಲ್ ಅವರ ಪ್ರಕಾರ, “ಸೂಕ್ಷ್ಮವಾದ ಕರುಳಿನ ಆರೋಗ್ಯ (Sensitive Gut) ಹೊಂದಿರುವವರು ಖಾಲಿ ಹೊಟ್ಟೆಯಲ್ಲಿ ಹಸಿ ತರಕಾರಿಗಳ ಜ್ಯೂಸ್ ಕುಡಿದರೆ ಜೀರ್ಣಾಂಗ ವ್ಯವಸ್ಥೆಯು ದಿಕ್ಕೆಟ್ಟು ಹೊಟ್ಟೆ ಉಬ್ಬರ ಅಥವಾ ಅಜೀರ್ಣದ ಸಮಸ್ಯೆ ಎದುರಾಗುತ್ತದೆ.”

ಯಾರೆಲ್ಲಾ ಈ ಜ್ಯೂಸ್ ಸೇವಿಸಬಾರದು?

ಐಬಿಎಸ್ (Irritable Bowel Syndrome – IBS) ಸಮಸ್ಯೆ ಇರುವವರು

ತೀವ್ರ ಆಸಿಡ್ ರಿಫ್ಲಕ್ಸ್ ಅಥವಾ ಗ್ಯಾಸ್ಟ್ರಿಟಿಸ್ ಇರುವವರು

ಜೀರ್ಣಶಕ್ತಿ ತೀರಾ ದುರ್ಬಲವಾಗಿರುವವರು

ಇದನ್ನೂ ಓದಿ: ಗರ್ಭಿಣಿಯರೇ ಎಚ್ಚರ!: ದಿನವಿಡೀ ಕುಳಿತಲ್ಲೇ ಕುಳಿತರೆ ದುಪ್ಪಟ್ಟಾಗಲಿದೆ ಹೆರಿಗೆಯ ಅಪಾಯ; ಸಂಶೋಧನೆಯಲ್ಲಿ ಸ್ಪೋಟಕ ಮಾಹಿತಿ

ಜ್ಯೂಸ್ ಕುಡಿಯಲು ಸರಿಯಾದ ಕ್ರಮ ಯಾವುದು?

ಬ್ರೇಕ್‌ಫಾಸ್ಟ್ ನಂತರ ಕುಡಿಯಿರಿ: ಬೆಳಗ್ಗೆ ಲಘು ಉಪಹಾರ ಸೇವಿಸಿದ ನಂತರ ಗ್ರೀನ್ ಜ್ಯೂಸ್ ಕುಡಿಯುವುದರಿಂದ ಹೊಟ್ಟೆಗೆ ಬಫರ್ ಸಿಗುತ್ತದೆ.

ಕಡಿಮೆ ಪ್ರಮಾಣದಿಂದ ಆರಂಭಿಸಿ: ಆರಂಭದಲ್ಲಿ ಸಣ್ಣ ಲೋಟದಿಂದ ಜ್ಯೂಸ್ ಕುಡಿಯಲು ಶುರು ಮಾಡಿ, ದೇಹ ಅದಕ್ಕೆ ಹೊಂದಿಕೊಳ್ಳಲು ಸಮಯ ಕೊಡಿ.

ಶುಂಠಿ ಬಳಸಿ: ಜ್ಯೂಸ್ ತಯಾರಿಸುವಾಗ ಸ್ವಲ್ಪ ಶುಂಠಿ ಅಥವಾ ನಿಂಬೆ ರಸ ಸೇರಿಸುವುದರಿಂದ ಜೀರ್ಣಶಕ್ತಿ ಹೆಚ್ಚುತ್ತದೆ.

ಬೆಳಗ್ಗಿನ ಉತ್ತಮ ಪರ್ಯಾಯಗಳು:

ಖಾಲಿ ಹೊಟ್ಟೆಗೆ ಗ್ರೀನ್ ಜ್ಯೂಸ್ ಕೊಡುವ ಬದಲು ಉಗುರುಬೆಚ್ಚಗಿನ ನೀರಿಗೆ ನಿಂಬೆ ರಸ ಸೇರಿಸಿ ಕುಡಿಯುವುದು, ನೆನೆಸಿದ ಒಣಫಲಗಳನ್ನು (Nuts) ತಿನ್ನುವುದು ಅಥವಾ ಗಿಡಮೂಲಿಕೆ ಚಹಾಗಳನ್ನು (Herbal Teas) ಸೇವಿಸುವುದು ಕರುಳಿನ ಆರೋಗ್ಯಕ್ಕೆ ಅತ್ಯಂತ ಹಿತಕರ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ