ದೆಹಲಿ: ನೌಕರರ ಭವಿಷ್ಯ ನಿಧಿ (EPF) ಖಾತೆ ಹೊಂದಿರುವ ದೇಶದ ಕೋಟ್ಯಂತರ ಉದ್ಯೋಗಿಗಳಿಗೆ ಕೇಂದ್ರ ಸರ್ಕಾರವು ಭರ್ಜರಿ ಸಿಹಿ ಸುದ್ದಿ ನೀಡಿದೆ. 2025-26ರ ಹಣಕಾಸು ವರ್ಷಕ್ಕೆ ಇಪಿಎಫ್ ಠೇವಣಿಗಳ ಮೇಲಿನ ಬಡ್ಡಿ ದರವನ್ನು ಶೇಕಡಾ 8.25 ರಷ್ಟು ಮುಂದುವರಿಸಲು ಕೇಂದ್ರ ಹಣಕಾಸು ಸಚಿವಾಲಯವು ಅಧಿಕೃತ ಅನುಮೋದನೆ ನೀಡಿದೆ. ಸರ್ಕಾರದ ಈ ನಿರ್ಧಾರದಿಂದಾಗಿ ನೌಕರರ ಭವಿಷ್ಯ ನಿಧಿ ಸಂಸ್ಥೆಯು (EPFO) ತನ್ನ 7 ಕೋಟಿಗೂ ಅಧಿಕ ಸಕ್ರಿಯ ಚಂದಾದಾರರ ಖಾತೆಗಳಿಗೆ ಪ್ರಸಕ್ತ ಜೂನ್ ತಿಂಗಳೊಳಗಾಗಿಯೇ ಬಡ್ಡಿಯ ಹಣವನ್ನು ಜಮಾ ಮಾಡಲು ದಾರಿ ಸುಲಭವಾಗಿದೆ.
ಹಣಕಾಸು ಸಚಿವಾಲಯದ ಒಪ್ಪಿಗೆ:
ಪಿಟಿಐ (PTI) ವರದಿಯ ಪ್ರಕಾರ, ಇಪಿಎಫ್ಒ ಸಂಸ್ಥೆಯ ಅತ್ಯುನ್ನತ ನಿರ್ಧಾರ ಕೈಗೊಳ್ಳುವ ಸಂಸ್ಥೆಯಾದ ಸೆಂಟ್ರಲ್ ಬೋರ್ಡ್ ಆಫ್ ಟ್ರಸ್ಟೀಸ್ (CBT) ಈ ವರ್ಷದ ಆರಂಭದಲ್ಲಿ ಶಿಫಾರಸು ಮಾಡಿದ್ದ ಶೇ. 8.25 ರಷ್ಟು ಬಡ್ಡಿ ದರದ ಪ್ರಸ್ತಾವನೆಗೆ ಹಣಕಾಸು ಸಚಿವಾಲಯವು ಔಪಚಾರಿಕ ಒಪ್ಪಿಗೆ ಮುದ್ರೆ ಒತ್ತಿದೆ. ಇಪಿಎಫ್ ಠೇವಣಿಗಳಿಗೆ ಭಾರತ ಸರ್ಕಾರವೇ ಗ್ಯಾರಂಟರ್ ಆಗಿರುವುದರಿಂದ, ಸಿಬಿಟಿ ಸಲ್ಲಿಸುವ ಪ್ರಸ್ತಾವನೆ ಜಾರಿಗೆ ಬರುವ ಮುನ್ನ ಹಣಕಾಸು ಇಲಾಖೆಯ ಅಧಿಕೃತ ಅನುಮೋದನೆ ಕಡ್ಡಾಯವಾಗಿರುತ್ತದೆ.
ಇದನ್ನೂ ಓದಿ: ವಿಶ್ವದ ಮೊದಲ ‘ಟ್ರಿಲಿಯನೇರ್’ ಆದ ಎಲೋನ್ ಮಸ್ಕ್
ಜೂನ್ ತಿಂಗಳಲ್ಲೇ ಖಾತೆಗೆ ಬರಲಿದೆ ಹಣ:
ಕೇಂದ್ರ ಕಾರ್ಮಿಕ ಸಚಿವ ಮನ್ಸುಖ್ ಮಾಂಡವಿಯಾ ಅವರ ಅಧ್ಯಕ್ಷತೆಯಲ್ಲಿ ಮಾರ್ಚ್ 2, 2026 ರಂದು ನಡೆದ ಸಿಬಿಟಿ ಸಭೆಯಲ್ಲಿ ಈ ಬಡ್ಡಿ ದರವನ್ನು ಅಂತಿಮಗೊಳಿಸಲಾಗಿತ್ತು. ಇದೀಗ ಹಣಕಾಸು ಸಚಿವಾಲಯದ ಹಸಿರು ನಿಶಾನೆ ಸಿಕ್ಕಿರುವುದರಿಂದ, ಇಪಿಎಫ್ಒ ಶೀಘ್ರದಲ್ಲೇ ಉದ್ಯೋಗಿಗಳ ಖಾತೆಗಳಿಗೆ ನೇರವಾಗಿ ಬಡ್ಡಿಯ ಆದಾಯವನ್ನು ವರ್ಗಾಯಿಸುವ ಪ್ರಕ್ರಿಯೆಯನ್ನು ಆರಂಭಿಸಲಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಬಡ್ಡಿ ದರದಲ್ಲಿ ಯಾವುದೇ ಬದಲಾವಣೆ ಮಾಡದೆ ಸ್ಥಿರತೆಯನ್ನು ಕಾಯ್ದುಕೊಂಡಿರುವುದು ಮಧ್ಯಮ ವರ್ಗದ ನೌಕರರಲ್ಲಿ ಸಂತಸ ತಂದಿದೆ.
ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
