ಸ್ಟಾಕ್‌ಹೋಮ್ : ಮಾನವ ಮೆದುಳಿನ ನರಕೋಶಗಳು (Nerve Cells) ಹೇಗೆ ಸಕ್ರಿಯಗೊಳ್ಳುತ್ತವೆ ಮತ್ತು ಹೇಗೆ ನಿಷ್ಕ್ರಿಯಗೊಳ್ಳುತ್ತವೆ ಎಂಬುದರ ರಹಸ್ಯವನ್ನು ಭೇದಿಸಿ, ಕ್ರಾಂತಿಕಾರಿ ತಂತ್ರಜ್ಞಾನವನ್ನು ಆವಿಷ್ಕರಿಸಿದ ಮೂವರು ವಿಜ್ಞಾನಿಗಳಿಗೆ 2026 ನೇ ಸಾಲಿನ ವೈದ್ಯಕೀಯ ಕ್ಷೇತ್ರದ ಪ್ರತಿಷ್ಠಿತ ನೊಬೆಲ್ ಪ್ರಶಸ್ತಿ (Nobel Prize in Medicine) ಒಲಿದಿದೆ. ಸ್ವೀಡನ್‌ನ ಸ್ಟಾಕ್‌ಹೋಮ್‌ನಲ್ಲಿರುವ ‘ಕರೋಲಿನ್ಸ್ಕಾ ಇನ್‌ಸ್ಟಿಟ್ಯೂಟ್’ ಸೋಮವಾರ ಈ ನೊಬೆಲ್ ಗೌರವವನ್ನು ಪ್ರಕಟಿಸಿದ್ದು, ಇದರೊಂದಿಗೆ ಈ ವರ್ಷದ ಸಾಪ್ತಾಹಿಕ ನೊಬೆಲ್ ಪ್ರಶಸ್ತಿಗಳ ಸರಣಿ ಅಧಿಕೃತವಾಗಿ ಆರಂಭಗೊಂಡಿದೆ.
ನೊಬೆಲ್ ಪುರಸ್ಕೃತ ವಿಜ್ಞಾನಿಗಳು ಯಾರು?
ಈ ಬಾರಿ ವೈದ್ಯಕೀಯ ನೊಬೆಲ್ ಪ್ರಶಸ್ತಿಯನ್ನು ಅಮೆರಿಕ ಮತ್ತು ಜರ್ಮನಿಯ ಪ್ರಸಿದ್ಧ ವಿಶ್ವವಿದ್ಯಾಲಯಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಮೂವರು ಪ್ರಮುಖ ವಿಜ್ಞಾನಿಗಳಿಗೆ ಜಂಟಿಯಾಗಿ ನೀಡಲಾಗಿದೆ. ಕಾರ್ಲ್ ಡೈಸರಾತ್ (54) ಅಮೆರಿಕದ ಕ್ಯಾಲಿಫೋರ್ನಿಯಾದ ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯದ ವಿಜ್ಞಾನಿ. ಪೀಟರ್ ಹೆಗೆಮನ್ ( 71) ಜರ್ಮನಿಯ ಬರ್ಲಿನ್‌ನ ಹಂಬೋಲ್ಟ್ ವಿಶ್ವವಿದ್ಯಾಲಯದ ವಿಜ್ಞಾನಿ. ಜಾರ್ಜ್ ನಗೆಲ್ ( 73) ಜರ್ಮನಿಯ ವೂರ್ಜ್‌ಬರ್ಗ್ ವಿಶ್ವವಿದ್ಯಾಲಯದ ವಿಜ್ಞಾನಿ.
ಏನಿದು ‘ಆಪ್ಟೊಜೆನೆಟಿಕ್ಸ್’ ಸಂಶೋಧನೆ?:
ಮೂವರೂ ವಿಜ್ಞಾನಿಗಳು ‘ಲೈಟ್-ಗೇಟೆಡ್ ಅಯಾನ್ ಚಾನೆಲ್ಸ್’ ಹಾಗೂ ‘ಆಪ್ಟೊಜೆನೆಟಿಕ್ಸ್’ ಕ್ಷೇತ್ರದಲ್ಲಿ ನಡೆಸಿದ ಅಭೂತಪೂರ್ವ ಸಂಶೋಧನೆಗೆ ಈ ಗೌರವ ನೀಡಲಾಗಿದೆ. ಏಕಕೋಶೀಯ ಹಸಿರು ಶೈವಲಗಳು (Green Algae) ಬೆಳಕಿನತ್ತ ಹೇಗೆ ಈಜುತ್ತವೆ ಎಂಬುದನ್ನು ಪೀಟರ್ ಹೆಗೆಮನ್ ಮತ್ತು ಜಾರ್ಜ್ ನಗೆಲ್ ಅಭ್ಯಾಸ ಮಾಡಿದರು. ಈ ವೇಳೆ ನೀಲಿ ಬೆಳಕಿಗೆ ಸ್ಪಂದಿಸಿ ವಿದ್ಯುತ್ ಸಂಕೇತಗಳನ್ನು ರೂಪಿಸುವ ನಿರ್ದಿಷ್ಟ ಪ್ರೋಟೀನ್ ಅನ್ನು ಅವರು ಕಂಡುಹಿಡಿದರು.
ಕಾರ್ಲ್ ಡೈಸರಾತ್ ಅವರು ಈ ಪ್ರೋಟೀನ್ ಅನ್ನು ನಿಯಂತ್ರಿಸುವ ತಳೀಯ ವ್ಯವಸ್ಥೆಯನ್ನು ಬಳಸಿಕೊಂಡು, ಜೀವಂತ ಇಲಿಗಳ ಮೆದುಳಿನಲ್ಲಿರುವ ನರಕೋಶಗಳನ್ನು ಬೆಳಕಿನ ಮೂಲಕವೇ ‘ಆನ್ ಮತ್ತು ಆಫ್’ ಮಾಡುವ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದರು. ಈ ವಿಧಾನವು ಮೆದುಳಿನ ಜಟಿಲ ಕಾರ್ಯವೈಖರಿ, ಮನುಷ್ಯನ ನಡವಳಿಕೆಗಳು ಮತ್ತು ವಿವಿಧ ನರಸಂಬಂಧಿ ಕಾಯಿಲೆಗಳಿಗೆ ಕಾರಣವಾಗುವ ಪ್ರಕ್ರಿಯೆಗಳನ್ನು ಅರ್ಥಮಾಡಿಕೊಳ್ಳಲು ವಿಶ್ವಾದ್ಯಂತ ಪ್ರಯೋಗಾಲಯಗಳಲ್ಲಿ ಬಳಕೆಯಾಗುತ್ತಿದೆ.
ಈ ಪ್ರಶಸ್ತಿಯು 12 ಮಿಲಿಯನ್ ಸ್ವೀಡಿಷ್ ಕ್ರೋನರ್ (ಸುಮಾರು $1.2 ಮಿಲಿಯನ್ ಡಾಲರ್ / ಭಾರತೀಯ ಮೌಲ್ಯದಲ್ಲಿ ಸುಮಾರು ₹10 ಕೋಟಿಗೂ ಅಧಿಕ) ನಗದು ಬಹುಮಾನವನ್ನು ಒಳಗೊಂಡಿದ್ದು, ಮೂವರೂ ವಿಜ್ಞಾನಿಗಳು ಇದನ್ನು ಹಂಚಿಕೊಳ್ಳಲಿದ್ದಾರೆ. ವೈದ್ಯಕೀಯ ನೊಬೆಲ್ ಬಳಿಕ, ಮಂಗಳವಾರ ಭೌತಶಾಸ್ತ್ರ, ಬುಧವಾರ ರಸಾಯನಶಾಸ್ತ್ರ, ಗುರುವಾರ ಸಾಹಿತ್ಯ, ಶುಕ್ರವಾರ ಶಾಂತಿ ನೊಬೆಲ್ ಹಾಗೂ ಅಕ್ಟೋಬರ್ 12 ರಂದು ಅರ್ಥಶಾಸ್ತ್ರದ ನೊಬೆಲ್ ಪ್ರಶಸ್ತಿಗಳು ಪ್ರಕಟವಾಗಲಿವೆ.