ಲೇಡಿ ಗೋಷನ್ ಆಸ್ಪತ್ರೆಯ ವಿಶೇಷ ಸಾಧನೆಗೆ ರಾಜ್ಯ ಗೌರವ

ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯ ಪ್ರತಿಷ್ಠಿತ ಸರ್ಕಾರಿ ಲೇಡಿ ಗೋಷನ್ ಆಸ್ಪತ್ರೆಗೆ ಮತ್ತೊಂದು ಅಭೂತಪೂರ್ವ ಹಿರಿಮೆ ಸಂದಿದೆ. ಕಾನೂನುಬದ್ಧ ಗರ್ಭಪಾತ ಹಾಗೂ ಗರ್ಭಪಾತೋತ್ತರ ಆರೈಕೆಯಲ್ಲಿ ಶೇ.100 ರಷ್ಟು ತಾಯಂದಿರ ಆರೋಗ್ಯ ಭದ್ರತೆಯನ್ನು ಕಾಯ್ದುಕೊಂಡು, ‘ಶೂನ್ಯ ತಾಯಂದಿರ ಮರಣ’ ಸಾಧಿಸಿದ ಹಿನ್ನೆಲೆಯಲ್ಲಿ ಆಸ್ಪತ್ರೆಯು ರಾಜ್ಯಮಟ್ಟದ ‘ಅತ್ಯುತ್ತಮ ಜಿಲ್ಲಾ ಆಸ್ಪತ್ರೆ’ ಪ್ರಶಸ್ತಿಗೆ ಭಾಜನವಾಗಿದೆ.

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಹಾಗೂ ‘ಐಪಾಸ್ ಫೌಂಡೇಶನ್’ ಜಂಟಿಯಾಗಿ ನಡೆಸಿದ ರಾಜ್ಯಮಟ್ಟದ ಸಮೀಕ್ಷೆಯಲ್ಲಿ ಲೇಡಿ ಗೋಷನ್ ಆಸ್ಪತ್ರೆಯು ಈ ಮಹತ್ವದ ಗೌರವಕ್ಕೆ ಆಯ್ಕೆಯಾಗಿದೆ.

304 ಕಾನೂನುಬದ್ಧ ಗರ್ಭಪಾತ – ಶೇ. 100 ಸುರಕ್ಷಿತ ಕಾರ್ಯಾಚರಣೆ:

ಆಸ್ಪತ್ರೆಯು ಪರಿಚಯಿಸಿದ ಸಮಗ್ರ ಗರ್ಭಪಾತ ಆರೈಕೆ ಕಾರ್ಯಕ್ರಮದ ಗುಣಮಟ್ಟದ ನಿರ್ವಹಣೆಯಿಂದಾಗಿ 2025-26ರ ಹಣಕಾಸು ವರ್ಷದಲ್ಲಿ ಒಟ್ಟು 304 ಕಾನೂನುಬದ್ಧ ಗರ್ಭಪಾತಗಳನ್ನು ಯಶಸ್ವಿಯಾಗಿ ನಿರ್ವಹಿಸಲಾಗಿದೆ. ಒಂದೇ ಒಂದು ತಾಯಿಯ ಮರಣ ಸಂಭವಿಸದಿರುವುದು ಈ ಆಸ್ಪತ್ರೆಯ ಸೇವೆಯ ಶ್ರೇಷ್ಠತೆಗೆ ಸಾಕ್ಷಿಯಾಗಿದೆ.

ಗರ್ಭಪಾತದ ಅಂಕಿ-ಅಂಶಗಳು (2025-26):

ಮೊದಲ 9 ವಾರಗಳ ಅವಧಿ: 191 ಗರ್ಭಪಾತಗಳು

10 ರಿಂದ 12 ವಾರಗಳು: 31

12 ರಿಂದ 20 ವಾರಗಳು: 52

20 ರಿಂದ 24 ವಾರಗಳು: 25

24 ವಾರಗಳ ನಂತರದ ಜಟಿಲ ಪ್ರಕರಣಗಳು: 5

ಒಟ್ಟು ಯಶಸ್ವಿ ಪ್ರಕರಣಗಳು: 304

ಇದರೊಂದಿಗೆ, ಚಿಕಿತ್ಸೆ ಪಡೆದ ಶೇ. 95 ರಷ್ಟು ಫಲಾನುಭವಿಗಳಿಗೆ ಸೂಕ್ತ ಆಪ್ತಸಮಾಲೋಚನೆ ನಡೆಸಿ ಕುಟುಂಬ ಯೋಜನೆ ಅಳವಡಿಸಿಕೊಳ್ಳುವಂತೆ ಪ್ರೇರೇಪಿಸುವಲ್ಲೂ ಆಸ್ಪತ್ರೆ ಯಶಸ್ವಿಯಾಗಿದೆ.

ಇದನ್ನೂ ಓದಿ: ನಾಡಿನಾದ್ಯಂತ 71ನೇ ಕನ್ನಡ ರಾಜ್ಯೋತ್ಸವ ಸಂಭ್ರಮ: ಮನೆಮನಗಳಲ್ಲಿ ಕನ್ನಡಿಗರ ಸ್ವಾಭಿಮಾನದ ಹಬ್ಬ

‘ಶೂನ್ಯ ಮರಣ’ ಸಾಧನೆಗೆ ನೆರವಾದ ನೂತನ ತಂತ್ರಜ್ಞಾನ ಹಾಗೂ ಸೌಲಭ್ಯಗಳು:

ಲೇಡಿ ಗೋಷನ್ ಆಸ್ಪತ್ರೆಯಲ್ಲಿ ಇತ್ತೀಚೆಗೆ ಆರಂಭಿಸಲಾದ ಹಲವು ಸುಧಾರಿತ ಚಿಕಿತ್ಸಾ ವ್ಯವಸ್ಥೆಗಳು ಈ ಸಾಧನೆಗೆ ಪ್ರಮುಖ ಕಾರಣವಾಗಿವೆ. ಗರ್ಭಿಣಿಯರ ತೀವ್ರತರದ ಆರೋಗ್ಯ ಸಮಸ್ಯೆಗಳನ್ನು ಮೇಲ್ವಿಚಾರಣೆ ಮಾಡುವ ವಾಟ್ಸಾಪ್ ಆಧಾರಿತ ‘ಹೈ-ರಿಸ್ಕ್ ಪ್ರೆಗ್ನೆನ್ಸಿ ಟ್ರ್ಯಾಕಿಂಗ್ ಸಿಸ್ಟಮ್’ . ತೀವ್ರ ನಿಗಾ ಅಗತ್ಯವಿರುವ ಗರ್ಭಿಣಿಯರಿಗಾಗಿ ವಿಶೇಷ ‘ಆಬ್ಸ್ಟೆಟ್ರಿಕ್ ಇಂಟೆನ್ಸಿವ್ ಕೇರ್ ಯುನಿಟ್’ (ICU) ಮತ್ತು ‘ಕ್ರಿಟಿಕಲ್ ಕೇರ್ ಯುನಿಟ್’ (CCU). ಅಪಾಯಕಾರಿ ಹೆರಿಗೆ ಪ್ರಕರಣಗಳಿಗಾಗಿ ಪ್ರತ್ಯೇಕವಾಗಿ ಕಾರ್ಯಾಚರಿಸುವ ಹೈ-ರಿಸ್ಕ್ ಡೆಲಿವರಿ ಯುನಿಟ್.

ಈ ಐತಿಹಾಸಿಕ ಸಾಧನೆ ಕುರಿತು ಮಾತನಾಡಿದ ಲೇಡಿ ಗೋಷನ್ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ (Medical Superintendent) ಡಾ. ದುರ್ಗಾಪ್ರಸಾದ್ ಎಂ.ಆರ್. ಅವರು, “ಕೆಎಂಸಿ (KMC) ಆಸ್ಪತ್ರೆಯ ಸ್ತ್ರೀರೋಗ ಮತ್ತು ಪ್ರಸೂತಿ, ಅರಿವಳಿಕೆ (Anaesthesia), ರೇಡಿಯೋ-ಡಯಾಗ್ನೋಸಿಸ್ ಹಾಗೂ ನವಜಾತ ಶಿಶು ವಿಭಾಗದ (Neonatology) ತಜ್ಞ ವೈದ್ಯರ ಶ್ರಮ ಮತ್ತು ಆಸ್ಪತ್ರೆಯ ಶುಶ್ರೂಷಕರು (Nursing Staff), ಪ್ಯಾರಾಮೆಡಿಕಲ್ ಹಾಗೂ ತಾಂತ್ರಿಕ ಸಿಬ್ಬಂದಿಯ ನಿರಂತರ ಸೇವೆ ಈ ಪ್ರಶಸ್ತಿಗೆ ಮುಖ್ಯ ಕಾರಣ,” ಎಂದು ಎಲ್ಲರನ್ನೂ ಶ್ಲಾಘಿಸಿದರು.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ