ಮಂಗಳೂರು: ಕನ್ನಡ ಭಾಷೆಯ ಬಗ್ಗೆ ಅಪಾರ ಅಭಿಮಾನ ಹೊಂದಿರುವುದು ಹೆಮ್ಮೆಯ ವಿಚಾರ. ಆದರೆ ಆ ಅಭಿಮಾನ ಇತರ ಭಾಷೆಗಳನ್ನು ಮಾತನಾಡುವವರನ್ನು ದೂರ ಮಾಡುವ ಗೋಡೆಯಾಗಬಾರದು. ಪ್ರೀತಿ ಮತ್ತು ಗೌರವದ ಮೂಲಕ ಜನರನ್ನು ಒಗ್ಗೂಡಿಸುವುದೇ ನಿಜವಾದ ಭಾಷಾಭಿಮಾನ ಎಂದು ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ಯು.ಟಿ. ಖಾದರ್ ಹೇಳಿದರು.
ನಗರದ ನೆಹರೂ ಮೈದಾನದಲ್ಲಿ ಭಾನುವಾರ ನಡೆದ 71ನೇ ಕನ್ನಡ ರಾಜ್ಯೋತ್ಸವ ಸಮಾರಂಭದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. ಕನ್ನಡ ಕೇವಲ ಒಂದು ಭಾಷೆಯಲ್ಲ, ಅದು ಈ ನೆಲದ ಅಸ್ಮಿತೆ ಮತ್ತು ಆತ್ಮ. ಕಾವೇರಿಯ ನಿರಂತರ ಹರಿವು, ಸಹ್ಯಾದ್ರಿಯ ಗಾಂಭೀರ್ಯ ಹಾಗೂ ಕರಾವಳಿಯ ಅಲೆಗಳ ಲಯದಲ್ಲಿ ಕನ್ನಡದ ಸೊಗಡು ಅಡಗಿದೆ. ಕನ್ನಡವು ನಮ್ಮ ಶ್ರೀಮಂತ ಇತಿಹಾಸದ ಹೆಮ್ಮೆಯಷ್ಟೇ ಅಲ್ಲ, ಭವಿಷ್ಯದ ಹೊಣೆಗಾರಿಕೆಯೂ ಹೌದು ಎಂದು ಅವರು ಹೇಳಿದರು.
ಇದನ್ನೂ ಓದಿ: ನಾಡಧ್ವಜಕ್ಕೆ ಅಧಿಕೃತ ಮಾನ್ಯತೆ ಪಡೆಯಲು ಬದ್ಧ: ಸಚಿವ ಯು.ಟಿ. ಖಾದರ್
ಕನ್ನಡದ ಸಾಹಿತ್ಯ ಪರಂಪರೆಯನ್ನು ಸ್ಮರಿಸಿದ ಸಚಿವರು, ಆದಿಕವಿ ಪಂಪನ ದೂರದೃಷ್ಟಿಯ ಬರಹಗಳು, ಬಸವಣ್ಣನವರ ಸಮಾನತೆಯ ವಚನಗಳು, ಅಕ್ಕಮಹಾದೇವಿಯವರ ಆತ್ಮಜ್ಞಾನದ ಚಿಂತನೆಗಳು ಹಾಗೂ ಕುವೆಂಪು ಅವರ ವಿಶ್ವಮಾನವ ಸಂದೇಶವು ಜಾತಿ, ಧರ್ಮ ಮತ್ತು ಲಿಂಗದ ಸಂಕುಚಿತ ಗಡಿಗಳನ್ನು ಮೀರಿ ಸಮಾಜವನ್ನು ಮುನ್ನಡೆಸುತ್ತವೆ ಎಂದರು.
ಕನ್ನಡಕ್ಕೆ ಶಾಸ್ತ್ರೀಯ ಭಾಷೆಯ ಸ್ಥಾನಮಾನ ದೊರೆತಿರುವುದು, ಸುಮಾರು 2,000 ವರ್ಷಗಳ ಇತಿಹಾಸ ಹಾಗೂ ಎಂಟು ಜ್ಞಾನಪೀಠ ಪ್ರಶಸ್ತಿಗಳ ಸಾಧನೆ ಕನ್ನಡದ ಸಾಹಿತ್ಯ ಶ್ರೀಮಂತಿಕೆಗೆ ಸಾಕ್ಷಿಯಾಗಿದೆ ಎಂದು ಹೇಳಿದರು. ಕನ್ನಡಿಗರು ಜಗತ್ತಿನ ಯಾವುದೇ ಭಾಗದಲ್ಲಿದ್ದರೂ ತಮ್ಮ ಭಾಷೆ ಮತ್ತು ಸಂಸ್ಕೃತಿಯ ಬೇರುಗಳನ್ನು ಮರೆಯಬಾರದು ಎಂದು ಕರೆ ನೀಡಿದರು.