ಐಷಾರಾಮಿ ಕಾರುಗಳ ತಯಾರಕ ಲ್ಯಾಂಡ್ ರೋವರ್ ಭಾರತದಲ್ಲಿ ತನ್ನ ವಿಶೇಷ ಆವೃತ್ತಿಯ Range Rover SV Sawai Collection ಕಾರುಗಳನ್ನು ಬಿಡುಗಡೆ ಮಾಡಿದೆ. ಈ ಕಾರಿನ ಎಕ್ಸ್‌ಶೋರೂಂ ಬೆಲೆ ₹4.90 ಕೋಟಿ ಆಗಿದ್ದು, ದೇಶಾದ್ಯಂತ ಕೇವಲ 18 ಕಾರುಗಳನ್ನು ಮಾತ್ರ ಮಾರಾಟಕ್ಕೆ ನೀಡಲಾಗುತ್ತಿದೆ. ರಾಜಸ್ಥಾನದ ಜೈಪುರ, ಜೋಧ್‌ಪುರ ಮತ್ತು ಜೈಸಲ್ಮೇರ್ ನಗರಗಳ ಸಾಂಸ್ಕೃತಿಕ ಪರಂಪರೆ ಹಾಗೂ ವಾಸ್ತುಶಿಲ್ಪದಿಂದ ಪ್ರೇರಣೆ ಪಡೆದು ಈ ವಿಶೇಷ ಕಾರುಗಳನ್ನು ವಿನ್ಯಾಸಗೊಳಿಸಲಾಗಿದೆ.
ಭಾರತೀಯ ಗ್ರಾಹಕರಿಗಾಗಿ ರೂಪಿಸಿರುವ ಲ್ಯಾಂಡ್ ರೋವರ್‌ನ ಮೂರನೇ ವಿಶೇಷ ಬೆಸ್ಪೋಕ್ ಸರಣಿ ಇದಾಗಿದೆ. ಈ ಹಿಂದೆ SV Ranthambore ಮತ್ತು SV Masara ಆವೃತ್ತಿಗಳನ್ನು ಕಂಪನಿ ಪರಿಚಯಿಸಿತ್ತು.
ಮೂರು ನಗರಗಳ ಹೆಸರಿನಲ್ಲಿ ಮೂರು ವಿಶೇಷ ಆವೃತ್ತಿಗಳು
ಸವಾಯಿ ಕಲೆಕ್ಷನ್‌ನಲ್ಲಿ ಮೂರು ಆವೃತ್ತಿಗಳಿದ್ದು, ಪ್ರತಿಯೊಂದರ ಆರು ಕಾರುಗಳಂತೆ ಒಟ್ಟು 18 ಕಾರುಗಳನ್ನು ತಯಾರಿಸಲಾಗಿದೆ.
Sawai Jaipur: ಗುಲಾಬಿ ನಗರದ ಪರಂಪರೆಯಿಂದ ಪ್ರೇರಿತವಾದ ಗುಲಾಬಿ ಛಾಯೆಯ ಹೊರಭಾಗ ಹಾಗೂ Ecru ಮತ್ತು Deep Garnet ಬಣ್ಣಗಳ ಒಳಾಂಗಣವನ್ನು ಹೊಂದಿದೆ. ಹವಾ ಮಹಲ್‌ನ ಜರೋಖಾ ವಿನ್ಯಾಸದಿಂದ ಪ್ರೇರಿತವಾದ ಸೀಟ್ ಕಸೂತಿ ಇದರ ವಿಶೇಷತೆ.
Sawai Jodhpur: ನೀಲಿ ನಗರದ ಗುರುತನ್ನು ಪ್ರತಿಬಿಂಬಿಸುವ ತಿಳಿ ನೀಲಿ ಬಣ್ಣದ ಹೊರಭಾಗ ಮತ್ತು Perlino ಹಾಗೂ Riviera ಥೀಮ್‌ನ ಒಳಾಂಗಣವನ್ನು ಹೊಂದಿದೆ. ಜೋಧ್‌ಪುರದ ಅರಮನೆಗಳು ಮತ್ತು ಕೋಟೆಗಳ ಜಾಲರಿ ವಿನ್ಯಾಸದಿಂದ ಪ್ರೇರಿತವಾದ ಕಸೂತಿ ಆಸನಗಳಲ್ಲಿದೆ.
ಇದನ್ನೂ ಓದಿ: ಕಾರುಗಳ ಬಳಿಕ ಇ-ಸ್ಕೂಟರ್ ಮಾರುಕಟ್ಟೆಗೆ ಚೆರಿ ಎಂಟ್ರಿ!: ಬರೋಬ್ಬರಿ 200 ಕಿಮೀ ಮೈಲೇಜ್
Sawai Jaisalmer: ಚಿನ್ನದ ನಗರದ ಮರಳುಗಲ್ಲಿನ ಬಣ್ಣಗಳಿಂದ ಪ್ರೇರಿತವಾದ ಗೋಲ್ಡನ್ ಹೊರಭಾಗ ಹಾಗೂ Perlino ಮತ್ತು Caraway ಬಣ್ಣಗಳ ಒಳಾಂಗಣವನ್ನು ಒಳಗೊಂಡಿದೆ. ಜೈಸಲ್ಮೇರ್ ಕೋಟೆಯ ವಾಸ್ತುಶಿಲ್ಪ ಮತ್ತು ಸಾಂಪ್ರದಾಯಿಕ ಬ್ಲಾಕ್ ಪ್ರಿಂಟಿಂಗ್ ವಿನ್ಯಾಸಗಳು ಸೀಟ್ ಕಸೂತಿಯಲ್ಲಿ ಪ್ರತಿಫಲಿಸಿವೆ.
ಮೂರು ಆವೃತ್ತಿಗಳಲ್ಲಿಯೂ 23 ಇಂಚಿನ Champagne ಅಲಾಯ್ ವೀಲ್‌ಗಳು, Atlas Silver ಬಾಹ್ಯ ವಿನ್ಯಾಸ ಪ್ಯಾಕ್ ಮತ್ತು 24 ಕ್ಯಾರೆಟ್ ಚಿನ್ನದ ಲೇಪನ ಹೊಂದಿರುವ ರೇಂಜ್ ರೋವರ್ ಲೋಗೋ ಅಲಂಕಾರಗಳಿವೆ. ಪ್ರತಿ ಕಾರಿನಲ್ಲೂ ಆವೃತ್ತಿಯ ಹೆಸರು ಮತ್ತು ‘1 of 6’ ಎಂಬ ಗುರುತಿನೊಂದಿಗೆ ವಿಶೇಷ ಫಲಕವನ್ನು ನೀಡಲಾಗಿದೆ.
ನಾಲ್ಕು ಆಸನಗಳ ವಿನ್ಯಾಸ, ಶಕ್ತಿಶಾಲಿ V8 ಎಂಜಿನ್
ಎಲ್ಲ 18 ಕಾರುಗಳು ಲಾಂಗ್ ವೀಲ್‌ಬೇಸ್ Range Rover SV ಆಧಾರಿತವಾಗಿದ್ದು, ನಾಲ್ಕು ಆಸನಗಳ ಐಷಾರಾಮಿ ವಿನ್ಯಾಸವನ್ನು ಹೊಂದಿವೆ. ಹಿಂಬದಿಯ ಪ್ರಯಾಣಿಕರಿಗಾಗಿ ಒರಗಿಸಬಹುದಾದ ಆಸನಗಳು, ಹೀಟಿಂಗ್, ಕೂಲಿಂಗ್ ಮತ್ತು ಮಸಾಜ್ ಸೌಲಭ್ಯಗಳನ್ನು ನೀಡಲಾಗಿದೆ. ಜೊತೆಗೆ ಹಿಂಬದಿ ಎಂಟರ್‌ಟೈನ್‌ಮೆಂಟ್ ಸ್ಕ್ರೀನ್‌ಗಳು ಮತ್ತು ಮಡಚಬಹುದಾದ ಟೇಬಲ್‌ಗಳೂ ಇವೆ.
ಈ ವಿಶೇಷ ಕಾರುಗಳಲ್ಲಿ 4.4-ಲೀಟರ್ ಟ್ವಿನ್-ಟರ್ಬೊ ಪೆಟ್ರೋಲ್ V8 ಎಂಜಿನ್ ಅಳವಡಿಸಲಾಗಿದೆ. ಇದು 537 hp ಗರಿಷ್ಠ ಶಕ್ತಿ ಮತ್ತು 750 Nm ಟಾರ್ಕ್ ಉತ್ಪಾದಿಸುತ್ತದೆ. ಎಂಟು-ವೇಗದ ಆಟೋಮ್ಯಾಟಿಕ್ ಗೇರ್‌ಬಾಕ್ಸ್ ಮೂಲಕ ಎಂಜಿನ್ ಶಕ್ತಿ ಚಕ್ರಗಳಿಗೆ ರವಾನೆಯಾಗುತ್ತದೆ.
ಭಾರತೀಯ ಸಂಸ್ಕೃತಿಗೆ ಐಷಾರಾಮಿ ಸ್ಪರ್ಶ
ಸ್ಥಳೀಯ ಸಂಸ್ಕೃತಿ ಮತ್ತು ಪರಂಪರೆಯನ್ನು ಆಧುನಿಕ ಐಷಾರಾಮಿ ಕಾರುಗಳ ವಿನ್ಯಾಸದಲ್ಲಿ ಅಳವಡಿಸುವ ಉದ್ದೇಶದಿಂದ ಲ್ಯಾಂಡ್ ರೋವರ್ ಈ ವಿಶೇಷ ಸರಣಿಯನ್ನು ರೂಪಿಸಿದೆ. ಸೀಮಿತ ಸಂಖ್ಯೆಯಲ್ಲಿ ಮಾತ್ರ ಲಭ್ಯವಿರುವ ಈ ಕಾರುಗಳು ವಿಶಿಷ್ಟ ವಿನ್ಯಾಸ ಮತ್ತು ವೈಯಕ್ತಿಕೀಕರಣಕ್ಕೆ ಆದ್ಯತೆ ನೀಡುವ ಗ್ರಾಹಕರನ್ನು ಗುರಿಯಾಗಿಸಿಕೊಂಡಿವೆ.