ಮುಂಬೈ: ನೀವು ಷೇರು ಮಾರುಕಟ್ಟೆಯಲ್ಲಿ (Stock Market) ಹೂಡಿಕೆ ಮಾಡುತ್ತಿದ್ದೀರಾ? ಕಂಪನಿಗಳ ಲಾಭಾಂಶ ಅಥವಾ ಡಿವಿಡೆಂಡ್ (Dividend Payout) ಪಡೆಯುವ ಆಸೆ ನಿಮಗಿದೆಯೇ? ಹಾಗಿದ್ದರೆ ಇಂದು (ಮೇ 27, ಬುಧವಾರ) ನಿಮಗೆ ಅತ್ಯಂತ ಪ್ರಮುಖ ದಿನವಾಗಿದೆ. ಬಜಾಜ್ ಆಟೋ, ಬ್ಯಾಂಕ್ ಆಫ್ ಇಂಡಿಯಾ, ಗ್ಲ್ಯಾಕ್ಸೋಸ್ಮಿತ್ಕ್ಲೈನ್ ಮತ್ತು ಟೊರೆಂಟ್ ಫಾರ್ಮಾ ಸೇರಿದಂತೆ ಹಲವು ಪ್ರಮುಖ ಕಂಪನಿಗಳ ಷೇರುಗಳನ್ನು ಖರೀದಿಸಿ ಅವುಗಳ ಡಿವಿಡೆಂಡ್ ಪಡೆಯಲು ಚಿಲ್ಲರೆ ಹೂಡಿಕೆದಾರರಿಗೆ (Retail Investors) ಇಂದು ಕೊನೆಯ ದಿನವಾಗಿದೆ.
ಇಂದೇ ಕೊನೆ ದಿನ ಏಕೆ?:
ಭಾರತೀಯ ಷೇರು ಮಾರುಕಟ್ಟೆಯು ಪ್ರಸ್ತುತ ‘T+1’ ಸೆಟಲ್ಮೆಂಟ್ ನಿಯಮವನ್ನು (T+1 Settlement Cycle) ಪಾಲಿಸುತ್ತಿದೆ. ಇದರ ಅನ್ವಯ ಷೇರುಗಳನ್ನು ಖರೀದಿಸಿದ ಮರುದಿನವೇ ಅವು ನಿಮ್ಮ ಖಾತೆಗೆ ಜಮೆಯಾಗುತ್ತವೆ. ಮೇ 28 ರಂದು ‘ಬಕ್ರೀದ್’ ಹಬ್ಬದ ನಿಮಿತ್ತ ಷೇರು ಮಾರುಕಟ್ಟೆಗೆ ಅಧಿಕೃತ ರಜೆ ಇರುವುದರಿಂದ, ಹೂಡಿಕೆದಾರರು ಮುಂಬರುವ ಡಿವಿಡೆಂಡ್ಗೆ ಅರ್ಹರಾಗಲು ಮೇ 27 ರ ಒಳಗಾಗಿಯೇ ಷೇರುಗಳನ್ನು ಖರೀದಿಸಿ ತಮ್ಮ ಪೋರ್ಟ್ಫೋಲಿಯೊದಲ್ಲಿ ಹೊಂದಿರಬೇಕಾಗುತ್ತದೆ. ರೆಕಾರ್ಡ್ ಡೇಟ್ (Record Date) ದಿನದಂದು ಖರೀದಿಸುವ ಷೇರುಗಳಿಗೆ ಡಿವಿಡೆಂಡ್ ಲಾಭ ಸಿಗುವುದಿಲ್ಲ.
ಯಾವ ಕಂಪನಿ ಎಷ್ಟು ಡಿವಿಡೆಂಡ್ ಘೋಷಿಸಿದೆ? (ಪ್ರತಿ ಷೇರಿಗೆ):
| ಕಂಪನಿಯ ಹೆಸರು | ಡಿವಿಡೆಂಡ್ ಮೊತ್ತ (ರೂಪಾಯಿಗಳಲ್ಲಿ) |
| ಬಜಾಜ್ ಆಟೋ ಲಿಮಿಟೆಡ್ (Bajaj Auto) | ರೂ. 150.00 (ಅಂತಿಮ ಡಿವಿಡೆಂಡ್) |
| ಗ್ಲ್ಯಾಕ್ಸೋಸ್ಮಿತ್ಕ್ಲೈನ್ ಫಾರ್ಮಾ (GSK) | ರೂ. 57.00 (ಅಂತಿಮ ಡಿವಿಡೆಂಡ್) |
| ಜೆಬಿ ಕೆಮಿಕಲ್ಸ್ ಅಂಡ್ ಫಾರ್ಮಾ | ರೂ. 9.30 |
| ಟೊರೆಂಟ್ ಫಾರ್ಮಾಸ್ಯುಟಿಕಲ್ಸ್ | ರೂ. 9.00 |
| ಎರಿಸ್ ಲೈಫ್ ಸೈನ್ಸಸ್ | ರೂ. 7.21 (ಮಧ್ಯಂತರ ಡಿವಿಡೆಂಡ್) |
| ಐಸಿಐಸಿಐ ಲೊಂಬಾರ್ಡ್ ಇನ್ಶೂರೆನ್ಸ್ | ರೂ. 7.00 |
| ಹೋಮ್ ಫಸ್ಟ್ ಫೈನಾನ್ಸ್ ಕಂಪನಿ | ರೂ. 5.20 |
| ಬ್ಯಾಂಕ್ ಆಫ್ ಇಂಡಿಯಾ (BOI) | ರೂ. 4.65 |
| ಎಸ್ ಚಂದ್ ಅಂಡ್ ಕಂಪನಿ | ರೂ. 4.00 |
| ಯುನೊ ಮಿಂಡಾ ಲಿಮಿಟೆಡ್ (UNO Minda) | ರೂ. 1.75 |
| ಬಿಸಿಪಿಎಲ್ ರೈಲ್ವೇ ಇನ್ಫ್ರಾಸ್ಟ್ರಕ್ಚರ್ | ರೂ. 1.00 |
| ಅಡ್ವಾಣಿ ಹೋಟೆಲ್ಸ್ ಅಂಡ್ ರೆಸಾರ್ಟ್ಸ್ | ರೂ. 0.80 |
ಡಿವಿಡೆಂಡ್ ಅಂದರೇನು ಮತ್ತು ತೆರಿಗೆ ನಿಯಮಗಳೇನು?:
ಒಂದು ಕಂಪನಿಯು ಗಳಿಸುವ ಒಟ್ಟು ಲಾಭದ ಒಂದು ನಿರ್ದಿಷ್ಟ ಪಾಲನ್ನು ತನ್ನ ಷೇರುದಾರರಿಗೆ ಬಹುಮಾನದ ರೂಪದಲ್ಲಿ ಹಂಚಿಕೆ ಮಾಡುವುದನ್ನು ‘ಡಿವಿಡೆಂಡ್’ ಅಥವಾ ಲಾಭಾಂಶ ಎನ್ನಲಾಗುತ್ತದೆ. ಕಂಪನಿಗಳು ಇವುಗಳನ್ನು ಫೈನಲ್, ಮಧ್ಯಂತರ (Interim) ಅಥವಾ ವಿಶೇಷ ಪೇಔಟ್ ರೂಪದಲ್ಲಿ ನೀಡುತ್ತವೆ.
ಇದನ್ನೂ ಓದಿ: 11 ದಿನಗಳಲ್ಲಿ 4ನೇ ಬಾರಿ ಪೆಟ್ರೋಲ್, ಡೀಸೆಲ್ ದರ ಭಾರಿ ಏರಿಕೆ
ನೆನಪಿರಲಿ – ತೆರಿಗೆ ಅನ್ವಯವಾಗುತ್ತದೆ:
ಹೂಡಿಕೆದಾರರು ಪಡೆಯುವ ಡಿವಿಡೆಂಡ್ ಆದಾಯವು ಸಂಪೂರ್ಣವಾಗಿ ತೆರಿಗೆಗೆ ಒಳಪಡುತ್ತದೆ. ಪ್ರಸ್ತುತ ಜಾರಿಯಲ್ಲಿರುವ ಆದಾಯ ತೆರಿಗೆ ನಿಯಮಗಳ ಪ್ರಕಾರ, ಒಂದು ಹಣಕಾಸು ವರ್ಷದಲ್ಲಿ ನಿಮ್ಮ ಡಿವಿಡೆಂಡ್ ಆದಾಯವು 5,000 ರೂಪಾಯಿ ದಾಟಿದರೆ, ಹೂಡಿಕೆದಾರರ ಖಾತೆಯಿಂದ ಶೇಕಡಾ 10 ರಷ್ಟು ಟಿಡಿಎಸ್ (TDS – Tax Deducted at Source) ಕಡಿತಗೊಳಿಸಲಾಗುತ್ತದೆ.
ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
