ದೆಹಲಿ: ಆಂಧ್ರಪ್ರದೇಶದಲ್ಲಿ ಇತ್ತೀಚಿನ ವಾರಗಳಲ್ಲಿ ಒಟ್ಟು 8 ಕೋವಿಡ್ ಧನಾತ್ಮಕ (Positive) ಪ್ರಕರಣಗಳು ವರದಿಯಾಗಿದ್ದು, ಇಬ್ಬರು ಸಾವನ್ನಪ್ಪಿದ್ದಾರೆ. ಈ ಹಿನ್ನೆಲೆಯಲ್ಲಿ ಪರಿಸ್ಥಿತಿ ಕೈಮೀರಿ ಹೋಗದಂತೆ ತಡೆಯಲು ಆರೋಗ್ಯ ಇಲಾಖೆಯು ಕಣ್ಗಾವಲು ಮತ್ತು ಮುನ್ನೆಚ್ಚರಿಕೆ ಕ್ರಮಗಳನ್ನು ತೀವ್ರಗೊಳಿಸಿದೆ.
ಮತ್ತೊಂದೆಡೆ, ಮಹಾರಾಷ್ಟ್ರದ ಮುಂಬೈನಲ್ಲಿ ಖ್ಯಾತ ಹಿರಿಯ ಗಾಯಕ ಕುಮಾರ್ ಸಾನು ಅವರ ಪುತ್ರ ಹಾಗೂ ಗಾಯಕ ಜಾನ್ ಕುಮಾರ್ ಸಾನು ಅವರಿಗೂ ಕೋವಿಡ್ ಪಾಸಿಟಿವ್ ದೃಢಪಟ್ಟಿದ್ದು, ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಈ ಇಬ್ಬರು ರೋಗಿಗಳ ಸಾವು ಹಾಗೂ ಪ್ರಕರಣಗಳ ಉಲ್ಬಣಕ್ಕೆ ಸಂಬಂಧಿಸಿದಂತೆ ರಾಜ್ಯಗಳ ಆರೋಗ್ಯ ಇಲಾಖೆಗಳು ತೀವ್ರ ಕಟ್ಟೆಚ್ಚರ ವಹಿಸಿವೆ.
ಆಂಧ್ರಪ್ರದೇಶದಲ್ಲಿ ಸಾವು ಹಾಗೂ ಒಡಿಶಾದ ಮುನ್ನೆಚ್ಚರಿಕೆ:
ಆಂಧ್ರಪ್ರದೇಶದ ಪರಿಸ್ಥಿತಿ: ವೈಎಸ್ಆರ್ ಕಡಪ ಜಿಲ್ಲೆಯ 52 ವರ್ಷದ ವ್ಯಕ್ತಿಯೊಬ್ಬರು ಜ್ವರ ಮತ್ತು ಕೆಮ್ಮಿನ ಲಕ್ಷಣಗಳ ನಂತರ ಕೋವಿಡ್ ಪಾಸಿಟಿವ್ ಆಗಿದ್ದರು. ಮತ್ತೊಬ್ಬ 43 ವರ್ಷದ ವ್ಯಕ್ತಿಗೂ ಸೋಂಕು ತಗುಲಿ, ನಂತರ ಇಬ್ಬರೂ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ. ಈ ಹಿನ್ನೆಲೆಯಲ್ಲಿ ಆರೋಗ್ಯ ಇಲಾಖೆಯು ಕಡಪ ಜಿಲ್ಲೆಗೆ ತುರ್ತು ಸ್ಪಂದನಾ ತಂಡಗಳನ್ನು ರವಾನಿಸಿದೆ.
ಒಡಿಶಾ ಗಡಿಯಲ್ಲಿ ತಪಾಸಣೆ: ನೆರೆಯ ಆಂಧ್ರಪ್ರದೇಶದಲ್ಲಿ ಸಾವುಗಳು ಸಂಭವಿಸಿರುವ ಕಾರಣ, ಒಡಿಶಾ ಸರ್ಕಾರವು ತನ್ನ ಗಡಿಭಾಗದ ದಕ್ಷಿಣ ಜಿಲ್ಲೆಗಳಾದ ಮಲ್ಕಾನ್ಗಿರಿ, ಕೊರಾಪುಟ್, ರಾಯಗಡ, ಗಜಪತಿ, ಗಂಜಾಂ ಮತ್ತು ನವರಂಗಪುರಗಳಲ್ಲಿ ಹೈ ಅಲರ್ಟ್ ಘೋಷಿಸಿದ್ದು, ಗಡಿ ಕಣ್ಗಾವಲನ್ನು ಬಿಗಿಗೊಳಿಸಿದೆ. ಸದ್ಯಕ್ಕೆ ಒಡಿಶಾದಲ್ಲಿ ಯಾವುದೇ ಸಕ್ರಿಯ ಪ್ರಕರಣಗಳಿಲ್ಲ.
ಭಾರತೀಯರು ಆತಂಕ ಪಡುವ ಅಗತ್ಯವಿದೆಯೇ?
ಖಂಡಿತವಾಗಿಯೂ ಇಲ್ಲ. ತಜ್ಞರ ಪ್ರಕಾರ ಸದ್ಯಕ್ಕೆ ಯಾವುದೇ ಆತಂಕ ಅಥವಾ ಭೀತಿಯ ಅಗತ್ಯವಿಲ್ಲ.
ಹೈಬ್ರಿಡ್ ಇಮ್ಯುನಿಟಿ: ಭಾರತದ ಬಹುತೇಕ ಜನಸಂಖ್ಯೆಯು ಈಗಾಗಲೇ ಲಸಿಕೆ ಮತ್ತು ಹಿಂದಿನ ಸೋಂಕುಗಳಿಂದ ಬಲವಾದ ‘ಹೈಬ್ರಿಡ್ ರೋಗನಿರೋಧಕ ಶಕ್ತಿ’ಯನ್ನು ಹೊಂದಿದೆ. ಹೀಗಾಗಿ ಸೋಂಕು ತೀವ್ರವಾಗಿ ಹರಡುವ ಸಾಧ್ಯತೆ ತೀರಾ ಕಡಿಮೆ ಇದೆ.
ಸಹ-ಅನಾರೋಗ್ಯ ಕಾರಣ: “ಮೃತಪಟ್ಟ ಇಬ್ಬರು ರೋಗಿಗಳು ತೀವ್ರ ಮಧುಮೇಹ, ಯಕೃತ್ತು ಮತ್ತು ಮೂತ್ರಪಿಂಡದ ಕಾಯಿಲೆಗಳಂತಹ ಇತರ ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ಹೊಂದಿದ್ದರು. ಇಂತಹ ರೋಗಿಗಳಿಗೆ ಕೇವಲ ಕೋವಿಡ್ ಮಾತ್ರವಲ್ಲದೆ ಸಾಮಾನ್ಯ ಫ್ಲೂ ವೈರಸ್ ತಗುಲಿದರೂ ಪರಿಸ್ಥಿತಿ ಗಂಭೀರವಾಗಬಹುದು,” ಎಂದು ಹೈದರಾಬಾದ್ನ ಯಶೋದಾ ಆಸ್ಪತ್ರೆಯ ಹಿರಿಯ ತಜ್ಞ ವೈದ್ಯ ಡಾ. ದಿಲಿಪ್ ಗುಡೆ ಸ್ಪಷ್ಟಪಡಿಸಿದ್ದಾರೆ.
ಇದನ್ನೂ ಓದಿ: ಬೆಳಿಗ್ಗಿನ ಚಹಾಕ್ಕೆ ಸಕ್ಕರೆ ಬದಲು ಒಂದು ತುಂಡು ಬೆಲ್ಲ ಹಾಕಿ ನೋಡಿ; ನಿಮ್ಮ ಆರೋಗ್ಯಕ್ಕಿದೆ ಹತ್ತಾರು ಲಾಭ
ಗಮನಿಸಬೇಕಾದ ಪ್ರಮುಖ ಲಕ್ಷಣಗಳು
ಕೋವಿಡ್ ಲಕ್ಷಣಗಳು ಸಾಮಾನ್ಯ ಜ್ವರದಂತೆಯೇ ಇರುತ್ತವೆಯಾದರೂ, ಈ ಕೆಳಗಿನ ಲಕ್ಷಣಗಳ ತೀವ್ರತೆಯನ್ನು ಸೂಕ್ಷ್ಮವಾಗಿ ಗಮನಿಸಬೇಕು:
ಆರಂಭಿಕ ಲಕ್ಷಣಗಳು: ಸೌಮ್ಯ ಜ್ವರ, ನಿರಂತರ ಒಣ ಕೆಮ್ಮು, ಗಂಟಲು ನೋವು ಮತ್ತು ಮೂಗು ಸೋರುವುದು.
ದೈಹಿಕ ಆಯಾಸ: ತೀವ್ರ ಆಯಾಸ, ಮೈ ಕೈ ನೋವು, ಸ್ನಾಯು ನೋವು ಮತ್ತು ತಲೆನೋವು.
ಜೀರ್ಣಾಂಗ ತೊಂದರೆಗಳು: ಕೆಲವು ಹೊಸ ತಳಿಗಳಿಂದ ಸೌಮ್ಯ ಭೇದಿ, ವಾಕರಿಕೆ ಅಥವಾ ಹೊಟ್ಟೆಯ ಅಸ್ವಸ್ಥತೆ ಕಾಣಿಸಿಕೊಳ್ಳಬಹುದು.
ಅಪಾಯದ ಮುನ್ಸೂಚನೆ: ಉಸಿರಾಟದ ತೊಂದರೆ, ಎದೆ ನೋವು ಅಥವಾ ಆಮ್ಲಜನಕದ ಮಟ್ಟ ಶೇ. 93 ಕ್ಕಿಂತ ಕಡಿಮೆ ಕುಸಿಯುವುದು. ಇಂತಹ ಲಕ್ಷಣಗಳು ಕಂಡ ತಕ್ಷಣ ವೈದ್ಯರನ್ನು ಸಂಪರ್ಕಿಸಬೇಕು.
ತೆಗೆದುಕೊಳ್ಳಬೇಕಾದ ಮುನ್ನೆಚ್ಚರಿಕೆಗಳು:
ವಯಸ್ಸಾದವರು, ಗರ್ಭಿಣಿಯರು ಹಾಗೂ ಇತರ ಗಂಭೀರ ಕಾಯಿಲೆ (ಮಧುಮೇಹ, ಬಿಪಿ, ಮೂತ್ರಪಿಂಡದ ಕಾಯಿಲೆ) ಇರುವವರು ಹೆಚ್ಚು ಜಾಗರೂಕರಾಗಿರಬೇಕು.
ಮಾಸ್ಕ್ ಧರಿಸಿ: ಆಸ್ಪತ್ರೆಗಳು, ಕ್ಲಿನಿಕ್ಗಳು ಅಥವಾ ಜನನಿಬಿಡ ಪ್ರದೇಶಗಳಿಗೆ ಹೋಗುವಾಗ ಮಾಸ್ಕ್ ಧರಿಸುವುದು ಸೂಕ್ತ.
ಕೈಗಳ ಸ್ವಚ್ಛತೆ: ಸೋಪ್ ಅಥವಾ ಸ್ಯಾನಿಟೈಸರ್ ಬಳಸಿ ಕೈಗಳನ್ನು ಆಗಾಗ್ಗೆ ಸ್ವಚ್ಛಗೊಳಿಸಿ.
ಸ್ವಯಂ ಪ್ರತ್ಯೇಕತೆ : ಜ್ವರ ಅಥವಾ ಕೆಮ್ಮು ಕಾಣಿಸಿಕೊಂಡರೆ ತಕ್ಷಣವೇ ಮನೆಯಲ್ಲಿ ಪ್ರತ್ಯೇಕವಾಗಿರಿ.
“ಕೋವಿಡ್ ಮುಗಿದುಹೋಗಿದೆ ಎಂದು ನಿರ್ಲಕ್ಷಿಸಬೇಡಿ. ಇದು ಈಗ ಸಾಂಕ್ರಾಮಿಕದಿಂದ ಸೀಮಿತ ರೋಗವಾಗಿ ಬದಲಾಗಿದ್ದು, ಆಗಾಗ್ಗೆ ಸಣ್ಣ ಪ್ರಮಾಣದಲ್ಲಿ ಕಾಣಿಸಿಕೊಳ್ಳಬಹುದು. ಹೀಗಾಗಿ ಮುನ್ನೆಚ್ಚರಿಕೆಯೇ ನಮಗಿರುವ ಪ್ರಮುಖ ಅಸ್ತ್ರ,” ಎಂದು ಆಸ್ಟರ್ ವೈಟ್ಫೀಲ್ಡ್ ಆಸ್ಪತ್ರೆಯ ಶ್ವಾಸಕೋಶ ತಜ್ಞ ಡಾ. ಶಿವರಾಜ್ ಎಲ್. ಬಿ. ತಿಳಿಸಿದ್ದಾರೆ.
ಪ್ರಸ್ತುತ ಮಹಾರಾಷ್ಟ್ರದಲ್ಲಿ ಪರಿಸ್ಥಿತಿ ನಿಯಂತ್ರಣದಲ್ಲಿದ್ದು, ಆಂಧ್ರ ಮತ್ತು ಒಡಿಶಾ ಸರ್ಕಾರಗಳು ಮುನ್ನೆಚ್ಚರಿಕೆ ಕ್ರಮವಾಗಿ ಸೂಕ್ತ ನಿಗಾ ವಹಿಸಿವೆ. ಸಾರ್ವಜನಿಕರು ಸಾಮಾಜಿಕ ಜಾಲತಾಣಗಳ ವದಂತಿಗಳಿಗೆ ಕಿವಿಗೊಡದೆ ಕೇವಲ ಅಧಿಕೃತ ಮೂಲಗಳ ಮಾಹಿತಿಯನ್ನು ಮಾತ್ರ ನಂಬಬೇಕಾಗಿ ವಿನಂತಿ.