ಇಟಾನಗರ: ಅರುಣಾಚಲ ಪ್ರದೇಶದ ಗಡಿ ಜಿಲ್ಲೆಯಾದ ಅಂಜಾವ್ನಲ್ಲಿ ಲೋಹಿತ್ ನದಿಗೆ (Lohit River) ಅಡ್ಡಲಾಗಿ ನಿರ್ಮಿಸಲಾಗಿದ್ದ ಅತ್ಯಂತ ಪ್ರಮುಖ ಬೈಲಿ ಸೇತುವೆ (Bailey Bridge) ಸಾಮರ್ಥ್ಯಕ್ಕಿಂತ ಹೆಚ್ಚಿನ ಭಾರ ಹೊತ್ತ ವಾಹನಗಳ ಸಂಚಾರದಿಂದಾಗಿ ತೀವ್ರ ಹಾನಿಗೊಳಗಾಗಿದೆ. ಘಟನೆಯ ಬೆನ್ನಲ್ಲೇ ಸೇತುವೆಯ ಮೇಲಿನ ಸಾರಿಗೆ ಸಂಚಾರವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗಿದೆ.
ಗಡಿ ಭಾಗಕ್ಕೆ ಸಂಪರ್ಕ ಕಲ್ಪಿಸುವ ಏಕೈಕ ಮುಖ್ಯ ರಸ್ತೆಯಲ್ಲಿರುವ ಈ ಬೈಲಿ ಸೇತುವೆಯು ನಿಯಮ ಮೀರಿ ಓವರ್ಲೋಡ್ (Overloaded) ವಾಹನಗಳು ಸಂಚರಿಸಿದ್ದರಿಂದ ರಚನಾತ್ಮಕವಾಗಿ ಹಾನಿಗೊಳಗಾಗಿದೆ. ಸ್ಥಳೀಯರ ಮಾಹಿತಿಯ ಪ್ರಕಾರ, ಭಾರೀ ಪ್ರಮಾಣದ ಸರಕು ಹೊತ್ತೊಯ್ಯುತ್ತಿದ್ದ ಟ್ರಕ್ ಒಂದನ್ನು ಚಲಾಯಿಸುವಾಗ ಸೇತುವೆಯ ಮಧ್ಯಭಾಗದಲ್ಲಿಯೇ ಅದು ಸಿಲುಕಿಕೊಂಡಿದೆ. ಇದರಿಂದಾಗಿ ಸೇತುವೆ ಮತ್ತಷ್ಟು ಅಪಾಯಕಾರಿ ಸ್ಥಿತಿಗೆ ತಲುಪಿದೆ.
ಇದನ್ನೂ ಓದಿ: ಭಾರತದಲ್ಲಿ ಎವರೆಸ್ಟ್, ಲಾಲ್ಜಿ ಗೋಧೂ ಹಿಂಗುಗಳ ಮಾರಾಟಕ್ಕೆ FSSAI ತಾತ್ಕಾಲಿಕ ನಿಷೇಧ
ಸೇತುವೆ ಹಾನಿಗೊಳಗಾಗಿರುವುದರಿಂದ ಅಂಜಾವ್ ಜಿಲ್ಲೆಯ ಹಲವು ಪ್ರಮುಖ ಗಡಿ ಭಾಗಗಳಿಗೆ ವಾಹನ ಸಂಚಾರ ಸಂಪೂರ್ಣವಾಗಿ ಕಡಿತಗೊಂಡಿದ್ದು, ಸ್ಥಳೀಯ ಸಾರ್ವಜನಿಕರು ಹಾಗೂ ಸೇನಾ ಪಡೆಗಳ ಸಂಚಾರಕ್ಕೆ ತಾತ್ಕಾಲಿಕ ತೊಡಕುಂಟಾಗಿದೆ. ತಕ್ಷಣವೇ ತಾಂತ್ರಿಕ ತಂಡಗಳು ಸ್ಥಳಕ್ಕೆ ಆಗಮಿಸಿದ್ದು, ದುರಸ್ತಿ ಕಾರ್ಯ ಕೈಗೊಳ್ಳಲು ಮುಂದಾಗಿವೆ.