ಟೀಂ ಇಂಡಿಯಾ ನಾಯಕ ಶುಭ್ಮನ್ ಗಿಲ್ ವೆಸ್ಟ್ ಇಂಡೀಸ್ ವಿರುದ್ಧದ ಏಕದಿನ ಸರಣಿಯಲ್ಲಿ ರನ್ ಹೊಳೆಯನ್ನೇ ಹರಿಸುತ್ತಿದ್ದಾರೆ. ಗುವಾಹಟಿಯಲ್ಲಿ ನಡೆಯುತ್ತಿರುವ ಸರಣಿಯ ಎರಡನೇ ಏಕದಿನ ಪಂದ್ಯದಲ್ಲಿ ವಿಂಡೀಸ್ ನೀಡಿದ 405 ರನ್ಗಳ ಬೃಹತ್ ಸವಾಲನ್ನು ಬೆನ್ನಟ್ಟಿದ ಭಾರತಕ್ಕೆ ನಾಯಕ ಶುಭ್ಮನ್ ಗಿಲ್ ಸಿಡಿಲಬ್ಬರದ ಶತಕ ಸಿಡಿಸಿ ಆಸರೆಯಾಗಿದ್ದಾರೆ.
ತಿರುವನಂತಪುರಂನಲ್ಲಿ ನಡೆದ ಮೊದಲ ಪಂದ್ಯದಲ್ಲಿ 110 ರನ್ ಕಲೆಹಾಕಿದ್ದ ಗಿಲ್, ಇದೀಗ ಎರಡನೇ ಪಂದ್ಯದಲ್ಲೂ ಮೂರಂಕಿ ಮೊತ್ತ ದಾಟುವ ಮೂಲಕ ಏಕದಿನ ಕ್ರಿಕೆಟ್‌ನಲ್ಲಿ ತಮ್ಮ 11ನೇ ಶತಕವನ್ನು ಪೂರೈಸಿದ್ದಾರೆ. ಮಾಜಿ ನಾಯಕ ರೋಹಿತ್ ಶರ್ಮಾ ಅವರೊಂದಿಗೆ ಸೇರಿ ಕೇವಲ 20 ಓವರ್‌ಗಳಲ್ಲಿ ತಂಡದ ಮೊತ್ತವನ್ನು 200 ರನ್ಗಳ ಗಡಿ ದಾಟಿಸುವ ಮೂಲಕ ಭದ್ರ ಬುನಾದಿ ಹಾಕಿಕೊಟ್ಟಿದ್ದಾರೆ.
ಇದನ್ನೂ ಓದಿ: ಏಷ್ಯನ್ ಗೇಮ್ಸ್ 2026: 4x400m ರಿಲೇಯಲ್ಲಿ ಭಾರತೀಯ ವನಿತೆಯರ ಬಂಗಾರದ ಓಟ
ಕೇವಲ 62 ಎಸೆತಗಳಲ್ಲಿ ಶತಕ ಪೂರೈಸಿದ ಶುಭ್ಮನ್ ಗಿಲ್ ಅವರಿಗೆ ಇದು ಏಕದಿನ ವೃತ್ತಿಜೀವನದ ಅತ್ಯಂತ ವೇಗದ ಶತಕವಾಗಿದೆ. ಅಷ್ಟೇ ಅಲ್ಲದೆ, ಭಾರತೀಯ ನೆಲದಲ್ಲಿ ಗಿಲ್ ಸಿಡಿಸಿದ ಸತತ ಮೂರನೇ ಏಕದಿನ ಶತಕ ಇದಾಗಿದ್ದು, ಭಾರತದ ಪರ ಏಕದಿನ ಇತಿಹಾಸದಲ್ಲಿ ದಾಖಲಾದ ಜಂಟಿ 4ನೇ ಅತಿ ವೇಗದ ಶತಕ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
| ಕ್ರಿಕೆಟಿಗ | ಎಸೆತಗಳು | ಎದುರಾಳಿ ತಂಡ | ಸ್ಥಳ ಹಾಗೂ ವರ್ಷ |
| ವಿರಾಟ್ ಕೊಹ್ಲಿ | 52 | ಆಸ್ಟ್ರೇಲಿಯಾ | ಜೈಪುರ, 2013 |
| ವೀರೇಂದ್ರ ಸೆಹ್ವಾಗ್ | 60 | ನ್ಯೂಜಿಲೆಂಡ್ | ಹ್ಯಾಮಿಲ್ಟನ್, 2009 |
| ವಿರಾಟ್ ಕೊಹ್ಲಿ | 61 | ಆಸ್ಟ್ರೇಲಿಯಾ | ನಾಗ್ಪುರ, 2013 |
| ಮೊಹಮ್ಮದ್ ಅಜರುದ್ದೀನ್ | 62 | ನ್ಯೂಜಿಲೆಂಡ್ | ಬರೋಡಾ, 1988 |
| ಶುಭ್ಮನ್ ಗಿಲ್ | 62 | ವೆಸ್ಟ್ ಇಂಡೀಸ್ | ಗುವಾಹಟಿ, 2026 |