“ಜೀವ ಕಾರುಣ್ಯವೇ ಧರ್ಮದ ಮೂಲ” ಎಂಬುದು ಸನಾತನ ಹಿಂದೂ ಧರ್ಮದ ಪ್ರಮುಖ ತತ್ವವಾಗಿದೆ. ನಮ್ಮ ಪುರಾಣಗಳು ಮತ್ತು ಶಾಸ್ತ್ರಗಳಲ್ಲಿ ಪ್ರತಿಯೊಂದು ಜೀವಿಯಲ್ಲೂ ದೇವರನ್ನು ಕಾಣುವ ವಿಶಿಷ್ಟ ಪರಂಪರೆ ಇದೆ. ಆದರೆ, ಇಂದಿನ ದಿನಗಳಲ್ಲಿ ಅನೇಕರು ತಮಗಾಗಿ ಬದುಕುವ ಮೂಕ ಪ್ರಾಣಿಗಳ ಮೇಲೆ ಕ್ರೌರ್ಯ ಮೆರೆಯುವುದನ್ನು ನಾವು ಕಾಣುತ್ತೇವೆ. ಹಿಂದೂ ಶಾಸ್ತ್ರಗಳ ಪ್ರಕಾರ, ಮಾತು ಬರದ ಪ್ರಾಣಿಗಳಿಗೆ ಹಿಂಸೆ ನೀಡುವುದು ಅಥವಾ ಹೊಡೆಯುವುದು ಮಹಾಪಾಪ ಎಂದು ಪರಿಗಣಿಸಲಾಗಿದೆ. ಇದರ ಹಿಂದಿರುವ ಧಾರ್ಮಿಕ ಕಾರಣಗಳು ಮತ್ತು ಕರ್ಮಫಲದ ಭೀಕರತೆಯ ಕುರಿತಾದ ವಿಶೇಷ ಮಾಹಿತಿ ಇಲ್ಲಿದೆ:
ಪ್ರತಿಯೊಂದು ಪ್ರಾಣಿಯೂ ದೇವತೆಗಳ ವಾಹನ:
ಹಿಂದೂ ಧರ್ಮದಲ್ಲಿ ಪ್ರಕೃತಿ ಮತ್ತು ಪ್ರಾಣಿಗಳನ್ನು ದೇವರಿಗೆ ಹೋಲಿಸಲಾಗಿದೆ. ಶಿವನಿಗೆ ನಂದಿ (ಎತ್ತು), ವಿಷ್ಣುವಿಗೆ ಗರುಡ, ಲಕ್ಷ್ಮಿಗೆ ಆನೆ, ಸರಸ್ವತಿಗೆ ಹಂಸ, ಗಣೇಶನಿಗೆ ಮೂಷಿಕ (ಇಲಿ) ಹಾಗೂ ಶನಿದೇವನಿಗೆ ಕಾಗೆ ವಾಹನಗಳಾಗಿವೆ. ಇನ್ನು ಹಸುವಿನಲ್ಲಿ 33 ಕೋಟಿ ದೇವತೆಗಳು ನೆಲೆಸಿದ್ದಾರೆ ಎಂಬ ನಂಬಿಕೆ ಇದೆ. ಹೀಗಾಗಿ, ಯಾವುದೇ ಪ್ರಾಣಿಗೆ ಹೊಡೆದರೂ ಅಥವಾ ಹಿಂಸಿಸಿದರೂ ಅದು ಆಯಾ ದೇವತೆಗಳಿಗೆ ಮಾಡಿದ ಅಪಚಾರ ಎಂದು ಶಾಸ್ತ್ರಗಳು ಹೇಳುತ್ತವೆ.
ಇದನ್ನೂ ಓದಿ:ಸಣ್ಣ ಮಕ್ಕಳನ್ನು ಯಾರ ಕಾಲಿಗೂ ಬೀಳಿಸಬೇಡಿ: ಇದರ ಹಿಂದಿರುವ ಅಸಲಿ ಆಧ್ಯಾತ್ಮಿಕ ಮತ್ತು ವೈಜ್ಞಾನಿಕ ಕಾರಣಗಳು ಇಲ್ಲಿವೆ
ಮೂಕ ಪ್ರಾಣಿಗಳ ನಿಟ್ಟುಸಿರು ಮತ್ತು ಶಾಪ:
ಮನುಷ್ಯರಿಗೆ ಕಷ್ಟವಾದರೆ ಬಾಯಿ ಬಿಟ್ಟು ಹೇಳಿಕೊಳ್ಳಬಹುದು ಅಥವಾ ಪ್ರತಿಭಟಿಸಬಹುದು. ಆದರೆ ಮೂಕ ಪ್ರಾಣಿಗಳಿಗೆ ಆ ಶಕ್ತಿ ಇರುವುದಿಲ್ಲ. ಶಾಸ್ತ್ರಗಳ ಪ್ರಕಾರ, ನಾವೊಂದು ಪ್ರಾಣಿಗೆ ವಿನಾಕಾರಣ ಹೊಡೆದಾಗ ಅದರ ಕಣ್ಣಿನಿಂದ ಬೀಳುವ ಕಣ್ಣೀರು ಮತ್ತು ಅದರ ಒಳಗಿನಿಂದ ಬರುವ ನಿಟ್ಟುಸಿರು (ಶಾಪ) ಅತ್ಯಂತ ಶಕ್ತಿಶಾಲಿಯಾಗಿರುತ್ತದೆ. ಈ ಶಾಪವು ಆ ವ್ಯಕ್ತಿಯ ಕೌಟುಂಬಿಕ ನೆಮ್ಮದಿಯನ್ನು ಕೆಡಿಸುತ್ತದೆ ಮತ್ತು ವಂಶಕ್ಕೆ ದೋಷವನ್ನು ತಂದೊಡ್ಡುತ್ತದೆ ಎಂದು ನಂಬಲಾಗಿದೆ.
ಹಿಂದೂ ಧರ್ಮದ ಪ್ರಮುಖ ಸಿದ್ಧಾಂತವೇ ‘ಕರ್ಮಫಲ’. ನಾವು ಇತರರಿಗೆ ಏನನ್ನು ನೀಡುತ್ತೇವೆಯೋ, ಅದು ನಮಗೆ ದುಪ್ಪಟ್ಟಾಗಿ ಹಿಂತಿರುಗುತ್ತದೆ.
“ಯಾವ ವ್ಯಕ್ತಿ ಮೂಕ ಪ್ರಾಣಿಗಳನ್ನು ಹಿಂಸಿಸುತ್ತಾನೋ, ಆತ ಮುಂದಿನ ಜನ್ಮದಲ್ಲಿ ಅದೇ ಪ್ರಾಣಿಯಾಗಿ ಹುಟ್ಟಿ, ಅಷ್ಟೇ ಭೀಕರವಾದ ಹಿಂಸೆಯನ್ನು ಅನುಭವಿಸಬೇಕಾಗುತ್ತದೆ” ಎಂದು ಗರುಡ ಪುರಾಣದಲ್ಲಿ ಉಲ್ಲೇಖಿಸಲಾಗಿದೆ.
ಪ್ರಾಣಿಗಳನ್ನು ಕಾಡುವವರಿಗೆ ಈ ಜನ್ಮದಲ್ಲಿ ಅನಾರೋಗ್ಯ, ಆಕಸ್ಮಿಕ ಅಪಘಾತಗಳು ಹಾಗೂ ತೀವ್ರ ಆರ್ಥಿಕ ನಷ್ಟ ಎದುರಾಗುತ್ತವೆ ಎಂದು ಜ್ಯೋತಿಷ್ಯ ಶಾಸ್ತ್ರ ಹೇಳುತ್ತದೆ.
ಮೂಕ ಪ್ರಾಣಿಗಳಿಗೆ ಹೊಡೆಯುವ ಬದಲು ಅವುಗಳಿಗೆ ದಯೆ ತೋರಿದರೆ ಜಾತಕದಲ್ಲಿರುವ ಎಲ್ಲಾ ನವಗ್ರಹ ದೋಷಗಳು ನಿವಾರಣೆಯಾಗುತ್ತವೆ.
ಹಸುವಿಗೆ ಹುಲ್ಲು ನೀಡುವುದರಿಂದ ಪಿತೃ ದೋಷ ನಿವಾರಣೆಯಾಗುತ್ತದೆ.
ನಾಯಿಗಳಿಗೆ ರೊಟ್ಟಿ ಅಥವಾ ಆಹಾರ ನೀಡುವುದರಿಂದ ರಾಹು, ಕೇತು ಮತ್ತು ಶನಿದೇವನ ಕೃಪೆ ಸಿಗುತ್ತದೆ.
ಪಕ್ಷಿಗಳಿಗೆ ಧಾನ್ಯ ಮತ್ತು ನೀರು ನೀಡುವುದರಿಂದ ಬುಧ ಗ್ರಹ ಬಲಗೊಂಡು ವ್ಯಾಪಾರದಲ್ಲಿ ಪ್ರಗತಿಯಾಗುತ್ತದೆ.
ಆದ್ದರಿಂದ, ಮಾತು ಬರದ ಪ್ರಾಣಿಗಳನ್ನು ಪ್ರೀತಿಸಿ, ಅವುಗಳಿಗೆ ಆಶ್ರಯ ನೀಡಿ, ಇಲ್ಲದಿದ್ದರೆ ಕನಿಷ್ಠ ಪಕ್ಷ ಅವುಗಳಿಗೆ ಹಿಂಸೆ ನೀಡದೆಯಾದರೂ ಮನುಷ್ಯತ್ವ ಮೆರೆಯೋಣ.
ಆಧ್ಯಾತ್ಮ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್
ಮಾಡಿ