ಕೋಲ್ಕತಾ: 2,000 ರೂ. ವರೆಗಿನ ಯುಪಿಐ (UPI) ಹಾಗೂ ರೂಪೇ (RuPay) ಡೆಬಿಟ್ ಕಾರ್ಡ್ ವಹಿವಾಟುಗಳಿಗೆ ಬ್ಯಾಂಕ್ಗಳು ಯಾವುದೇ ರೀತಿಯ ಶುಲ್ಕವನ್ನು ವಿಧಿಸುವಂತಿಲ್ಲ ಎಂದು ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿದೆ. ಹಣಕಾಸು ಸಚಿವಾಲಯ ಹೊರಡಿಸಿರುವ ಹೊಸ ಅಧಿಸೂಚನೆಯ ಪ್ರಕಾರ, ನಿರ್ದಿಷ್ಟಪಡಿಸಿದ ಎಲೆಕ್ಟ್ರಾನಿಕ್ ಪಾವತಿ ವಿಧಾನಗಳ ಮೂಲಕ ಹಣ ಪಾವತಿಸುವ ಅಥವಾ ಸ್ವೀಕರಿಸುವ ಯಾರೇ ಆಗಲಿ, ಅವರ ಮೇಲೆ ನೇರವಾಗಿ ಅಥವಾ ಪರೋಕ್ಷವಾಗಿ ಯಾವುದೇ ಶುಲ್ಕ ವಿಧಿಸುವಂತಿಲ್ಲ. ‘ಪೇಮೆಂಟ್ ಅಂಡ್ ಸೆಟಲ್ಮೆಂಟ್ ಸಿಸ್ಟಮ್ಸ್ ಆಕ್ಟ್’ನ ಸೆಕ್ಷನ್ 10ಎ ಅಡಿಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ.
ಸರ್ಕಾರದ ಹೊಸ ಅಧಿಸೂಚನೆಯು 2,000 ರೂ. ಗಿಂತ ಹೆಚ್ಚಿನ ಮೌಲ್ಯದ ವಹಿವಾಟುಗಳ ಶುಲ್ಕದ ಕುರಿತು ಸ್ಪಷ್ಟಪಡಿಸಿಲ್ಲ. ಇದು ದೊಡ್ಡ ಮೊತ್ತದ ಯುಪಿಐ ವಹಿವಾಟುಗಳಿಗೆ ಮರ್ಚೆಂಟ್ ಡಿಸ್ಕೌಂಟ್ ರೇಟ್ (MDR) ಅಥವಾ ವ್ಯಾಪಾರಿ ರಿಯಾಯಿತಿ ದರ ಅನ್ವಯಿಸಲು ಪರೋಕ್ಷವಾಗಿ ದಾರಿ ಮಾಡಿಕೊಟ್ಟಿದೆ.
ಲೋಕಸಭೆಯಲ್ಲಿ ಇತ್ತೀಚೆಗೆ ಪಾಸ್ ಆಗಿರುವ ‘ಟ್ಯಾಕ್ಸೇಷನ್ ಅಂಡ್ ಅದರ್ ಲಾಸ್ (ಅಮೆಂಡ್ಮೆಂಟ್) ಬಿಲ್’ ಮೂಲಕ, ಯಾವ ಡಿಜಿಟಲ್ ಪಾವತಿ ವಿಧಾನಗಳು ಶುಲ್ಕವನ್ನು ಆಕರ್ಷಿಸಬಹುದು ಎಂಬುದನ್ನು ನಿರ್ಧರಿಸುವ ಅಧಿಕಾರವನ್ನು ಸರ್ಕಾರ ಪಡೆದುಕೊಂಡಿದೆ. ಡಿಜಿಟಲ್ ಪಾವತಿ ಉದ್ಯಮದ ಬೇಡಿಕೆಗೆ ಸ್ಪಂದಿಸುವುದರ ಜೊತೆಗೆ, ಪ್ಲಾಟ್ಫಾರ್ಮ್ನ ಮುಂದಿನ ಹಂತದ ಅಭಿವೃದ್ಧಿಗೆ ಸುಸ್ಥಿರ ನಿಧಿ ಮಾದರಿಯನ್ನು ರೂಪಿಸಲು ಸರ್ಕಾರ ಈ ನಮ್ಯತೆಯನ್ನು ಬಯಸಿದೆ.
ಯಾರಿಗೆ ಅನ್ವಯಿಸಲಿದೆ ಎಂಡಿಆರ್ (MDR)?
ವ್ಯಾಪಾರಿಗಳಿಗೆ ಮಾತ್ರ ಅನ್ವಯ: ಡಿಜಿಟಲ್ ವಹಿವಾಟುಗಳ ಮೇಲಿನ ಎಂಡಿಆರ್ ಶುಲ್ಕವು ಗ್ರಾಹಕರಿಗೆ ಅನ್ವಯಿಸುವುದಿಲ್ಲ ಬದಲಿಗೆ ವ್ಯಾಪಾರಿಗಳಿಗೆ (Merchants) ಮಾತ್ರ ಅನ್ವಯಿಸಲಿದೆ ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಮತ್ತು ಪೇಮೆಂಟ್ಸ್ ಕೌನ್ಸಿಲ್ ಆಫ್ ಇಂಡಿಯಾ (PCI) ಸ್ಪಷ್ಟಪಡಿಸಿವೆ.
ಮೂಲಸೌಕರ್ಯ ಅಭಿವೃದ್ಧಿ: ಈ ಶುಲ್ಕದಿಂದ ಬರುವ ಆದಾಯವು ಬ್ಯಾಂಕ್ಗಳು ಮತ್ತು ಫಿನ್ಟೆಕ್ ಕಂಪನಿಗಳಿಗೆ ಭದ್ರತೆ ಹಾಗೂ ಮೂಲಭೂತ ಸೌಕರ್ಯಗಳಲ್ಲಿ ಹೆಚ್ಚಿನ ಹೂಡಿಕೆ ಮಾಡಲು ಸಹಕರಿಸಲಿದೆ.
ಇದನ್ನೂ ಓದಿ: ಗೌರಿ-ಗಣೇಶ ಹಬ್ಬಕ್ಕೆ ‘ಕೆಎಸ್ಆರ್ಟಿಸಿ’ ಬಿಗ್ ಆಫರ್: ಬೆಂಗಳೂರಿನಿಂದ 2,400 ಹೆಚ್ಚುವರಿ ವಿಶೇಷ ಬಸ್ಗಳ ಸಂಚಾರ
ಪ್ರಸ್ತುತ ವೆಚ್ಚವನ್ನು ಭರಿಸುತ್ತಿರುವವರು ಯಾರು?
ಪ್ರಸ್ತುತ ಯುಪಿಐ ಪ್ಲಾಟ್ಫಾರ್ಮ್ ನಿರ್ವಹಣೆ ಮತ್ತು ವಹಿವಾಟಿನ ವೆಚ್ಚವನ್ನು ಬ್ಯಾಂಕ್ಗಳು, ಎನ್ಪಿಸಿಐ (NPCI) ಹಾಗೂ ಪಾವತಿ ಸೇವಾ ಪೂರೈಕೆದಾರರು ಭರಿಸುತ್ತಿವೆ.
2,000 ರೂ. ವರೆಗಿನ ಪಾವತಿಗಳ ವೆಚ್ಚವನ್ನು ಭರಿಸಲು ಸರ್ಕಾರವು ಸಬ್ಸಿಡಿ ನೀಡುತ್ತ ಬಂದಿದೆ.
FY27 ರ ಬಜೆಟ್ನಲ್ಲಿ 2,000 ಕೋಟಿ ರೂ., FY26 ರಲ್ಲಿ 2,196.21 ಕೋಟಿ ರೂ. ಹಾಗೂ FY25 ರಲ್ಲಿ 1,922.77 ಕೋಟಿ ರೂ.ಗಳನ್ನು ಸಬ್ಸಿಡಿಯಾಗಿ ಮೀಸಲಿಡಲಾಗಿತ್ತು. ಎಂಡಿಆರ್ ಜಾರಿಯಾದ ಬಳಿಕ ಈ ವೆಚ್ಚದ ದೊಡ್ಡ ಭಾಗವನ್ನು ಅದು ನಿರ್ವಹಿಸಲಿದೆ.
ಯುಪಿಐ ವಹಿವಾಟಿನ ಭಾರಿ ಪ್ರಗತಿ
ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ದತ್ತಾಂಶದ ಪ್ರಕಾರ, ವಿಶ್ವದ ಅತಿ ದೊಡ್ಡ ರಿಯಲ್-ಟೈಮ್ ಪಾವತಿ ವ್ಯವಸ್ಥೆಯಾಗಿ ಬೆಳೆದಿರುವ ಯುಪಿಐ, FY26 ರಲ್ಲಿ 241.6 ಬಿಲಿಯನ್ ವಹಿವಾಟುಗಳನ್ನು (314.2 ಲಕ್ಷ ಕೋಟಿ ರೂ. ಮೌಲ್ಯ) ದಾಖಲಿಸಿದೆ. ಇದು ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಪ್ರಮಾಣದಲ್ಲಿ ಶೇ. 30 ಹಾಗೂ ಮೌಲ್ಯದಲ್ಲಿ ಶೇ. 21 ರಷ್ಟು ಹೆಚ್ಚಳವಾಗಿದೆ. 2026ರ ಆಗಸ್ಟ್ ಅಂತ್ಯಕ್ಕೆ ಯುಪಿಐ ಬಳಕೆದಾರರ ಸಂಖ್ಯೆ 55 ಕೋಟಿ ದಾಟಿದ್ದು, ಕೇವಲ ಆಗಸ್ಟ್ ತಿಂಗಳೊಂದರಲ್ಲೇ 24.5 ಬಿಲಿಯನ್ ವಹಿವಾಟುಗಳು ನಡೆದಿವೆ. ವಹಿವಾಟಿನ ದಟ್ಟಣೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಸುರಕ್ಷತೆ ಮತ್ತು ನಾವೀನ್ಯತೆಗಾಗಿ ಶ್ರೇಣೀಕೃತ ಶುಲ್ಕ (ಶೇ. 0.3 ರಿಂದ ಶೇ. 0.5 ರವರೆಗೆ) ಜಾರಿಗೆ ಬರುವ ನಿರೀಕ್ಷೆಯಿದೆ.