ಜಮ್ಮು: ಸಾಧನೆಗೆ ವಯಸ್ಸು ಮತ್ತು ಶಾರೀರಿಕ ದೌರ್ಬಲ್ಯ ತೊಡಕಲ್ಲ ಎಂಬುದನ್ನು ಜಮ್ಮುವಿನ 45 ವರ್ಷದ ಮಹಿಳೆಯೊಬ್ಬರು ಸಾಬೀತುಪಡಿಸಿದ್ದಾರೆ. ಮಾತು ಮತ್ತು ಶ್ರವಣ ದೋಷ ಹೊಂದಿರುವ ರೇಣು ಹನ್ಸ್ (Renu Hans) ಎಂಬುವವರು ತಮ್ಮ ಮಗನ ಬೆಂಬಲ ಮತ್ತು ಮಾರ್ಗದರ್ಶನದೊಂದಿಗೆ 10ನೇ ತರಗತಿ ಪರೀಕ್ಷೆಯನ್ನು ಯಶಸ್ವಿಯಾಗಿ ತೇರ್ಗಡೆಯಾಗಿದ್ದಾರೆ.
ಉದ್ಯೋಗದ ಕನಸು ಮತ್ತು ಮಗನ ಸಾಥ್
ರೇಣು ಹನ್ಸ್ ಅವರ ಈ ಸಾಧನೆಯ ಹಿಂದಿರುವುದು ಅವರ ಮಗ ನಮನ್ ಕೌಲ್ (Naman Koul) ಅವರ ಅಪಾರ ಕಾಳಜಿ ಮತ್ತು ಸಹಕಾರ. ರೇಣು ಹನ್ಸ್ ಅವರು ತಮ್ಮ ಸ್ನೇಹಿತರು ಹಾಗೂ ಸಹೋದ್ಯೋಗಿಗಳೊಂದಿಗೆ ವಿವಿಧ ಸ್ಥಳಗಳಿಗೆ ತೆರಳುತ್ತಿದ್ದಾಗ, ‘ನನ್ನ ಸ್ನೇಹಿತರಿಗೆ ಉದ್ಯೋಗ ಗಿಟ್ಟಿಸಿಕೊಳ್ಳಲು ಸಾಧ್ಯವಾಗುವುದಾದರೆ ನನಗೇಕೆ ಸಾಧ್ಯವಿಲ್ಲ?’ ಎನ್ನುವ ಹಂಬಲ ಅವರ ಮನದಲ್ಲಿ ತೀವ್ರವಾಗಿತ್ತು. ತಮ್ಮ ಈ ಇಚ್ಛೆಯನ್ನು ಮಗ ನಮನ್ ಮುಂದೆ ತೋಡಿಕೊಂಡಿದ್ದರು.
ಜೆಕೆಒಎಸ್ (JKOS) ಮೂಲಕ ಪ್ರವೇಶ: ತಾಯಿಯ ಶಿಕ್ಷಣದ ಕನಸನ್ನು ನನಸು ಮಾಡಲು ನಮನ್ ಹಲವು ಶಾಲೆಗಳನ್ನು ಸಂಪರ್ಕಿಸಿದರು. ಕೊನೆಗೆ ಜಮ್ಮು ಮತ್ತು ಕಾಶ್ಮೀರ ಓಪನ್ ಸ್ಕೂಲಿಂಗ್ ಯೋಜನೆಯ ಬಗ್ಗೆ ತಿಳಿದುಕೊಂಡು, ತಾಯಿಯ ಅರ್ಜಿಯನ್ನು ಸಲ್ಲಿಸಿ ಶಾಲೆಗೆ ಸೇರಿಸಿದರು.
ಇದನ್ನೂ ಓದಿ: ಬಂಗಾರಪೇಟೆಯಲ್ಲಿ ಬಿರಿಯಾನಿ, ಮೊಸರು ಬಜ್ಜಿಯಲ್ಲಿ ಸತ್ತ ಹಲ್ಲಿ ಪತ್ತೆ
ಸ್ವಂತ ಅಭ್ಯಾಸದ ಜೊತೆಗೆ ಅಮ್ಮನಿಗೆ ಪಾಠ ಹೇಳಿಕೊಟ್ಟ ಮಗ
ತಮ್ಮ ಓದಿನ ಜೊತೆಜೊತೆಗೇ ತಾಯಿಯ ಶಿಕ್ಷಣಕ್ಕೂ ನಮನ್ ಸಂಪೂರ್ಣ ಸಾಥ್ ನೀಡಿದರು. “ಸಂಜೆ ಶಾಲೆಯಿಂದ ಮನೆಗೆ ಮರಳಿದ ತಕ್ಷಣ ನಾನು ಅಮ್ಮನಿಗೆ ಸಮಯ ಮೀಸಲಿಡುತ್ತಿದ್ದೆ. ನನ್ನ ಸ್ವಂತ ಅಭ್ಯಾಸವನ್ನು ಸರಿದೂಗಿಸುತ್ತಲೇ ಅಮ್ಮನಿಗೆ ಪಾಠ ಹೇಳಿಕೊಡುತ್ತಿದ್ದೆ. ಆಕೆಗೆ ಎದುರಾಗುತ್ತಿದ್ದ ಸಂಶಯಗಳನ್ನು ಪರಿಹರಿಸುತ್ತಿದ್ದೆ. ಫಲಿತಾಂಶ ಬಂದಾಗ ಪ್ರತಿಯೊಬ್ಬರಿಗೂ ಅಪಾರ ಸಂತೋಷವಾಯಿತು. ನಮ್ಮ ಎಲ್ಲಾ ಬಂಧು-ಮಿತ್ರರು ಅಮ್ಮನಿಗೆ ಅಭಿನಂದನೆ ಸಲ್ಲಿಸಿ ಆಶೀರ್ವದಿಸಿದ್ದಾರೆ,” ಎಂದು ನಮನ್ ಕೌಲ್ ಹೆಮ್ಮೆಯಿಂದ ಹಂಚಿಕೊಂಡಿದ್ದಾರೆ.
ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ