ಲಖನೌ: ವರ್ಷಕ್ಕೆ 46 ಲಕ್ಷ ರೂ. ಸಂಬಳದ ಪ್ರತಿಷ್ಠಿತ ಉದ್ಯೋಗ, ಅಮೆಜಾನ್‌ನಂತಹ ಜಾಗತಿಕ ಕಂಪನಿಯಲ್ಲಿ ಕ್ಲೌಡ್ ಎಂಜಿನಿಯರ್ ಹುದ್ದೆ, ಏರ್‌ಬಸ್‌ನಲ್ಲೂ ಕೆಲಸಕ್ಕೆ ಆಯ್ಕೆಯಾಗಿದ್ದ ಅವಕಾಶ. ಇಷ್ಟೆಲ್ಲಾ ಇದ್ದರೂ ಉತ್ತರ ಪ್ರದೇಶದ ಲಖನೌ ಮೂಲದ 27 ವರ್ಷದ ಶಾರ್ದೇಂದು ತಿವಾರಿ ಅವರು ತಮ್ಮ ಬಾಲ್ಯದ ಕನಸನ್ನು ನನಸಾಗಿಸಲು ಕಾರ್ಪೊರೇಟ್ ಉದ್ಯೋಗವನ್ನು ತೊರೆದು ಭಾರತೀಯ ಸೇನೆ ಸೇರಿದ್ದಾರೆ.
ಗಯಾದಲ್ಲಿರುವ ಅಧಿಕಾರಿಗಳ ತರಬೇತಿ ಅಕಾಡೆಮಿ (OTA)ಯಲ್ಲಿ ಕಠಿಣ ತರಬೇತಿಯನ್ನು ಪೂರ್ಣಗೊಳಿಸಿದ ಬಳಿಕ ಶಾರ್ದೇಂದು ತಿವಾರಿ ಅವರು ಇತ್ತೀಚೆಗೆ ಭಾರತೀಯ ಸೇನೆಯ ಅಧಿಕಾರಿಯಾಗಿ ನೇಮಕಗೊಂಡಿದ್ದಾರೆ.
ಶಾರ್ದೇಂದು ಅವರ ಸೇನೆ ಸೇರುವ ಆಸೆಗೆ ತಂದೆ ಗೌರವಾನ್ವಿತ ಕ್ಯಾಪ್ಟನ್ ರಾಜ್ ಕುಮಾರ್ ತಿವಾರಿ ಅವರೇ ಪ್ರಮುಖ ಪ್ರೇರಣೆ. ಭಾರತೀಯ ಸೇನೆಯ ಆರ್ಮಿ ಸರ್ವೀಸ್ ಕಾರ್ಪ್ಸ್‌ನಲ್ಲಿ 36 ವರ್ಷಗಳ ಕಾಲ ಸೇವೆ ಸಲ್ಲಿಸಿರುವ ತಂದೆಯ ದೇಶಭಕ್ತಿಯ ಬದುಕು ಮಗನ ಮೇಲೂ ಆಳವಾದ ಪ್ರಭಾವ ಬೀರಿದೆ.
ಕೇಂದ್ರೀಯ ವಿದ್ಯಾಲಯದಲ್ಲಿ ಶಾಲಾ ಶಿಕ್ಷಣ ಪಡೆದ ಶಾರ್ದೇಂದು, ಚಂಡೀಗಢದ ಪಂಜಾಬ್ ಎಂಜಿನಿಯರಿಂಗ್ ಕಾಲೇಜಿನಲ್ಲಿ (PEC) ಉನ್ನತ ಶಿಕ್ಷಣ ಪೂರ್ಣಗೊಳಿಸಿದ್ದರು. ಬಳಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿ ತಮ್ಮ ವೃತ್ತಿಜೀವನವನ್ನು ಆರಂಭಿಸಿ ಅಮೆಜಾನ್‌ನಲ್ಲಿ ಕ್ಲೌಡ್ ಎಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದರು. ಅವರಿಗೆ ವರ್ಷಕ್ಕೆ ₹46 ಲಕ್ಷ ವೇತನದ ಪ್ಯಾಕೇಜ್ ಇತ್ತು. ಅಲ್ಲದೆ, ವಿಮಾನಯಾನ ಮತ್ತು ಏರೋಸ್ಪೇಸ್ ಕ್ಷೇತ್ರದ ಪ್ರಮುಖ ಸಂಸ್ಥೆಯಾದ ಏರ್‌ಬಸ್‌ನಲ್ಲೂ ಕೆಲಸಕ್ಕೆ ಆಯ್ಕೆಯಾಗಿದ್ದರು.
ಆದರೆ, ಬಾಲ್ಯದಿಂದಲೂ ಸೇನಾಧಿಕಾರಿಯಾಗಬೇಕೆಂಬ ಕನಸು ಕಂಡಿದ್ದ ಶಾರ್ದೇಂದು, ಆರಂಭಿಕ ಪ್ರಯತ್ನಗಳಲ್ಲಿ ಹಲವು ಬಾರಿ ತಿರಸ್ಕಾರ ಎದುರಿಸಿದರೂ ತಮ್ಮ ಗುರಿಯಿಂದ ಹಿಂದೆ ಸರಿಯಲಿಲ್ಲ. ಸತತ ಪ್ರಯತ್ನ ಮತ್ತು ಪರಿಶ್ರಮದ ಮೂಲಕ ಸೇನೆಗೆ ಆಯ್ಕೆಯಾಗುವ ಕನಸನ್ನು ನನಸಾಗಿಸಿಕೊಂಡರು.
ಗಯಾದ OTAಯಲ್ಲಿ ನಡೆದ ಕಠಿಣ ಸೇನಾ ತರಬೇತಿಯ ಅವಧಿಯಲ್ಲಿ ತಮ್ಮ ಶಿಸ್ತು, ನಾಯಕತ್ವ ಗುಣ ಮತ್ತು ಬದ್ಧತೆಯಿಂದ ಗಮನ ಸೆಳೆದ ಅವರು, ಪ್ರತಿಷ್ಠಿತ ಸೀನಿಯರ್ ಅಂಡರ್ ಆಫೀಸರ್ (Senior Under Officer) ಜವಾಬ್ದಾರಿಯನ್ನೂ ಪಡೆದುಕೊಂಡರು.
ಹೆಚ್ಚಿನ ಸಂಬಳದ ಉದ್ಯೋಗ ಮತ್ತು ಖಾಸಗಿ ವಲಯದ ವೃತ್ತಿಜೀವನಕ್ಕಿಂತ ದೇಶಸೇವೆಗೆ ಆದ್ಯತೆ ನೀಡಿದ ಶಾರ್ದೇಂದು ತಿವಾರಿ ಅವರ ನಿರ್ಧಾರ ಯುವಜನರಿಗೆ ಸ್ಫೂರ್ತಿದಾಯಕವಾಗಿದೆ.