ಮಂಗಳೂರು: ರಾಜ್ಯಾದ್ಯಂತ ತೀವ್ರ ಕುತೂಹಲ ಹಾಗೂ ಆಕ್ರೋಶಕ್ಕೆ ಕಾರಣವಾಗಿದ್ದ ಉಡುಪಿ-ದಕ್ಷಿಣ ಕನ್ನಡ ಗಡಿಭಾಗದ ಧರ್ಮಸ್ಥಳ ಸೌಜನ್ಯ ಕೊಲೆ ಪ್ರಕರಣದ ಮರುತನಿಖೆ (Re-investigation) ಸದ್ಯ ಭರದಿಂದ ಸಾಗುತ್ತಿದೆ. ಈ ಸುದೀರ್ಘ 14 ವರ್ಷಗಳ ಹಳೆಯ ಭೀಕರ ಕೊಲೆಯ ರಹಸ್ಯವನ್ನು ಭೇದಿಸಲು ವಿಶೇಷ ತನಿಖಾ ದಳ (SIT) ಭಾರಿ ಕಸರತ್ತು ನಡೆಸುತ್ತಿದ್ದು, ಪ್ರಕರಣಕ್ಕೆ ನಿರ್ಣಾಯಕ ತಿರುವು ನೀಡಬಲ್ಲ ಮಹತ್ವದ ವೈದ್ಯಕೀಯ ವರದಿಗಾಗಿ ತನಿಖಾ ತಂಡ ಕಾಯುತ್ತಿದೆ. 2012ರ ಅಕ್ಟೋಬರ್ 10ರಂದು ಸಂಗ್ರಹಿಸಲಾಗಿದ್ದ ಸಂತ್ರಸ್ತೆ ಸೌಜನ್ಯಳ ವೆಜಿನಲ್ ಸ್ವಾಬ್ (Vaginal Swab) ಮಾದರಿಯನ್ನು ಇದೀಗ ಅತ್ಯಾಧುನಿಕ ಡಿಎನ್ಎ (DNA) ಮರುಪರೀಕ್ಷೆಗೆ ರವಾನಿಸಲಾಗಿದೆ.
ಫಂಗಸ್ ಬಂದಿದ್ದ ಸ್ವಾಬ್ ಮಾದರಿಗೆ ಹೈದರಾಬಾದ್ ಲ್ಯಾಬ್‌ನಲ್ಲಿ ಮರುಪರೀಕ್ಷೆ:
2012ರ ಅಕ್ಟೋಬರ್ 10ರಂದು ಖಾಕಿ ಪಡೆ ಸಂತ್ರಸ್ತೆಯಿಂದ ಈ ಸ್ವಾಬ್ ಮಾದರಿಯನ್ನು ಸಂಗ್ರಹಿಸಿತ್ತು. ಬೆಳ್ತಂಗಡಿ ಠಾಣೆ ಪೊಲೀಸರು ಅಕ್ಟೋಬರ್ 20ರಂದು ಇದನ್ನು ಪ್ರಯೋಗಾಲಯಕ್ಕೆ ಕಳುಹಿಸಿದಾಗ, ಮಾದರಿಯಲ್ಲಿ ‘ಫಂಗಸ್’ (Fungus) ಬಂದಿದೆ ಎಂಬ ಕಾರಣಕ್ಕೆ ವರದಿ ಅಪೂರ್ಣಗೊಂಡಿತ್ತು. ಪ್ರಸ್ತುತ ಮರುತನಿಖೆ ನಡೆಸುತ್ತಿರುವ ಎಸ್‌ಐಟಿ ತಂಡವು, ಫಂಗಸ್ ಬಂದಿದ್ದರೂ ಕೂಡ ಅತ್ಯಾಧುನಿಕ ತಂತ್ರಜ್ಞಾನದ ಮೂಲಕ ಡಿಎನ್ಎ ಸ್ಯಾಂಪಲ್ ಪತ್ತೆಹಚ್ಚುವ ಸಾಮರ್ಥ್ಯ ಹೊಂದಿರುವ ಹೈದರಾಬಾದ್‌ನ ಉನ್ನತ ಮಟ್ಟದ ಪ್ರಯೋಗಾಲಯಕ್ಕೆ ಈ ಮಾದರಿಯನ್ನು ರವಾನಿಸಿದೆ.
ಇದನ್ನೂ ಓದಿ: ಗ್ರಾಹಕರಿಗೆ ಡಬಲ್ ಶಾಕ್: ನಂದಿನಿ ಹಾಲಿನ ಬೆಲೆ ಬರೋಬ್ಬರಿ 10 ರೂ. ಏರಿಕೆ; ರಿಟೇಲರ್‌ಗಳಿಂದ ಲೀಟರ್‌ಗೆ ಮತ್ತೆ 2 ರೂ. ಹೆಚ್ಚಳ
ಆರೋಪಿಗಳ ಡಿಎನ್ಎ ಮ್ಯಾಚಿಂಗ್ & ಸೌಜನ್ಯ ಸಾವಿನ ರಹಸ್ಯ ಬಯಲು?:
ಕಳೆದ 7-8 ದಿನಗಳ ಹಿಂದೆಯೇ ಎಸ್‌ಐಟಿ ತನಿಖಾ ತಂಡವು ಈ ಸ್ವಾಬ್ ಮಾದರಿಯನ್ನು ಮರುಪರೀಕ್ಷೆಗೆ ರವಾನಿಸಿದ್ದು, ಪ್ರಸ್ತುತ ವಿಧಿವಿಜ್ಞಾನ ವರದಿಗಾಗಿ ಕಾತರದಿಂದ ಕಾಯುತ್ತಿದೆ ವರದಿಯಲ್ಲಿ ಅಸಲಿ ಆರೋಪಿಗಳ ಡಿಎನ್ಎ (DNA Profiles) ಪತ್ತೆಯಾದರೆ, ಆ ಡಿಎನ್ಎ ಸ್ಯಾಂಪಲ್‌ಗಳನ್ನು ಪ್ರಸ್ತುತ ಶಂಕಿತ ಹಾಗೂ ಪ್ರಕರಣಕ್ಕೆ ಸಂಬಂಧಿಸಿದ ಆರೋಪಿಗಳ ಡಿಎನ್ಎ ಜೊತೆ ತಾಳೆ (Matching) ಮಾಡಿ ತನಿಖೆಯನ್ನು ಮುಂದಿನ ಘಟ್ಟಕ್ಕೆ ಕೊಂಡೊಯ್ಯಲು ಎಸ್‌ಐಟಿ ಯೋಜಿಸಿದೆ. ಮರುತನಿಖೆಯ ವೇಳೆ ಹಲವು ಹೊಸ ಮತ್ತು ಸ್ಫೋಟಕ ಮಾಹಿತಿಗಳು ಕಲೆಹಾಕಲ್ಪಟ್ಟಿದ್ದು, ಹೈದರಾಬಾದ್ ಲ್ಯಾಬ್ ವರದಿ ಹೊರಬಿದ್ದ ತಕ್ಷಣವೇ 14 ವರ್ಷಗಳ ಸೌಜನ್ಯ ಸಾವಿನ ರಹಸ್ಯಕ್ಕೆ ಅಂತಿಮ ತೆರೆಬೀಳುವ ಸಾಧ್ಯತೆಗಳು ದಟ್ಟವಾಗಿವೆ.
ರಾಜಕೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
