ದೀರ್ಘಕಾಲದ ಖಿನ್ನತೆಯಿಂದ ಮೆದುಳಿನ ಸಂಪರ್ಕ ವ್ಯವಸ್ಥೆಯಲ್ಲೇ ಭಾರಿ ಏರುಪೇರು!: ಇತ್ತೀಚಿನ ಜಾಗತಿಕ ಸಂಶೋಧನೆಯಲ್ಲಿ ಆಘಾತಕಾರಿ ಸತ್ಯ ಬಯಲು

ಎಷ್ಟು ಸುದೀರ್ಘ ಅವಧಿಯವರೆಗೆ ಖಿನ್ನತೆಗೆ (Depression) ಒಳಗಾಗಿರುತ್ತಾರೆ ಎಂಬುದು ಅವರ ಮೆದುಳಿನ ಆಂತರಿಕ ರಚನೆ ಮತ್ತು ಕಾರ್ಯವೈಖರಿಯನ್ನು ಅಷ್ಟೇ ತೀವ್ರವಾಗಿ ಬದಲಾಯಿಸುತ್ತದೆ ಎಂಬ ಆಘಾತಕಾರಿ ಸತ್ಯ ಹೊಸದೊಂದು ಜಾಗತಿಕ ಸಂಶೋಧನೆಯಿಂದ ಬೆಳಕಿಗೆ ಬಂದಿದೆ. ಬ್ರೆಜಿಲ್‌ನ ‘ಯೂನಿವರ್ಸಿಟಿ ಆಫ್ ಸಾವೊ ಪಾಲೊ’ ಮತ್ತು ಬ್ರಿಟನ್‌ನ ‘ಆಕ್ಸ್‌ಫರ್ಡ್ ವಿಶ್ವವಿದ್ಯಾಲಯ’ದ ವಿಜ್ಞಾನಿಗಳು ಜಂಟಿಯಾಗಿ ನಡೆಸಿದ ಈ ಅಧ್ಯಯನವು, ಖಿನ್ನತೆಯ ಅವಧಿಯು ಮೆದುಳಿನ ಜಾಲಗಳ ನಡುವಿನ ಕ್ರಿಯಾತ್ಮಕ ಸಂಪರ್ಕವನ್ನು (Functional Brain Connectivity) ಹೇಗೆ ಸಂಪೂರ್ಣವಾಗಿ ಏರುಪೇರು ಮಾಡುತ್ತದೆ ಎಂಬುದನ್ನು ಬಹಿರಂಗಪಡಿಸಿದೆ. ಈ ಸಂಶೋಧನಾ ವರದಿಯು ಪ್ರಸಿದ್ಧ ‘ಸೈಂಟಿಫಿಕ್ ರಿಪೋರ್ಟ್ಸ್’ (Scientific Reports) ನಿಯತಕಾಲಿಕೆಯಲ್ಲಿ ಪ್ರಕಟವಾಗಿದೆ.

ಮೆದುಳಿನ ಎರಡು ಪ್ರಮುಖ ನೆಟ್‌ವರ್ಕ್‌ಗಳ ಮೇಲೆ ದಾಳಿ!:

ಸಂಶೋಧಕರು ತೀವ್ರ ಖಿನ್ನತೆಯಿಂದ ಬಳಲುತ್ತಿರುವ 46 ರೋಗಿಗಳ ಮೆದುಳಿನ ಚಿತ್ರಗಳನ್ನು (Brain Images) ಸೂಕ್ಷ್ಮವಾಗಿ ವಿಶ್ಲೇಷಿಸಿದ್ದಾರೆ. ಇದರ ಪ್ರಕಾರ, 24 ತಿಂಗಳಿಗಿಂತ ಹೆಚ್ಚು ಕಾಲ ಅಂದರೆ ದೀರ್ಘಕಾಲದ ಖಿನ್ನತೆಯಿಂದ ಬಳಲುತ್ತಿರುವವರು (Chronic Patients) ಮತ್ತು ಇತ್ತೀಚೆಗೆ ಖಿನ್ನತೆಗೆ ಒಳಗಾದವರ ಮೆದುಳಿನ ಸಂಪರ್ಕ ಮಾದರಿಯಲ್ಲಿ ಸ್ಪಷ್ಟ ವ್ಯತ್ಯಾಸಗಳು ಕಂಡುಬಂದಿವೆ.

ಮುಖ್ಯವಾಗಿ ಮೆದುಳಿನ ಎರಡು ಪ್ರಮುಖ ಜಾಲಗಳ ನಡುವಿನ ಸಂಪರ್ಕವು ಇದರಲ್ಲಿ ಬದಲಾಗುತ್ತದೆ:

ಸೆಂಟ್ರಲ್ ಎಕ್ಸಿಕ್ಯೂಟಿವ್ ನೆಟ್‌ವರ್ಕ್ (CEN): ಇದು ನಮ್ಮ ದೈನಂದಿನ ನಿರ್ಧಾರಗಳು, ಕಾರ್ಯನಿರ್ವಹಣೆ ಮತ್ತು ಗಮನ ಹರಿಸುವಿಕೆಯನ್ನು ನಿಯಂತ್ರಿಸುತ್ತದೆ.

ಡಿಫಾಲ್ಟ್ ಮೋಡ್ ನೆಟ್‌ವರ್ಕ್ (DMN): ಇದು ನಮ್ಮ ಆಂತರಿಕ ಆಲೋಚನೆಗಳು, ಆತ್ಮಾವಲೋಕನ ಮತ್ತು ಸ್ವಯಂ-ಪ್ರತಿಫಲನಕ್ಕೆ ಸಂಬಂಧಿಸಿದೆ.

ಸಾಮಾನ್ಯವಾಗಿ ಈ ಎರಡೂ ನೆಟ್‌ವರ್ಕ್‌ಗಳು ಅತ್ಯಂತ ಸಮತೋಲನದಲ್ಲಿ ಕೆಲಸ ಮಾಡುತ್ತವೆ. ಆದರೆ ಖಿನ್ನತೆಯು ಈ ಸಮತೋಲನವನ್ನೇ ತಪ್ಪಿಸುತ್ತದೆ.

ನೆಗೆಟಿವ್ ಯೋಚನೆಗಳ ಸುಳಿಯಲ್ಲಿ ಸಿಲುಕುವುದೇಕೆ?: ವಿಜ್ಞಾನಿಗಳ ವಿವರಣೆ

“ಮೆದುಳಿನ ಈ ನೆಟ್‌ವರ್ಕ್‌ಗಳ ನಡುವಿನ ತಪ್ಪು ಜೋಡಣೆ ಅಥವಾ ಅಸಮತೋಲನವು ಮನುಷ್ಯನಲ್ಲಿ ನಕಾರಾತ್ಮಕ (Negative) ಮತ್ತು ಸ್ವಯಂ-ಕೇಂದ್ರಿತ ಆಲೋಚನೆಗಳ ಪ್ರಾಧಾನ್ಯತೆಯನ್ನು ಹೆಚ್ಚಿಸುತ್ತದೆ” ಎಂದು ಈ ಸಂಶೋಧನೆಯ ಮುಖ್ಯ ಲೇಖಕಿ ತಮಿರೆಸ್ ಜಾನೋ ವಿವರಿಸಿದ್ದಾರೆ. ಇದೇ ಕಾರಣಕ್ಕಾಗಿ ಖಿನ್ನತೆಗೆ ಒಳಗಾದ ಜನರು ನಿರಂತರವಾಗಿ ನೆಗೆಟಿವ್ ಯೋಚನೆಗಳಲ್ಲೇ ಮುಳುಗಿರುತ್ತಾರೆ ಮತ್ತು ಅಗತ್ಯವಿದ್ದಾಗ ತಮ್ಮ ಗಮನವನ್ನು ಹೊರಗಿನ ವಾತಾವರಣದ ಕಡೆಗೆ ಹರಿಸಲು ಭಾರಿ ತೊಂದರೆ ಅನುಭವಿಸುತ್ತಾರೆ.

ಇದನ್ನೂ ಓದಿ: ವಾಶ್ ರೂಮ್‌ನಲ್ಲಿ ಈ ವಸ್ತುಗಳನ್ನು ಮರೆತೂ ಬಳಸಬೇಡಿ: ಆರೋಗ್ಯ ಹಾಳಾಗುವುದಷ್ಟೇ ಅಲ್ಲ, ಮನೆಗೆ ದಾರಿದ್ರ್ಯ ತರಲಿವೆ ಈ ತಪ್ಪುಗಳು!; ವಾಸ್ತು ತಜ್ಞರು ಏನಂತಾರೆ?

ಅವಧಿಗೆ ತಕ್ಕಂತೆ ಬದಲಾಗುವ ಮೆದುಳಿನ ಮಾದರಿ:

ಸಂಶೋಧನೆಯ ಪ್ರಕಾರ, ಇತ್ತೀಚೆಗೆ ಖಿನ್ನತೆಯ ಕಂತುಗಳನ್ನು ಅನುಭವಿಸಿದವರಲ್ಲಿ ರೋಗದ ಲಕ್ಷಣಗಳು ತೀವ್ರಗೊಂಡಂತೆ CEN ಮತ್ತು DMN ನಡುವಿನ ಕ್ರಿಯಾತ್ಮಕ ಲಿಂಕ್ ಕಡಿಮೆಯಾಗುತ್ತದೆ. ಆದರೆ, ದೀರ್ಘಕಾಲದ ಖಿನ್ನತೆ ಉಳ್ಳವರಲ್ಲಿ ಇದು ಸಂಪೂರ್ಣ ಉಲ್ಟಾ ಮಾದರಿಯನ್ನು ಪ್ರದರ್ಶಿಸುತ್ತದೆ. ಅಲ್ಲಿ ರೋಗದ ತೀವ್ರತೆ ಹೆಚ್ಚಾದಂತೆ ಈ ಎರಡು ನೆಟ್‌ವರ್ಕ್‌ಗಳ ನಡುವಿನ ಸಂಪರ್ಕವು ಮತ್ತಷ್ಟು ಗಟ್ಟಿಯಾಗುತ್ತದೆ! ಅಂದರೆ, ಖಿನ್ನತೆಯು ಸಮಯ ಕಳೆದಂತೆ ಮೆದುಳಿನ ಸಂಪರ್ಕ ವ್ಯವಸ್ಥೆಯನ್ನು ವಿಕಸನಗೊಳಿಸುತ್ತಾ ಹೋಗುತ್ತದೆ.

ಈ ಅತ್ಯಾಧುನಿಕ ಸಂಶೋಧನೆಯು ಮುಂದಿನ ದಿನಗಳಲ್ಲಿ ಮಾನಸಿಕ ಆರೋಗ್ಯ ಕ್ಷೇತ್ರದಲ್ಲಿ ಪ್ರತಿಯೊಬ್ಬ ರೋಗಿಯ ಸ್ಥಿತಿಗೆ ತಕ್ಕಂತೆ ಹೆಚ್ಚು ವೈಯಕ್ತಿಕರಿಸಿದ (Personalised) ಮತ್ತು ಪರಿಣಾಮಕಾರಿ ಚಿಕಿತ್ಸಾ ವಿಧಾನಗಳನ್ನು ಅಭಿವೃದ್ಧಿಪಡಿಸಲು ವಿಜ್ಞಾನಿಗಳಿಗೆ ಭಾರಿ ನೆರವಾಗಲಿದೆ ಎಂದು ಆಶಿಸಲಾಗಿದೆ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ