ದೆಹಲಿ: ದೇಶದ ರಾಜಧಾನಿ ದೆಹಲಿಯಲ್ಲಿ ಭಾನುವಾರ ಸಂಭವಿಸಿದ ಹಠಾತ್ ಹವಾಮಾನ ವೈಪರೀತ್ಯ ಹಾಗೂ ಭೀಕರ ಬಿರುಗಾಳಿ-ಮಳೆಗೆ ಇಂದಿರಾ ಗಾಂಧಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (IGIA) ಭಾರಿ ಅವಾಂತರ ಸೃಷ್ಟಿಯಾಗಿದೆ. ಗಾಳಿಯ ತೀವ್ರತೆಗೆ ರನ್ವೇನಲ್ಲಿದ್ದ ಉಪಕರಣಗಳು (Ground Support Equipment) ನಿಯಂತ್ರಣ ತಪ್ಪಿ ನಿಲ್ಲಿಸಲಾಗಿದ್ದ ವಿಮಾನಗಳಿಗೆ ಡಿಕ್ಕಿ ಹೊಡೆದಿದ್ದು, ಪರಿಣಾಮವಾಗಿ ಏರ್ ಇಂಡಿಯಾ (Air India) ಸಂಸ್ಥೆಗೆ ಸೇರಿದ ಮೂರು ನ್ಯಾರೋ-ಬಾಡಿ ವಿಮಾನಗಳು (Narrow-body Aircraft) ಜಖಂಗೊಂಡಿವೆ ಎಂದು ದೆಹಲಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ನಿಯಮಿತ (DIAL) ತಿಳಿಸಿದೆ.
ಸುದ್ದಿ ಸಂಸ್ಥೆ ಪಿಟಿಐ (PTI) ನೀಡಿರುವ ವರದಿ ಪ್ರಕಾರ, ಭಾನುವಾರ ಸಂಜೆ ಸುಮಾರು 4:40 ರ ವೇಳೆಗೆ ವಿಮಾನ ನಿಲ್ದಾಣದ ಟರ್ಮಿನಲ್ 2 (T2) ರ ಸಮೀಪವಿರುವ ವಿಮಾನ ಪಾರ್ಕಿಂಗ್ ಬೇಸ್ಗಳಲ್ಲಿ ಈ ಘಟನೆ ಸಂಭವಿಸಿದೆ. ಏರ್ ಇಂಡಿಯಾ ಮತ್ತು ಇಂಡಿಗೋ (IndiGo) ಸಂಸ್ಥೆಗಳ ಗ್ರೌಂಡ್ ಹ್ಯಾಂಡ್ಲಿಂಗ್ ಮತ್ತು ಇಂಜಿನಿಯರಿಂಗ್ ತಂಡಗಳು ಬಳಸುವ ಸ್ಟೆಪ್ ಲ್ಯಾಡರ್ (Step Ladder – ವಿಮಾನ ಹತ್ತಲು ಬಳಸುವ ಏಣಿ) ಹಾಗೂ ಟ್ರೆಸ್ಟಲ್ಗಳು ಬಲವಾದ ಗಾಳಿಗೆ ತಾವಿದ್ದ ಜಾಗದಿಂದ ಜಿಗಿದು ಚಲಿಸತೊಡಗಿದ್ದವು. ನಿಯಂತ್ರಣ ಸಿಗದ ಈ ಉಪಕರಣಗಳು ಅಲ್ಲಿಯೇ ನಿಲ್ಲಿಸಲಾಗಿದ್ದ ಏರ್ ಇಂಡಿಯಾದ ಮೂರು ಎ320 (A320) ವಿಮಾನಗಳಿಗೆ ಜೋರಾಗಿ ಅಪ್ಪಳಿಸಿವೆ. ಭದ್ರತೆಯ ದೃಷ್ಟಿಯಿಂದ ಈ ಮೂರೂ ವಿಮಾನಗಳನ್ನು ತಕ್ಷಣವೇ ಸೇವೆಯಿಂದ ಹಿಂಪಡೆದು ತಪಾಸಣೆಗೆ ಕಳುಹಿಸಲಾಗಿದೆ.
ಇಲ್ಲಿದೆ ನೋಡಿ ವಿಡಿಯೋ:
HEART STOPPING MOMENT AT DELHI AIRPORT T2.
FIRST FOOTAGE.
3 Air India aircraft parked at Delhi Airport’s Terminal 2 were damaged after ground equipment broke loose during a sudden storm and slammed into the planes. Sources claim no prior ATC weather warning was issued to airlines… pic.twitter.com/c8Y9pl9RX9— Rahul Shivshankar (@RShivshankar) June 8, 2026
ಬಿರುಗಾಳಿಗೆ ಉಪಕರಣಗಳು ತಾನಾಗಿಯೇ ಚಲಿಸುತ್ತಿರುವ ಮತ್ತು ಅದನ್ನು ತಡೆಯಲು ವಿಮಾನ ನಿಲ್ದಾಣದ ಸಿಬ್ಬಂದಿ ಗಾಳಿ-ಮಳೆಯಲ್ಲೇ ಹಿಂದೆ ಓಡುತ್ತಿರುವ ದೃಶ್ಯದ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ವೈರಲ್ ಆಗಿದೆ. ಈ ಘಟನೆಗೆ ನೆಟ್ಟಿಗರು ತೀವ್ರ ಆಕ್ರೋಶ ಹೊರಹಾಕಿದ್ದಾರೆ. “ಇಷ್ಟು ಭೀಕರ ಗಾಳಿ ಬೀಸುವ ಮುನ್ಸೂಚನೆಯನ್ನು ಏರ್ಲೈನ್ಸ್ ಮತ್ತು ವಿಮಾನ ನಿಲ್ದಾಣದ ಅಧಿಕಾರಿಗಳಿಗೆ ಮುಂಚಿತವಾಗಿ ನೀಡದ ವಾಯು ಸಂಚಾರ ನಿಯಂತ್ರಣ (ATC) ತಂಡದ ನಿರ್ಲಕ್ಷ್ಯ ದೊಡ್ಡ ತಪ್ಪು” ಎಂದು ಒಬ್ಬರು ಕಿಡಿಕಾರಿದ್ದಾರೆ. ಮತ್ತೊಬ್ಬ ಬಳಕೆದಾರರು “ಈ ಉಪಕರಣಗಳಿಗೆ ಬ್ರೇಕ್ ಇರುವುದಿಲ್ಲವೇ? ವಿಮಾನ ನಿಲ್ದಾಣದಲ್ಲಿ ಕಾರ್ಯಾಚರಣೆಯನ್ನು ಇಷ್ಟು ಬೇಜವಾಬ್ದಾರಿಯಿಂದ ನಿರ್ವಹಿಸುವುದು ಸರಿಯಲ್ಲ” ಎಂದು ಕಮೆಂಟ್ ಮಾಡಿದ್ದಾರೆ.
ಇದನ್ನೂ ಓದಿ: ಸ್ವಂತ ತಂದೆಯಿಂದಲೇ ದೌರ್ಜನ್ಯಕ್ಕೊಳಗಾಗಿದ್ದ ಮೂವರು ಬಾಲಕರಿಗೆ ತಲಾ 10 ಲಕ್ಷ ರೂ. ಪರಿಹಾರ!
ಮಾಹಿತಿಯ ಪ್ರಕಾರ, ಜಖಂಗೊಂಡಿರುವ ಮೂರು ವಿಮಾನಗಳ ಪೈಕಿ ಎರಡು ವಿಮಾನಗಳು ಮುಂದಿನ ಕೆಲವು ದಿನಗಳಲ್ಲಿ ಸಣ್ಣಪುಟ್ಟ ದುರಸ್ತಿಯ ನಂತರ ಮತ್ತೆ ಸೇವೆಗೆ ಮರಳುವ ನಿರೀಕ್ಷೆಯಿದೆ. ಆದರೆ, ಮೂರನೇ ವಿಮಾನಕ್ಕೆ ಹೆಚ್ಚಿನ ಹಾನಿಯಾಗಿದ್ದು, ಇದನ್ನು ದೀರ್ಘಕಾಲದವರೆಗೆ ದುರಸ್ಥಿತಿ ಮಾಡುವ ಸಾಧ್ಯತೆಯಿದೆ. ಈ ಘಟನೆಯ ಬಗ್ಗೆ ಅಧಿಕೃತವಾಗಿ ಪ್ರತಿಕ್ರಿಯಿಸಲು ಏರ್ ಇಂಡಿಯಾ ನಿರಾಕರಿಸಿದೆ. ತೀವ್ರ ಹವಾಮಾನ ವೈಪರೀತ್ಯದಿಂದಾಗಿ ಇತರ ವಿಮಾನಯಾನ ಸಂಸ್ಥೆಗಳ ಕೆಲವು ವಿಮಾನಗಳಿಗೂ ಸಣ್ಣಪುಟ್ಟ ತೊಂದರೆಯಾಗಿದೆ ಎಂದು ಮೂಲಗಳು ತಿಳಿಸಿವೆ.
ದೇಶದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
