ಬೆಂಗಳೂರು: ಶೈಕ್ಷಣಿಕ ವರ್ಷ ಪ್ರಾರಂಭವಾಗಿ ಹಲವು ತಿಂಗಳುಗಳು ಕಳೆದಿದ್ದರೂ, ರಾಜ್ಯದ ಹಲವು ಸರ್ಕಾರಿ ಶಾಲಾ ಮಕ್ಕಳಿಗೆ ಇಂದಿಗೂ ಉಚಿತ ನೋಟ್ಬುಕ್ ಹಾಗೂ ಶೂ-ಸಾಕ್ಸ್ ತಲುಪಿಲ್ಲ! ಮೂಲಭೂತ ಶೈಕ್ಷಣಿಕ ಸಾಮಗ್ರಿಗಳ ಅಭಾವದಿಂದಾಗಿ ಬಡ ಕುಟುಂಬದ ವಿದ್ಯಾರ್ಥಿಗಳು ಪರದಾಡುತ್ತಿದ್ದು, ದಾನಿಗಳು, ಗ್ರಾಮಸ್ಥರು ಹಾಗೂ ಶಿಕ್ಷಕರ ನೆರವಿನಿಂದಲೇ ಅಭ್ಯಾಸ ಮುಂದುವರಿಸುವ ಸ್ಥಿತಿ ನಿರ್ಮಾಣವಾಗಿದೆ. ಶಿಕ್ಷಣ ತಜ್ಞರು ಹಾಗೂ ವಿದ್ಯಾರ್ಥಿ ಸಂಘಟನೆಗಳು ಈ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದ್ದು, ಬಡ ಕುಟುಂಬಗಳ ಮಕ್ಕಳ ಕಲಿಕೆಯ ಮೇಲೆ ಇದು ಗಂಭೀರ ಪರಿಣಾಮ ಬೀರುತ್ತಿದೆ ಎಂದು ಆಕ್ರೋಶ ಹೊರಹಾಕಿದ್ದಾರೆ.
ಹಳೇ ಪುಸ್ತಕದ ಹಾಳೆ ಹರಿದು ಓದುವ ಸ್ಥಿತಿ; ಶಿಕ್ಷಕರಿಂದಲೇ ನೋಟ್ಬುಕ್ ವಿತರಣೆ!
ಆಲ್ ಇಂಡಿಯಾ ಡೆಮಾಕ್ರಟಿಕ್ ಸ್ಟೂಡೆಂಟ್ಸ್ ಆರ್ಗನೈಸೇಶನ್ (AIDSO) ರಾಜ್ಯ ಕಚೇರಿ ಕಾರ್ಯದರ್ಶಿ ಮಹಾಂತೇಶ್ ಬಿ. ಅವರು ಹಲವು ಜಿಲ್ಲೆಗಳಲ್ಲಿ ಕಂಡುಬಂದಿರುವ ದಯನೀಯ ಸ್ಥಿತಿಯನ್ನು ಬಿಚ್ಚಿಟ್ಟಿದ್ದಾರೆ. ಹಲವು ಶಾಲೆಗಳಲ್ಲಿ ನೋಟ್ಬುಕ್ ಕೊರತೆಯನ್ನು ನೀಗಿಸಲು ಚಾರಿಟಿ ಸಂಸ್ಥೆಗಳು, ಗ್ರಾಮ ಪಂಚಾಯಿತಿ, ಗ್ರಾಮಸ್ಥರು ಹಾಗೂ ಹಳೆಯ ವಿದ್ಯಾರ್ಥಿಗಳಿಂದ ನೆರವು ಪಡೆಯಲಾಗುತ್ತಿದೆ.
ನಾಲ್ಕೈದು ಮಕ್ಕಳಿರುವ ಬಡ ಪೋಷಕರಿಗೆ ನೋಟ್ಬುಕ್ ಕೊಳ್ಳಲು ಸಾಧ್ಯವಾಗದೆ ಪರದಾಡುತ್ತಿದ್ದಾರೆ. ಹೀಗಾಗಿ, ಕೆಲವು ಶಾಲೆಗಳ ಶಿಕ್ಷಕರು ತಮಗಿರುವ ಸಂಬಳದಲ್ಲೇ ಹಣ ವ್ಯಯಿಸಿ ಮಕ್ಕಳಿಗೆ ನೋಟ್ಬುಕ್ ಕೊಡಿಸುತ್ತಿದ್ದಾರೆ. ಕೆಲವು ಮಕ್ಕಳು ತಮ್ಮ ಹಿರಿಯ ಅಣ್ಣ ಅಥವಾ ಅಕ್ಕಂದಿರು ಕಳೆದ ವರ್ಷ ಬರೆದಿದ್ದ ಪುಸ್ತಕಗಳಲ್ಲಿ ಬಳಸಿದ ಹಾಳೆಗಳನ್ನು ಹರಿದು, ಉಳಿದ ಖಾಲಿ ಹಾಳೆಗಳಿಗೆ ಕವರ್ ಹಾಕಿ ಮತ್ತೆ ಅದೇ ಪುಸ್ತಕ ಬಳಸುತ್ತಿದ್ದಾರೆ!
ಬಳ್ಳಾರಿಯಲ್ಲಿ ಬರಿಗಾಲಲ್ಲೇ ಶಾಲೆಗೆ ಬರುತ್ತಿರುವ ವಿದ್ಯಾರ್ಥಿಗಳು!
ಬಳ್ಳಾರಿ ಜಿಲ್ಲೆಯ ಕೋರ್ಲಗುಂದಿಯ ಸರ್ಕಾರಿ ಶಾಲೆಯ ಸಿಬ್ಬಂದಿಯೊಬ್ಬರು ನೀಡಿರುವ ಮಾಹಿತಿ ಪ್ರಕಾರ, ಶಾಲೆಯಲ್ಲಿರುವ 158 ವಿದ್ಯಾರ್ಥಿಗಳು ಕೃಷಿ ಕೂಲಿ ಕಾರ್ಮಿಕರ ಮಕ್ಕಳಾಗಿದ್ದಾರೆ. ಆರ್ಥಿಕ ಸಂಕಷ್ಟದಿಂದಾಗಿ ಪೋಷಕರಿಗೆ ಸ್ವಂತ ಹಣದಿಂದ ನೋಟ್ಬುಕ್ ಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಇದಷ್ಟೇ ಅಲ್ಲದೆ, ಕಳೆದ 4 ತಿಂಗಳಿನಿಂದ ಶೂ ಮತ್ತು ಸಾಕ್ಸ್ (Footwear) ಪೂರೈಕೆಯಾಗದ ಕಾರಣ ಬಳ್ಳಾರಿಯ ಕೆಲವು ಶಾಲೆಗಳಲ್ಲಿ ಬಡ ಮಕ್ಕಳು ಬರಿಗಾಲಲ್ಲೇ ಶಾಲೆಗೆ ಬರುತ್ತಿರುವುದು ವರದಿಯಾಗಿದೆ.
ಇದನ್ನೂ ಓದಿ: ಜೋಹರ್ ಕೃತ್ಯವನ್ನು ಅತ್ಯಾಚಾರ ಸಂತ್ರಸ್ತರಿಗೆ ಹೋಲಿಸಿದ ಸ್ವರಾ ಭಾಸ್ಕರ್: ‘ನಿರ್ಲಜ್ಜತನ’ ಎಂದ ರಣವೀರ್ ಶೋರೆ
ಶಿಕ್ಷಣ ತಜ್ಞರ ಆಕ್ರೋಶ & ಪರಿಹಾರಕ್ಕೆ ಆಗ್ರಹ:
ಶಿಕ್ಷಣ ತಜ್ಞ ನಿರಂಜನಾರಾಧ್ಯ ವಿ.ಪಿ. ಅವರು ಮಾತನಾಡಿ, “ರಾಜ್ಯದ ಹಲವು ಭಾಗಗಳಲ್ಲಿ ಈ ಸಮಸ್ಯೆ ಮರುಕಳಿಸುತ್ತಿದೆ. ಹೆಚ್ಚುವರಿಯಾಗಿ ದಾಖಲಾದ ಮಕ್ಕಳಿಗೆ ಅಗತ್ಯ ಸಾಮಗ್ರಿಗಳು ಸಿಗದೆ ತರಗತಿ ಕಲಿಕೆಯಲ್ಲಿ ತೊಂದರೆಯಾಗುತ್ತಿದೆ. ಈಗಾಗಲೇ ಶಿಕ್ಷಕರ ಅಭಾವದಿಂದ ಕಲಿಕಾ ಬಿಕ್ಕಟ್ಟು ಎದುರಾಗಿದ್ದು, ಸಾಮಗ್ರಿಗಳ ಕೊರತೆ ಇದನ್ನು ಮತ್ತಷ್ಟು ಹೆಚ್ಚಿಸಿದೆ” ಎಂದಿದ್ದಾರೆ. ಮುಂಚಿತವಾಗಿ ಖರೀದಿ ಮಾಡಿ: ಶೈಕ್ಷಣಿಕ ವರ್ಷ ಪ್ರಾರಂಭವಾಗುವ ಮುನ್ನವೇ ಇಲಾಖೆಯು ನೋಟ್ಬುಕ್, ಪಠ್ಯಪುಸ್ತಕ ಹಾಗೂ ಶೂ-ಸಾಕ್ಸ್ ಪೂರೈಕೆಯ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಿ, ಶಾಲೆಗೆ ತಲುಪಿಸುವ ನಿಖರ ಗಡುವನ್ನು (Timeline) ನಿಗದಿಪಡಿಸಬೇಕು ಎಂದು ಅವರು ಆಗ್ರಹಿಸಿದ್ದಾರೆ.