ಮುಂಬೈ: ದೇಶದಲ್ಲಿ ಹೆಚ್ಚುತ್ತಿರುವ ಹಣದುಬ್ಬರ (Inflation), ಕಚ್ಚಾ ತೈಲ ದರಗಳ ಏರಿಕೆ ಹಾಗೂ ಜಾಗತಿಕ ಆರ್ಥಿಕ ಸವಾಲುಗಳ ಹಿನ್ನೆಲೆಯಲ್ಲಿ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ತನ್ನ ಪ್ರಮುಖ ಬಡ್ಡಿದರವಾದ ರೆಪೋ ದರವನ್ನು (Repo Rate) 25 ಮೂಲಾಂಕಗಳಷ್ಟು (bps) ಹೆಚ್ಚಿಸಿ, ಶೇಕಡಾ 5.50 ಕ್ಕೆ ಏರಿಕೆ ಮಾಡಿದೆ.
ಫೆಬ್ರವರಿ 2023 ರ ನಂತರ ಜಾರಿಗೆ ಬಂದ ಮೊದಲ ದರ ಏರಿಕೆ ಇದಾಗಿದ್ದು, ಆರ್‌ಬಿಐನ ಹಣಕಾಸು ನೀತಿ ಸಮಿತಿಯು (MPC) ತನ್ನ ನಿಲುವನ್ನು ‘ತಟಸ್ಥ’ (Neutral) ನಿಲುವಿನಿಂದ ‘ಕ್ಯಾಲಿಬ್ರೇಟೆಡ್ ಟೈಟನಿಂಗ್’ (Calibrated Tightening) ಗೆ ಬದಲಾಯಿಸಿದೆ. ಇದರಿಂದಾಗಿ ಮುಂಬರುವ ದಿನಗಳಲ್ಲಿಯೂ ಬಡ್ಡಿದರಗಳು ಮತ್ತಷ್ಟು ಏರಿಕೆಯಾಗುವ ಸ್ಪಷ್ಟ ಮುನ್ಸೂಚನೆ ಸಿಕ್ಕಿದೆ.
ಪ್ರಮುಖ ಜಿಡಿಪಿ ಹಾಗೂ ಹಣದುಬ್ಬರ ಅಂದಾಜುಗಳು:
ಆರ್ಥಿಕ ಚಟುವಟಿಕೆಗಳು ಚೇತರಿಸಿಕೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಆರ್‌ಬಿಐ ಕೆಲ ಪ್ರಮುಖ ಪರಿಷ್ಕರಣೆಗಳನ್ನು ಮಾಡಿದೆ:
ಜಿಡಿಪಿ ಪ್ರಗತಿ ದರ (GDP Growth): FY27 ರ ಪ್ರಸ್ತುತ ಹಣಕಾಸು ವರ್ಷದ ಬೆಳವಣಿಗೆಯ ಅಂದಾಜನ್ನು ಶೇಕಡಾ 6.7 ರಿಂದ ಶೇಕಡಾ 7.1 ಕ್ಕೆ ಹೆಚ್ಚಿಸಲಾಗಿದೆ.
ಹಣದುಬ್ಬರ ಅಂದಾಜು (Inflation Forecast): ಚಿಲ್ಲರೆ ಹಣದುಬ್ಬರ ಅಂದಾಜನ್ನು ಶೇಕಡಾ 5 ರಿಂದ ಶೇಕಡಾ 5.2 ಕ್ಕೆ ಏರಿಸಲಾಗಿದೆ.
ಆರ್‌ಬಿಐ ಗವರ್ನರ್ ಸಂಜಯ್ ಮಲ್ಹೋತ್ರಾ ಮಾತನಾಡಿ, “ಎರಡನೇ ತ್ರೈಮಾಸಿಕದಲ್ಲಿ ದೇಶದ ಆರ್ಥಿಕ ಚಟುವಟಿಕೆಗಳು ಉತ್ತಮ ವೇಗವನ್ನು ಕಾಯ್ದುಕೊಂಡಿವೆ. ಮುಂದಿನ ದಿನಗಳಲ್ಲಿ ಪರಿಸ್ಥಿತಿಗೆ ಅನುಗುಣವಾಗಿ ಬಡ್ಡಿದರ ಏರಿಕೆ ಅಥವಾ ಸ್ಥಗಿತ ನಿರ್ಧಾರ ಕೈಗೊಳ್ಳಲಾಗುವುದು,” ಎಂದಿದ್ದಾರೆ. ಆಗಸ್ಟ್ ತಿಂಗಳ ಚಿಲ್ಲರೆ ಹಣದುಬ್ಬರವು ಶೇ. 4.82 ದಾಖಲಾಗಿದ್ದು, ಸತತ ಮೂರನೇ ತಿಂಗಳು ಆರ್‌ಬಿಐನ ಶೇ. 4 ರ ಮಧ್ಯಮಾವಧಿ ಗುರಿಗಿಂತ ಮೇಲಿದೆ.
ಆರ್‌ಬಿಐ ಬಡ್ಡಿದರ ಏರಿಸಲು ಪ್ರಮುಖ 4 ಕಾರಣಗಳು:
ಆಹಾರ ಧಾನ್ಯ ಮತ್ತು ಕೃಷಿ ಸಂಕಷ್ಟ: ದೇಶಾದ್ಯಂತ ಮಳೆ ಕೊರತೆಯಿಂದ ಜಲಾಶಯಗಳ ನೀರು ಶೇ. 20 ರಷ್ಟು ಕಡಿಮೆಯಾಗಿದೆ. ಮಹಾರಾಷ್ಟ್ರದ 265 ತಾಲೂಕುಗಳಲ್ಲಿ ಹಾಗೂ ಕರ್ನಾಟಕ, ತೆಲಂಗಾಣ, ಆಂಧ್ರಪ್ರದೇಶ, ರಾಜಸ್ಥಾನಗಳಲ್ಲಿ ಬರಗಾಲದ ಭೀತಿ ಎದುರಾಗಿದೆ. ಎಲ್ ನಿನೋ (El Niño) ಪ್ರಭಾವ 2027 ರವರೆಗೂ ಮುಂದುವರಿಯುವ ಭೀತಿ ಇದೆ.
ಕಚ್ಚಾ ತೈಲ ಬೆಲೆ ಏರಿಕೆ: ಜಾಗತಿಕ ಉದ್ವಿಗ್ನತೆಯಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಪೆಪರ್ ಬ್ಯಾರಲ್‌ಗೆ 100 ಡಾಲರ್ ಗಡಿ ದಾಟಿದೆ.
ಜಾಗತಿಕ ಯುದ್ಧ ಮತ್ತು ಸಂಘರ್ಷ: ಪಶ್ಚಿಮ ಏಷ್ಯಾ ಸಂಘರ್ಷ ಹಾಗೂ ರಷ್ಯಾ-ಉಕ್ರೇನ್ ಯುದ್ಧದಿಂದಾಗಿ ಜಾಗತಿಕ ಪೂರೈಕೆ ಸರಪಳಿ ಏರುಪೇರಾಗಿದೆ.
ಯುಎಸ್ ಫೆಡರಲ್ ಬ್ಯಾಂಕ್ ನಿರ್ಧಾರ: ಅಮೆರಿಕದ ಫೆಡರಲ್ ರಿಸರ್ವ್ ತನ್ನ ಬಡ್ಡಿದರವನ್ನು ಶೇ. 3.75 – 4.00 ಕ್ಕೆ ಏರಿಸಿದ್ದು, ಅಮೆರಿಕದ 10 ವರ್ಷಗಳ ಬಾಂಡ್ ಇಳುವರಿ ಶೇ. 5.31 ಕ್ಕೆ ತಲುಪಿದೆ. ಇದರಿಂದ ವಿದೇಶಿ ಹೂಡಿಕೆದಾರರು ಭಾರತೀಯ ಮಾರುಕಟ್ಟೆಯಿಂದ ಬಂಡವಾಳ ಹಿಂಪಡೆಯುತ್ತಿದ್ದಾರೆ.
ಸಾಲಗಾರರು ಹಾಗೂ ಠೇವಣಿದಾರರ ಮೇಲಾಗುವ ಪರಿಣಾಮಗಳು:
ಸಾಲಗಾರರಿಗೆ ಕಷ್ಟ: ಗೃಹ ಸಾಲ (Home Loan), ವಾಹನ ಸಾಲ (Vehicle Loan) ಮತ್ತು ವೈಯಕ್ತಿಕ ಸಾಲಗಳ (Personal Loan) ಬಡ್ಡಿದರಗಳು ತಕ್ಷಣವೇ ಹೆಚ್ಚಾಗಲಿದ್ದು, ಗ್ರಾಹಕರ ಮಾಸಿಕ ಕಂತು (EMI) ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಲಿದೆ.
MCLR ದರಗಳ ಏರಿಕೆ: ಬ್ಯಾಂಕುಗಳ ನಿಧಿ ವೆಚ್ಚ ಹೆಚ್ಚಾಗುವುದರಿಂದ ‘ಎಂಸಿಎಲ್‌ಆರ್‌’ ಆಧಾರಿತ ಸಾಲಗಳ ವೆಚ್ಚವೂ ಏರಲಿದೆ.
ಠೇವಣಿದಾರರಿಗೆ ಶುಭ ಸುದ್ದಿ: ಸತತ ಹಣದುಬ್ಬರದಿಂದ ಕಂಗೆಟ್ಟಿದ್ದ ಬ್ಯಾಂಕ್ ಠೇವಣಿದಾರರಿಗೆ (Fixed Deposits) ಬ್ಯಾಂಕುಗಳು ಶೀಘ್ರದಲ್ಲೇ ಹೆಚ್ಚಿನ ಬಡ್ಡಿದರ ನೀಡುವ ಸಾಧ್ಯತೆ ಇದೆ.