ಸೌತಾಂಪ್ಟನ್: ಇಂಗ್ಲೆಂಡ್ ತಂಡದ ಅನುಭವಿ ಹಾಗೂ ಸ್ಫೋಟಕ ಆರಂಭಿಕ ಬ್ಯಾಟರ್ ಜೋಸ್ ಬಟ್ಲರ್ (Jos Buttler) ಟಿ20 ಕ್ರಿಕೆಟ್ನಲ್ಲಿ ಹೊಸ ಇತಿಹಾಸ ಬರೆದಿದ್ದಾರೆ. ಸೌತಾಂಪ್ಟನ್ನ ‘ದಿ ರೋಸ್ ಬೌಲ್’ ಮೈದಾನದಲ್ಲಿ ಭಾರತದ ವಿರುದ್ಧ ನಡೆದ 5ನೇ ಹಾಗೂ ಅಂತಿಮ ಟಿ20 ಪಂದ್ಯದಲ್ಲಿ ಬಟ್ಲರ್ ಈ ಅದ್ಭುತ ಮೈಲಿಗಲ್ಲನ್ನು ತಲುಪಿದ್ದಾರೆ.
ಪಂದ್ಯದಲ್ಲಿ ಆಕರ್ಷಕ ಅರ್ಧಶತಕ ಬಾರಿಸಿದ ಬಟ್ಲರ್, ತಮ್ಮ ಇನಿಂಗ್ಸ್ನ 25ನೇ ರನ್ ಪೂರೈಸುತ್ತಿದ್ದಂತೆ ಇಂಗ್ಲೆಂಡ್ ಪರ ಒಟ್ಟಾರೆ ಟಿ20 ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ್ದ ಅಲೆಕ್ಸ್ ಹೇಲ್ಸ್ ಅವರ ದಾಖಲೆಯನ್ನು ಧೂಳೀಪಟ ಮಾಡಿ ಅಗ್ರಸ್ಥಾನಕ್ಕೇರಿದ್ದಾರೆ.
ಈ ಅಬ್ಬರದ ಇನಿಂಗ್ಸ್ ನೆರವಿನಿಂದ ಜೋಸ್ ಬಟ್ಲರ್ ತಮ್ಮ ಒಟ್ಟಾರೆ ಟಿ20 ವೃತ್ತಿಜೀವನದಲ್ಲಿ (ದೇಶೀಯ ಮತ್ತು ಅಂತರರಾಷ್ಟ್ರೀಯ ಲೀಗ್ಗಳು ಸೇರಿದಂತೆ) 516 ಪಂದ್ಯಗಳಿಂದ 14,450 ಕ್ಕೂ ಹೆಚ್ಚು ರನ್ ಕಲೆಹಾಕಿದ್ದಾರೆ. ಇದರಲ್ಲಿ ಅವರ ಸರಾಸರಿ ರನ್ ಗಳಿಕೆ ಸುಮಾರು 35 ರಷ್ಟಿದೆ.
ಇದನ್ನೂ ಓದಿ: ಸಂಜು ಸ್ಯಾಮ್ಸನ್ ಫ್ಯಾನ್ಸ್ಗೆ ಬಿಗ್ ಶಾಕ್!: ಕೇರಳ ಕ್ರಿಕೆಟ್ ಲೀಗ್ನಿಂದ ದಿಢೀರ್ ಹಿಂದೆ ಸರಿದ ಸ್ಟಾರ್ ಕ್ರಿಕೆಟರ್; ಕಾರಣವೇನು?
ಒಟ್ಟಾರೆ ಟಿ20 ಯಲ್ಲಿ ಬಟ್ಲರ್ ಬರೋಬ್ಬರಿ 8 ಶತಕ ಹಾಗೂ 102 ಅರ್ಧಶತಕಗಳನ್ನು ಸಿಡಿಸಿದ್ದಾರೆ. 145 ಕ್ಕೂ ಹೆಚ್ಚಿನ ಭೀಕರ ಸ್ಟ್ರೈಕ್ ರೇಟ್ನಲ್ಲಿ ಬ್ಯಾಟ್ ಬೀಸಿರುವ ಬಟ್ಲರ್, ಇಂಗ್ಲೆಂಡ್ ಪರ ಟಿ20 ಯಲ್ಲಿ ಅತಿ ಹೆಚ್ಚು ಅಂದರೆ 8 ಶತಕ ಬಾರಿಸಿದ ಏಕೈಕ ಆಟಗಾರನಾಗಿದ್ದಾರೆ.
ಟಿ20 ಮಾದರಿಯಲ್ಲಿ 600ಕ್ಕೂ ಹೆಚ್ಚು ಸಿಕ್ಸರ್ ಚಚ್ಚಿದ ಮೊದಲ ಇಂಗ್ಲೆಂಡ್ ಆಟಗಾರ ಎಂಬ ಹೆಗ್ಗಳಿಕೆ ಇವರದ್ದಾಗಿದೆ (ಇದರಲ್ಲಿ 175 ಸಿಕ್ಸರ್ಗಳು ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಬಂದಿವೆ). ಇದಕ್ಕೂ ಮುನ್ನ ಅಗ್ರಸ್ಥಾನದಲ್ಲಿದ್ದ ಅಲೆಕ್ಸ್ ಹೇಲ್ಸ್ 528 ಪಂದ್ಯಗಳಿಂದ 29.91 ರ ಸರಾಸರಿಯಲ್ಲಿ 14,449 ರನ್ ಗಳಿಸಿದ್ದರು. ಇವರನ್ನು ಹೊರತುಪಡಿಸಿದರೆ ಜೇಮ್ಸ್ ವಿನ್ಸ್, ಜೇಸನ್ ರಾಯ್ ಮತ್ತು ಡೇವಿಡ್ ಮಲನ್ ಇಂಗ್ಲೆಂಡ್ ಪರ ಟಿ20 ಯಲ್ಲಿ 10,000 ರನ್ ಗಡಿ ದಾಟಿದ ಇತರ ಪ್ರಮುಖ ಬ್ಯಾಟರ್ಗಳಾಗಿದ್ದಾರೆ.
ಇಂಗ್ಲೆಂಡ್ ರಾಷ್ಟ್ರೀಯ ತಂಡದ (T20I) ಪರವಾಗಿಯೂ ಜೋಸ್ ಬಟ್ಲರ್ ಅವರದ್ದೇ ಹವಾ ಮುಂದುವರಿದಿದೆ. ಇಂಗ್ಲೆಂಡ್ ಪರ ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್ನಲ್ಲಿ 2,500 ರನ್ ಗಡಿ ದಾಟಿದ ಮೊದಲ ಮತ್ತು ಏಕೈಕ ಆಟಗಾರ ಇವರಾಗಿದ್ದಾರೆ.
ಇಂಗ್ಲೆಂಡ್ನ ಈ ಮಾಜಿ ನಾಯಕ ಒಟ್ಟು 160 ಅಂತರರಾಷ್ಟ್ರೀಯ ಟಿ20 ಪಂದ್ಯಗಳಿಂದ 33 ಕ್ಕೂ ಹೆಚ್ಚಿನ ಸರಾಸರಿಯಲ್ಲಿ 4,100 ಕ್ಕೂ ಹೆಚ್ಚು ರನ್ ಬಾರಿಸಿದ್ದಾರೆ.
ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕನಿಷ್ಠ 3,500 ರನ್ ಗಳಿಸಿರುವ ಜಗತ್ತಿನ ಎಲ್ಲಾ ಬ್ಯಾಟರ್ಗಳ ಪೈಕಿ ಬಟ್ಲರ್ ಅವರ 147 ರ ಸ್ಟ್ರೈಕ್ ರೇಟ್ ಅತ್ಯಂತ ಗರಿಷ್ಠವಾಗಿದೆ. ಇವರ ಅಂತಾರಾಷ್ಟ್ರೀಯ ಖಾತೆಯಲ್ಲಿ 1 ಶತಕ ಮತ್ತು 28 ಅರ್ಧಶತಕಗಳಿವೆ.
ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ