ಬೆಂಗಳೂರು: ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ (Renukaswamy Murder Case) ಬಂಧಿತರಾಗಿರುವ ನಟ ದರ್ಶನ್ (Actor Darshan) ಸಲ್ಲಿಸಿದ್ದ ಅರ್ಜಿಯನ್ನು ವಿಚಾರಣೆ ನಡೆಸಿದ ಕರ್ನಾಟಕ ಹೈಕೋರ್ಟ್, ಪ್ರಕರಣದ 14ನೇ ಆರೋಪಿ ಪ್ರದೋಶ್ ಎಸ್. ರಾವ್ ಸಲ್ಲಿಸಿದ್ದ ಮಾಫಿ ಸಾಕ್ಷಿ ಅರ್ಜಿಯನ್ನು ಪುರಸ್ಕರಿಸಿ ವಿಚಾರಣಾ ನ್ಯಾಯಾಲಯ (Trial Court) ಹೊರಡಿಸಿದ್ದ ಆದೇಶವನ್ನು ರದ್ದುಗೊಳಿಸಿದೆ.
ಹೈಕೋರ್ಟ್ನ ಏಕಸದಸ್ಯ ಪೀಠದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಪೀಠವು ಈ ಮಹತ್ವದ ತೀರ್ಪನ್ನು ನೀಡಿದ್ದು, ವಿಚಾರಣಾ ನ್ಯಾಯಾಲಯದ ಆದೇಶದಲ್ಲಿನ ಕಾನೂನು ಲೋಪವನ್ನು ಎತ್ತಿಹಿಡಿದಿದೆ.
ವಿಚಾರಣಾ ನ್ಯಾಯಾಲಯದ ಆದೇಶ ರದ್ದಾಗಿದ್ದು ಏಕೆ?
ಆರೋಪಿ ಪ್ರದೋಶ್ ಸಲ್ಲಿಸಿದ್ದ ಮಾಫಿ ಸಾಕ್ಷಿ ಅರ್ಜಿಯನ್ನು ವಿಚಾರಣೆ ನಡೆಸುವಾಗ ಟ್ರಯಲ್ ಕೋರ್ಟ್ ಪ್ರೊಬೇಷನ್ ಆಫ್ ಅಫೆಂಡರ್ಸ್ ಆಕ್ಟ್, 1958 (Probation of Offenders Act) ರ ಅಡಿಯಲ್ಲಿ ಪ್ರೊಬೇಷನ್ ಅಧಿಕಾರಿಯಿಂದ ವರದಿ ತರಿಸಿಕೊಂಡಿತ್ತು.
ಈ ಪ್ರಕ್ರಿಯೆಯನ್ನು ಹೈಕೋರ್ಟ್ ಕಟುವಾಗಿ ಆಕ್ಷೇಪಿಸಿದ್ದು, ಕೆಳಗಿನ ಪ್ರಮುಖ ಅಂಶಗಳನ್ನು ಉಲ್ಲೇಖಿಸಿದೆ:
ಕಾನೂನು ಬಾಹಿರ ನಡಾವಳಿ: ಅಪರಾಧ ಸಾಬೀತಾಗುವ (Post-Conviction) ಮುನ್ನ ವಿಚಾರಣೆಯ ಹಂತದಲ್ಲಿದ್ದಾಗ ಪ್ರೊಬೇಷನ್ ಅಧಿಕಾರಿಯಿಂದ ಆರೋಪಿಯ ನಡವಳಿಕೆ, ಕುಟುಂಬದ ಹಿನ್ನೆಲೆ ಕುರಿತು ವರದಿ ತರಿಸಿಕೊಳ್ಳಲು ಕಾನೂನಿನಲ್ಲಿ ಅವಕಾಶವಿಲ್ಲ.
ಮೂರು ಸಂದರ್ಭಗಳಷ್ಟೇ ಸಾಧ್ಯ: ಶಿಕ್ಷೆಯ ಪ್ರಮಾಣ ನಿಗದಿಪಡಿಸುವಾಗ, ಶಿಕ್ಷೆ ಅಮಾನತಿನಲ್ಲಿಡುವಾಗ ಅಥವಾ ಆರೋಪಿಯನ್ನು ಪ್ರೊಬೇಷನ್ ಮೇಲೆ ಬಿಡುಗಡೆ ಮಾಡುವಾಗ ಮಾತ್ರವೇ ಈ ವರದಿ ತರಿಸಬಹುದು. ಪ್ರಕರಣ ಇನ್ನೂ ವಿಚಾರಣೆ ಹಂತದಲ್ಲಿರುವಾಗ ವಿಚಾರಣಾ ನ್ಯಾಯಾಲಯ ಸ್ವೇಚ್ಛೆಯಿಂದ ವರದಿ ತರಿಸಿಕೊಂಡಿರುವುದು ತಪ್ಪು ದಾರಿಯ ನಿರ್ಧಾರವಾಗಿದೆ ಎಂದು ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ.
ಇದನ್ನೂ ಓದಿ: ತುಳು ನಟ ಅರವಿಂದ್ ಬೋಳಾರ್ ಹೇಳಿಕೆಗೆ ಆಕ್ಷೇಪ: ಸೋಶಿಯಲ್ ಮೀಡಿಯಾದಲ್ಲಿ ಸೌಹಾರ್ದ vs ಅಸಮಾಧಾನ ಸಮರ
ಮತ್ತೆ ವಿಚಾರಣೆ ಇಲ್ಲ, ಹೊಸ ಆದೇಶ ನೀಡಲು ಸೂಚನೆ!
ವಿಚಾರಣಾ ನ್ಯಾಯಾಲಯದ 2026ರ ಆಗಸ್ಟ್ 25ರ ಆದೇಶವನ್ನು ಭಾಗಶಃ ರದ್ದುಗೊಳಿಸಿರುವ ಹೈಕೋರ್ಟ್, ಈ ವಿಷಯವನ್ನು ಮರಳಿ ವಿಚಾರಣಾ ನ್ಯಾಯಾಲಯಕ್ಕೇ ರವಾನಿಸಿದೆ:
ಪ್ರೊಬೇಷನ್ ಅಧಿಕಾರಿಯ ವರದಿಯನ್ನು ಪರಿಗಣನೆಗೆ ತೆಗೆದುಕೊಳ್ಳದೆ, ಪ್ರದೋಶ್ ಸಲ್ಲಿಸಿರುವ ಅರ್ಜಿ (Sec 307 CrPC) ಕುರಿತು ಮತ್ತೆ ಹೊಸದಾಗಿ ಆದೇಶ (Order Afresh) ಹೊರಡಿಸುವಂತೆ ವಿಚಾರಣಾ ನ್ಯಾಯಾಲಯಕ್ಕೆ ಸೂಚಿಸಲಾಗಿದೆ.
ಅರ್ಜಿಯ ಮೇಲೆ ಸಂಪೂರ್ಣವಾಗಿ ಮರು-ವಿಚಾರಣೆ ನಡೆಸುವ ಅಗತ್ಯವಿಲ್ಲ, ಬದಲಿಗೆ ಕೇವಲ ಹೊಸ ಆದೇಶವನ್ನು ಮಾತ್ರ ಹೊರಡಿಸಬೇಕು ಎಂದು ಹೈಕೋರ್ಟ್ ಸ್ಪಷ್ಟಪಡಿಸಿದೆ.